عنجليزي ده يا مرسي

في Topic عايز أتكلم فيه من زمان جداً فأنا وأنت and All of us كلنا يعني responsible عنه و أنا حاسس فعلاً أنه topic مش simple و لاننا بجد بجد في problem كبير جداً... All over the world دلوقتي بيهتموا لحاجة very important لكل الناس مش بس علشان هما بلاد high level و عندهم -hi Technology لا ده كمان علشان هما عايزين يبقوا عايزين from inside أنهم to lead the world و علي كدة هما مش أحسن مننا في حاجة every one have a lot of skills وwe must use it بس الـ problem فعلاً أننا شايفين أننا مش نستحق كده لان المشكلة في الـ government بتاعنا و أحنا لو قعدنا نـ depending علي الـ government في كل حاجة فعلاً مش هنتقدم في حاجة خالص ... believe me
لازم كل واحد from inside يـ decide أنه he will be the change that he wants .. معايا ... otherwise احنا مش هنبقي developed country any way... معايا ...
يبقي علشان نبقي بجد very effected to the other people ...لازم لازم لازم نكون قد الـ responsibility دي ... و أحب أقول example علي كده هو the Japanese people مع أنهم ابتدوا الـ development بتاعهم من حوالي fifty years - more or less بس أنا شايف أنهم قدروا فعلاً يحقووا results هائلة و العالم كله بقي بستخدم الـ products بتاعهم ...
يا جماعة تصدقوا أني كنت بكلم my friend في America و قاللي أنا عايز اجي Egypt علشان أركب الـ Camel تصورا أنهم لسوا فاكرين أننا دولة لسة بنستخدم الـ Camel في الـ transportation ... بجد بجد بجد I can not believe اللي قاللوا ليا ده خالص ... بجد بجد I was shocked لما قال لي الكلام ده ...
علشان كده أنا النهاردة بفكركوا أنكوا لازم لازم لازم أنتوا تكونوا الـ start و ما نستانش حد يقول لنا What to do & When to do ... يا رب تكونوا well understand للكلام اللي حبيت اوصلهلكوا و لو أي حد عنده اي comment انا هكون availble علي الـ internet from 8:00 to 90:00 pm
I am waiting for your comments و السلام عليكم و رحمة الله و بركاته
انتهت القصة ... اه كده انتهت ... حد فهم حاجة .. أشك و لكن للاسف معظم الناس بقت بتتكلم كده ... تتكلم 10 كلمات منهم 3 عربي و 7 انجليزي ... طيب ليه ؟ مش عارف
طالما اللغة فيها كلمات تفي بالغرض و مهياش مصطلحات علمية يبقي ليه نقول I see و ما نقلش انا فاهم مع ان فاهم ده من صميم اللغة و مش مصطلح علمي مستحدث علشان لو قلته ممكن يكون في ناس مش تفهمه ... ليه أقول I am waiting you و ماقلش أنا في انتظارك !!! و خد من ده أمثلة كثيرة جداً !!! والكلام اللي في اول التدوينة يفي بالغرض
انا في أوقات كتير بستخدم اللغة الانجليزية في كلام انما لو كان فعلاً لمصطلحات علمية أو مواقع أجنبية أشير لها بس مش بستخدمها عمال علي بطال كده و خلاص !! و ساعات كمان بعمل شات بس بكون حريص أن استخدم اللغة العربية او الأنجليزية بس انما الفرانكوا اراب فأنا الصراحة مش برتاح له مع أني بعرف استخدمه كويس و بعتبره مسخ للغة بس ساعات بستخدمه في حدود ضيقة جداً و بحاول ابطله لانه مالوش فائدة ...

هناك 4 تعليقات:

A. Mokhtar يقول...

U R right
:D

لا بجد عندك حق، كتر استخدام الكلمات الإنجليزية عمال على بطال دا بيخنق أوي أوي، وفي رأي، إن ده بسبب ضياع الهوية أو نظرة الشباب أن استخدامه للكلمات الإنجليزية ده معناه إنه مثقف أو ما شابه، ولكنه للأسف يساعد في طمس الهوية العربية ولغتها الجميلة.

للأسف أنا بستخدم الفرانكو أراب في الشات كتيير ( بس في الشات وبس )، ولكن مش لأني بحب كدة ولكن لأني غالباً بكون بعمل حاجات تانية على النت وغالباً بتكون بإستخدام اللغة الإنجليزية فبستسهل بدا ما كل شوية أفضل أغير بين اللغتين.

سمو الامير يقول...

موضوع Very Nice
وأنا باحب ال Topics اللى على نفس ال System ده

Go ahead وربنا معاك

:D

لا بجد تدوينة جميلة أحييك عليها
أنا مبحبش اقول مصطلحات انجلش كتير في الكلام بس فيه حاجات بتطلع كده غصب عني :)

A.Elkasas يقول...

مختار
فعلاً (ضياع الهوية) أنت جبت المفيد
وبالنسبة للفرانكو فعندك حق انا استخدامي لها بيكون بسيبب اني بعمل شات و نفس الوقت بكون ببحث في مواقع انجليزية و علشان كده لو بستخدم اللغة العربية تلاقيني كل شوية بحول لغة الكتابة ... انما لو بتكلم بس مع حد يبقي لغة عربي بس او انجليزية بس
شكراً لمرورك

A.Elkasas يقول...

سمو الامير
شرفتني بزيارتك لمدونتي
شكرا ليك ... هو فعلاً في كلام احنا اتعودنا نقولوه انجليزي وخلاص و للاسف لو اتكلمت الكلام بالعربي ممكن الناس تتهمك بالجهل او السطحية مع ان في رأيي ان معظم الناس اللي بتحشر كلام انجليزي كتير في كلامها بيكونوا مش بيعرفوا يتكلموا انجليزي كويس ولا بيعرفوا يتكلموا عربي كويس ولا عندهم ثقافة اصلاً
شكراً لمرورك الكريم