يا ريتني كنت عايش في الزمن ده ...!!!

1
أثناء تجولي في المدرج الروماني في رحلتي إلي بعض الاثار السكندرية (الرحلة السكندرية) ... قال واحد من أصدقائي و هو مبهور بالحضارة والتقدم اللي كانوا عايشين فيه الرومان و اليونانيين قديماً .. يا ريتنا كنا عايشيين في زمنهم .. كانوا أصحاب حضارة و تقدم و راحة بال ملهاش حدود ... ما فيش حاجة تشغل بالهم يا رتني كنت معاهم في الزمن ده بدل الزمن العجيب اللي عايشين فيه ده!
2
بعد المسرح الروماني و في أثناء تجولنا في متحف المجوهرات الملكية بزيزنيا قلت في نفسي: يا رتني كنت عايش الأيام دي ... كانوا منعمين جداً ... أكيد كانو في رغد عيش وراحة بال و سعادة يتمناها أي إنسان ... كانت كل أدواتهم من الذهب و الأحجار الكريمة ... عايشيين في قصور في أجمل الأماكن في القاهرة والأسكندرية ... كل شئ موجود عندهم ... أكيد كانوا سعداء جداً!!
3
شيخ المسجد يتحدث عن الصحابة (رضي الله عنهم) و عن حبهم لرسول الله (صلي الله عليه و سلم ) و كيف كانوا يجلسون معه و يعلمهم و يزكي نفوسهم ... حتي قال الرسول (صلي الله عليه و سلم ) أنهم لو استمروا علي الحال التي يكونون عليها عنده (صلي الله عليه و سلم) لصافحتهم الملائكة في الطرقات ...
رجل عجوز يقول بصوت مرتفع : يا رتني كنت عايش في زمن الرسول (صلي الله عليه و سلم) كيف سيكون حالنا وقتها و كيف سيكون قوة إيماننا و صحة إسلامنا !!!
4
يوم الجمعة ... خالي عندنا في المنزل .. كالعادة يتحدث عن زمن السادات و كيف أن اللحم كان في الجمعيات و الناس عايشة و مبسوطة ... كننا في عصر يستطيع الفقير فيه أن يحيا حياة طيبة ... يتعلم تعليم حقيقي ليس كخريجي الجامعة الان لذين لا يعرفون الألف من كوز الذرة (علي حد قوله) ... يتوظف الشاب و يفتح بيت و هو لم يصل إلي العشرين من عمرة مش زي شباب اليومين دول اللي وصلوا لسن الثلاثين و الأربعين و لسه مش عارفين يتجوزوا و لا يتحملو المسؤلية !!!!
5
ضع قصة من تأليفك في أي زمان أو مكان يكون في أول القصة (لوكنت ... ) و اكمل ما أردت من قصص ...
المهم بقي
لو كنا عايشين في عصر الفراعنة ... اليونانيين .. الرومان ... إلخ مين اللي قال أننا ممكن نكون صناع حضارة و تقدم و عايشين في راحة بال و رغد من العيش .. مش الحضارات دي برضه كان فيها الاف الحروب... مش كانوا فيها ناس عبيد للملك أو الفرعون .. ليس لهم أي اختيارفي حياتهم فحياتهم هو ما يريد الفرعون أو الملك أو حتي السيد الذي يملك هذا العبد!!
مين اللي قال أننا كنا ممكن نكون من الاسرة الحاكمة التي تحكم كل شئ و تملك البلاد و العباد!!
مين اللي قال اننا كنا هنبقي منعمين بالذهب و االياقوت و الأحجار الكريمة هل فعلاً الذهب والفضة و الأحجار الكريمة تمنحنا الرضا و السعادة !! هل هي دليل علي هدوء النفس و راحة االبال !!
مين اللي قال اننا لو كنا عايشبين في عهد الرسول (صلي الله عليه و سلم) كنا هنبقي مسلمين أصلاً ... مش كان في يهود و كفار و منافقين... مش كان في حروب و غزوات ... مش كان في عصور فتن و مجاعات !!
مين اللي قال أن الحياة التي (هناك) و التي لا نملكها دائماً أفضل .. دائماً هؤلاء الناس أسعد و الحياة هناك أجمل و زمانهم أفضل 100 مرة من زماننا !!
نعيب زماننا و العيب فينا ... و ما للزمان عيب سوانا
تصور واحد من القدماء في أي عصر (من الإنسان البدائي إلي عصرنا هذا ) خُيَر في أن يكون معنا في عصرنا هذا أوأن يعيش في عصرهم ... أنا متأكد انه سيختار أن يعيش في عصرنا .. ... ليه؟!؟
لاننا ننظر إلي نصف الكوب الفارغ دايماً (بالمناسبة أنا أكره هذا التعبير جداً لاأنه بقي مستهلك و كل الناس بتقوله !!) بس دي الحقيقة!
انت هنا في الزمان ده ... في المكان ده ... مع الناس دي ... تغيير الزمان قد لا يغير فيك شيئاً ... و تغيير المكان لن يكون له بالغ الاثر عليك ... و تغيير الناس قد يأتي وبالاً عليك ..
أنت هنا لأنك هنا ... تغيير ما حولك لا يغيرك
التغيير دائماً يأتي من الداخل ..لا بتغيير مكان أو زمان أو ناس

الرحلة السكندرية_2

دخلنا من الباب و بدأت الجولة
اول ما ستفاجئ به هو المساحة الكبيرة جداً للمكان ... المكان كبير جداً ..ده غير اللي مش باين أصلاً علي اليمين منك و اللي مستوها اقل من مستوي المدرج الروماني ... و الجزء اللي متسمي المكان باسمه (المدرج الروماني) يعتبر صغير جداً بالمقارنه بالمكان نفسه ..
خلينا ماشيين واحدة واحدة جوة المكان ... علي الشمال منك هتاقبلك الاثار الغارقة و اللي وجدت في البحر المتوسط و بيتم رفعها ووضعها في المكان ده ...هيقابلك في البداية مجموعة من الاحواض موضوع فيها صخور علشان يتم تنضيفها لأنها بتكون بها طفيلات و ملح البحر و يتم وضعها في المياة لإزالة الطفيلات و بعد فترة يتم وضعها في المكان المخصص لها في المكان جنب بقية الأثار ... و الحوض الموجود في الصورة موجود فيه حجر جرانيتي يتم تنضيفه و هو جزء من معبد أيزيس في العصر الروماني ...
لاحظ الاحواض الخلفية أصغر حسب حجم الاثار الموجودة فيها ...
والخريطة دي بتوضح الحي الملكي و في الاثار الغارقة في مياة البحر المتوسط ...
بعد كده هتلاقي نماذج من الاثار اللي تم تنضيفها و هي موضوعة بشكل سيئ للغاية ومش متنظفة و بعضها مش مكتوب تحته كتابات تشرح اسم الاثر أو اي معلومات عنه!!!
و الصور اللي تحت دي هي اثار من هليوبلس (عين شمس حالياً) اخذها البطالمة لزخرفة قصورهم و بعدين بدأوا يقلدوا الفن المصري للتقرب من المصريين القدماء و عملوا نفس الاشكال ... علشان يتقربوا منهم ...
و تأثروا جداً بالمصريين لدرجة أنهم كانوا بيحطوا تمثال أبو الهول لحماية قصورهم و مسلات كعادة المصريين في بناء قصورهم
و الصورة دي يُقال أنها جزء من فنار الأسكندرية القديم والجزء المحفور كان مكان حروفه معدنية Alpha، Rho ،Epsilon وحصل زلزال في القرن التاسع و اتهدم الفنار تماماً و بني بالحجارة المتبقية منه قلعة قيتباي في القرن الرابع عشر
و ده تاج حتحتور بريشتي الحكمة و العدل و القرص يعبر عن قرص الشمس و القرنين هما قرني حتحور
و ده رسم لـ "سيتي الأول" يقدم فيه القرابين للألهة ..
و في كمان شوية صور موجودة علي الحائط لرفع الاثار الغارقة في مياة و كيف يتم نقلها من أماكن تواجدها إلي أماكن معالجتها و عرضها ...
و التمثال الموجود علي العربة هو تمثال لـ "بطلميوس الثاني" الللي واقف دلوقتي قدام مكتبة الاسكندرية ...
ندخل بقي علي الجزء التاني من المكان و اللي اتسمي المكان باسمه ... المدرج الروماني
و لا اقولكم نتكلم عنه المرة اللي جاية أحسن
يتبع

الرحلة السكندرية _1

يوم الاربعاء 21/4/2010 ، الساعة الثانية عشرةً ليلاً ، فتحت الفيس بوك و فتحتهة الرسايل ولاقيت فيها رسايل كثيرة كالعادة ومش بقرأها كاعادة برضه بس أديني بشوف رسالة أو اثنين ممكن يفيدوني ولأني خريج من جمعية جيل المستقبل وعضو في رابطة خريجيها فلقيت رسالة علي الفيس بوك بتقول أنه يوم الجمعة هيكون يوم سياحي داخل الاسكندرية و سيتم زيارة كل من المدرج الروماني (واللي اسمه المسرح الروماني) و عمود السواري وكوم الشقافة و متحف المجوهرات و الرحلة مجانية ... طيب برنامج رائع جداً انا بقالي سنين في اسكندرية وعمري ما زرت الأماكن السياحية دي ... ألا متحف المجوهرات و اللي زروته و أن في ابتدائي و مافتكرش فيه حاجة ...
قررت أروح طبعاً و خفت جداً أني ما ألاقيش مكان ...أن بقالي كثير ما خرجتش و نفسي أخرج في فسحة حلوة كده ...
و كمان لأن المفأجات الحلوة بتيجي مرة واحدة لاقيت رسالة ثانية بتقول أن يوم السبت زيارة لمكتبة الاسكندرية لمشاهدة فيلم داخل القبة السماوية و مشاهدة المتاحف المختلفة الملحقة بالمكتبة ...
طيب أنا علي الأقل لازم أروح واحدة من الاتنين يا الرحلة بتاعت يوم الجمعة يا المكتبة و ياسلام لو الاتنين يبقي انا كده في قمة سعادتي ...
صحيت يوم الخميس الصبح بدري الساعة 9:00 و اتصلت بالجمعية .. و ما فيش رد ... بعدبها بساعة ... ما فيش رد ... بعديها بساعة ... برضه ... لا المرة دي في رد ... رد أستاذ رامي مشرف الجمعية و قالي تعالي بكرة إن شاء الله و استناننا الساعة 9:00 قدام برج الملتقي بسيدي جابر .. أن قفلت معاه و كنت طاير من الفرحة ... هروح بكرة الرحلــــــــــــــة!
نمت يوم الخميس بدري شوية (الساعة 1:00) يعتبر بدري) و صحيت الساعة 7:15 كأنني رايح الكلية بدري و عندي محاضرة و هتأخر بقي ... ياه كانت أيام ... بسرعة لبست و شربت الشاي و نزلت الساعة 8:00 إلي الملتقي
وصلت الساعة 8:40 تقريباً إلي الملتقي و ما فيهوش حد بيلتقى ... الدنيا فاضية و يوم الجمعة بقي و ما فيش حد ماشي في الشارع تقريباً و الاتوبيسات فاااااضية!!! و الدنيا حلوة خالص ... هو أنا في في سيدي جابر في مدينة يوتبيا و لا أيه ؟!!!
المهم قلت يمكن أنا جيت بدري و اتمشيت شوية في المكان و قلت أخذ أول صورة في الرحلة و أجرب الكاميرا ..
صورت الحديقة اللي اتعملت مكان موقف الاتوبيسات القديم في سيدي جابر
و رجعت لاقيت الناس بدأت تيجي ... ما كنتش اعرف منهم غير اتنين بس ... و قفت شوية معاهم لغاية ما ناس كتير بدأت تيجي -ايوة كده - أبديت الرحلة .. مشينا علي الساعة 10 ألا ربع من سيدي جابر
طبعاً حاجة بايخة أنك تكون في رحلة و قاعد لوحدك كده كأنك كائن فضائي alien و قررت أروح اقعد مع الناس في الكرسي الاخير - و بالمرة اتعرف عليهم ... رحت أقعدت معاهم و حاولت اكسر الثلج في اقل وقت ممكن ...
المهم اتعرفت عليهم مبدئياً و مفيش ربع ساعة وكنا فدام المدرج الروماني ... هو أصلاً مش بعيد عن سيدي جابر ..دي في محطة مصر
شكل البوابة من الخارج و اليافطة اللي مكتوب عليها اسم المدرج الروماني ( او المسرح الروماني زي ما هو موجود بالصورة كده) يحسسك أنه مخزن بلاط الحاج عوض !!!! ... بصراحة شكلة سئ جداً لا يليق بمكان سياحي عالمي يعود لالاف السنين و بيزوره الاف الناس من مصر و من مختلف دول العالم سنوياً ... انا شفت سياح كتير جوة ...
و لا بقي شباك التذاكر !!! حاجة كده شبة كنتين المدرسة الابتدائي ... كان ناقص الاقي واحد بيبع فشار جوة !!!
و لو ركزت شوية في الصورة هتلاقي مكتوب عليها الاسعار و هتشوف عجائب الدنيا الثامنة !!! ركز في طريقة الكتابة العجيبة و في الترجمة و أنت تشوف العجائب
ما علينا ... أحنا لينا باللي جوة ... دخلنا من الباب و بدأت الرحلة ...
يتبع

الاهرام

اهرام الجمعة
اقترح علي جريدة الاهرام الأسبوعي أنهم يعملوا ملحق اسمه "صحافة" يكون فيه كل مقالات الجريدة و يسيبوا الجريدة للإعلانات بس ... مش معقول كم الإعلانات في الأهرام بتاع يوم الجمعة ده!!!! أنا بقيت مش عارف أيه الأصل؟؟ أنها جريدة و فيها إعلانات و مقالات و تحقيقات بالأضافة إلي بعض الإعلانات علشان الجريدة تكسب و لا هي جريدة إعلانية فيها شوية مقالات !!!
بريد الجمعة
اعتقد أن بريد الجمعة من اشهر الصفحات الموجودة بالصحافة العربية عموماً و أشهر صفحة في جريدة الأهرام خصوصا ... لكن الوضع أختلف تماماً بعد موت الأستاذ عبد الوهاب مطاوع - يرحمة الله - ... الصفحة كانت الأول كاملة وفيها رد علي أكثر من قصة من قصص الحياة اللي بيبعتها الناس له علشان يجدوا الحل الذي دائماً ما يكون حل مقنع و واقعي و مدعم بالاستشهادات والاراء السديدة للأستاذ عبد الوهاب ...
أما الان و بعد أن أصبح خيري رمضان هو كاتب الصفحة لم أعد استطيع أن أصدقه في حل مشكلات الباب كما تعودت من أستاذ عبد الوهاب و الصفحة اصبحت نصف صفحة و الباقي إعلانات
الشباب
كنت متابع جيد للأستاذ عبد الوهاب مطاوع في مجلة الشباب و اللي كان رئيس تحريرها لسنوات طويلة و كنت معجب جداً بأراه و أفكاره الجميلة و ببقية المقالات و التحقيقات زي أنيس منصور و محمود السعدني و د.مصطفي محمود و صلاح منتصر و غيرهم ... كانت فعلاً مجلة تثقفية من الدرجة الاولي أما الان فالشباب أصبحت شبيه بمجلة النجوم !!!
عدد الكتاب قل بدرجة كبيرة و اهتمامات المجلة اتغير وأصبحت مهتمة بالسينما و الفن و لقاء الفنانين و بعض التحقيقات التافهة و اللي ملهاش أهمية خالص !!!
ما فيش حاجة بقت زي الأول ... و ما حدش حد بيهتم بالكلمة المفيدة والاعلام الهادف ... و اللي يغيظ بقي أن أعرف أن المؤسسات الصحفية الكبيرة زي الأهرام بتخسر ملايين و بتأخذ دعم من الدولة طيب ما تدعموا حاجة عدلة !
انتهي

فكرة جديدة

في أفكار كتير جداً في دماغي وعايز أكتب عنها تدوينات كاملة و بعضها يمكن أن أكتب عنها تدوينات في حلقات متعددة ( زي موضوع (أنا والراديو و الـ podcast) واللي كان علي 3 حلقات) و لكن للاسف الشديد من كثرة هذه الأفكار فأنها تضيع و أجد نفسي في نهاية الاسبوع لم أكتب شيئاً و في بعض الأحيان أظل شهور لم أكتب شيئاً جديداً في المدونة ....
بئر معطلة و قصر مشيد
و لذلك و لحل هذه المشكلة فكرت كثيراً ووجدت الحل ... الحمد لله ...
  1. كتابة عدة تدوينات علي الورق أولاً و تبيضها ... الكتابة علي الورق أسهل و أكثر تركيزاً و الفكرة لن تموت بذلك و بعدها سأكتب الموضوع علي بلوجر و أنسقه ثم أنشره
  2. كتابة تدوينات علي هيئة نقاط سريعة في موضوعات مختلفة لأن ليس كل الأفكار لها نفس الأهمية ... إذا وجدت أهمية فكرة معينة فسوف أكتب عنها تدوينة كاملة إن شاء الله ... و في بعض التدوينات سوف اكتفي بالاشارة إلي مواقع أو برامج معينة و بالتالي لن تتناثر الأفكار في الفيس بوك وتويتر وغيرها من المواقع و الخدمات التي يقدمها الانترنت ...
  3. افتحتت منذ فترة مدونة خاصة بالفيديوهات وسميتها Sacandary-videos وفيها أجمل الفيديوهات التي اراها علي موقع الـ YouTube أوVimeo وغيرها من المواقع حتي لو كان الفيس بوك إذا كانت عبارة عن حلقة كاملة و ليس فيديو منفرد .
انتهي

أنا و الراديو و الـ Podcast الحلقة الأخيرة

تحدثت في التدونيتين السابقتين (1-2)عن الراديو و الـ Podcast و شرحت بإيجاز ما هو الـ Podcast و كيف نستخدمة و ذكرت أيضا ً أهم الـ Podcasts باللغة العربية الموجودة حالياً ... و هذه أخر حلقة من حلقات عن الراديو والـ Podcast
و كنت انوي شرح كيفية عمل الـ Podcast بالتفضيل لكن أثرت أن أوجز الكلام حتي لا يمل من يقرأ و خصوصاً أن ليس كل من يقرأ سوف يصنعPodcast خاص به لان الموضوع يحتاج الوقت و الاستمرار ... أنا افكرالان في أحد الموضوعات التي تحتاج وقت كبير لتجميع المعلومات و دراستها حتي استطيع وضعها في podcast يستمر إن شاء الله ... أدعولي ...
المهم يجب أن تشترك في Podcatcher حتي تستطيع تحميل أخر الحلقات في الـ Podcasts الذي تحبه و بالتالي لا تبحث عن كل حلقة جديدة ...
أشهر الـ Podcatchers الموجودة هو برنامج itunes من Apple وهو برنامج معروف لكل من يستخدم أياً من منتجات شركة Apple مثل ipod أوiphoneأو اخيراًipad لأن جميع الـ applications التي تستخدمها الأجهزة السابقة يتم تجميلها منه و بالتالي هو معروف لهم ...
هناك مثل صيني يقول الصورة الواحدة افضل من ألف كلمة ... فما بالنا بالفيديو !!!
شاهد هذا الفيديو لتعرف كيف تحمل البرنامج و تشترك مجاناً و تبدأ في البحث عن الـ podcasts الذي تريديه و تحمل ما أردت من Podcasts
أما أذا أردت أن تبدأ في تسجيل podcast خاص بك فحمل برنامج Audicity و ابدأ في تسجيل صوتك و الفيديو التالي يشرح الموضوع بالتفصيل ...
أحب أن أضيف شئ للمرة الثالثة وهي أفضل Podcast أسمعه حالياً
الـ Podcast اسمه Sciware Podcast للدكتور :- محمد قاسم ... يشرح العلوم بشكل ميسر و مبسط و أسلوبه أخاذ جداً أنصحكبسماع حلقة من حلقاته و أنا متأكد انك ستستمع لباقي الحلقات كما أفعل أنا الان ...
اتمني أنت تكونوا قد استفدتم من الحلقات التلاتة و أن أكون قد أضفت شئياً و لو قليلاً
انتهي

عنجليزي ده يا مرسي

في Topic عايز أتكلم فيه من زمان جداً فأنا وأنت and All of us كلنا يعني responsible عنه و أنا حاسس فعلاً أنه topic مش simple و لاننا بجد بجد في problem كبير جداً... All over the world دلوقتي بيهتموا لحاجة very important لكل الناس مش بس علشان هما بلاد high level و عندهم -hi Technology لا ده كمان علشان هما عايزين يبقوا عايزين from inside أنهم to lead the world و علي كدة هما مش أحسن مننا في حاجة every one have a lot of skills وwe must use it بس الـ problem فعلاً أننا شايفين أننا مش نستحق كده لان المشكلة في الـ government بتاعنا و أحنا لو قعدنا نـ depending علي الـ government في كل حاجة فعلاً مش هنتقدم في حاجة خالص ... believe me
لازم كل واحد from inside يـ decide أنه he will be the change that he wants .. معايا ... otherwise احنا مش هنبقي developed country any way... معايا ...
يبقي علشان نبقي بجد very effected to the other people ...لازم لازم لازم نكون قد الـ responsibility دي ... و أحب أقول example علي كده هو the Japanese people مع أنهم ابتدوا الـ development بتاعهم من حوالي fifty years - more or less بس أنا شايف أنهم قدروا فعلاً يحقووا results هائلة و العالم كله بقي بستخدم الـ products بتاعهم ...
يا جماعة تصدقوا أني كنت بكلم my friend في America و قاللي أنا عايز اجي Egypt علشان أركب الـ Camel تصورا أنهم لسوا فاكرين أننا دولة لسة بنستخدم الـ Camel في الـ transportation ... بجد بجد بجد I can not believe اللي قاللوا ليا ده خالص ... بجد بجد I was shocked لما قال لي الكلام ده ...
علشان كده أنا النهاردة بفكركوا أنكوا لازم لازم لازم أنتوا تكونوا الـ start و ما نستانش حد يقول لنا What to do & When to do ... يا رب تكونوا well understand للكلام اللي حبيت اوصلهلكوا و لو أي حد عنده اي comment انا هكون availble علي الـ internet from 8:00 to 90:00 pm
I am waiting for your comments و السلام عليكم و رحمة الله و بركاته
انتهت القصة ... اه كده انتهت ... حد فهم حاجة .. أشك و لكن للاسف معظم الناس بقت بتتكلم كده ... تتكلم 10 كلمات منهم 3 عربي و 7 انجليزي ... طيب ليه ؟ مش عارف
طالما اللغة فيها كلمات تفي بالغرض و مهياش مصطلحات علمية يبقي ليه نقول I see و ما نقلش انا فاهم مع ان فاهم ده من صميم اللغة و مش مصطلح علمي مستحدث علشان لو قلته ممكن يكون في ناس مش تفهمه ... ليه أقول I am waiting you و ماقلش أنا في انتظارك !!! و خد من ده أمثلة كثيرة جداً !!! والكلام اللي في اول التدوينة يفي بالغرض
انا في أوقات كتير بستخدم اللغة الانجليزية في كلام انما لو كان فعلاً لمصطلحات علمية أو مواقع أجنبية أشير لها بس مش بستخدمها عمال علي بطال كده و خلاص !! و ساعات كمان بعمل شات بس بكون حريص أن استخدم اللغة العربية او الأنجليزية بس انما الفرانكوا اراب فأنا الصراحة مش برتاح له مع أني بعرف استخدمه كويس و بعتبره مسخ للغة بس ساعات بستخدمه في حدود ضيقة جداً و بحاول ابطله لانه مالوش فائدة ...

يوتيوب و أخواته

أظن ما فيش حد دلوقتي في العالم بيستخدم الأنترنت و مش بيستخدم اليوتيوب لأنه بقي نمط من أنماط الحياة أو Life Style يعني ... أياً كان أستخدامك للأنترنت فأنت أكيد بتستخدمه ... أنا مثلاً بستخدم المواقع في مشاهدة البرامج اللي بتفوتني من علي التليفزيون أو بمعني أصح ما برداش أتفرج عليها في التلفزيون علشان ما اقعدتش أتفرج علي إعلانات مدتها 5 دقايق في كل فاصل إعلاني و بالتالي يكون مدة مشاهدة الحاجة اللي حابب أتفرج عليها تقرباً ضعف المدة الطبيعة ... ده غير أن الأعلانات بقت سخيفة اوي و الواحد بينسي أساساً هو كان بيتفرج علي ايه ؟!!؟
أنا فاكر مثلاً أن فيلم زي النهاردة بتاع أحمد الفيشاوي كان جي علي روتانا سينما من حوالي 3 شهور و أنا قلت خلاص هتفرج عليه .. لأني عارف أن الفيلم ده كان كويس .. بدأ الفيلم الساعة 8 و لغاية الساعة 9:45 ما كنش الفيلم خلص و كان تقريباً ما عداش منه غير تلتينه بس وعدد الأعلانات المعروضة لا يمكن حصرها و ده خلاني أقوم من قدام الفيلم و لسه لغاية دلوقتي ما أتفرجتش علي الفيلم كامل !!!
المهم ... أنا بقيت بوفر وقتي وأعصابي من الفرجة علي الأعلانات و بتفرج علي اليوتيوب علي اللي أنا عايزه ... كمان أنا بحب أتفرج علي الأنيمي و ده طبعاً ما أكثره علي اليوتيوب وقنوات الأنيمي علي اليوتويب كثير جداً و جميلة جداً ...
و كمان بدأت مؤخراً أني أشوف بعض المحاضرات العلمية لأنها بتبقي فعالة جداً و بتنجز جداً في الوقت و بتحسسك أنك قاعد في كلية و بتدرس مش باقي بس غير أن المحاضر يقولك قوم حل علي السبورة :)
دا أنا أكتشفت كمان أن في حاجة اسمها YouTube Education و دي خاصة بالمحاضرات العلمية في الجامعات العلمية زي جامعة MIT الشهيرة و جامعة Stanford الشهيرة وغيرها من الجامعات العالمية المعروفة بمنهجها العلمي القوي جداً و التي يتمني أن يدرس فيها أي شخص يتمني أن يعيش حياة أفضل ... و الأهم أن هذه المحاضرات مجانية ... يعني مش لازم اشتراك علشان تنزل المحاضرات دي ... المواد مجانية تماماً و مميزة جداً و في محتلف العلوم ... و الأهم من ذلك كله أن الخدمة الجديدة من اليوتيوب و التي تقوم بالترجمة الفورية للكلام في الفيديوهات مفعل في كثير من الفيديوهات دي يعني ببساطة هتتفرج علي المحاضرة و هتشوف الكلام اللي بيتقال بلغته (الأنجليزية) طبعاً الترجمة مش قوية أوي و غالباً بيبقي في كلمات مش واضحة بس ده علي الاقل 70 % من الكلمات واضحة...
حاجة تانية أنا بحبها جداً و بدأت اعملها في اليوتيوب وهي أن أي حاجة أنا عايز اتعلمها مش بقرأ في ها كتاب أو مقالة في الأول أدخل علي اليوتيوب و ابحث عنها و أكيد أكيد هتلاقي لها فيدوات كتير ... هتتعرف علي الحاجة اللي حابب تتعلمها بسرعة و توفر وقت كبير جداً في القراءة ... لان أصل التعلم أننا بتعلم بالمشافهة (شفهياً يعني) الأول فأحنا أتعلمنا نتكلم من البيت والتليفزيون و من كلام الناس قبل ما نتعلم القراءة والكتابة و ندخل مدارس واتعلمنا الكمبويتر من صحابنا قبل ما نقرأ و نعرف هو شغال أزاي و اتعلمنا حاجات كتير جداً من غير ما نقرأ فيها كتب و بتكون طريقة فعالة و بنعرف أزاي الحاجة دي بتم ...
مثلاً أنا دلوقتي بسمع محاضرات في الخرائط الذهنية (Mind Mapping) لأن سمعت عنها كتير و كنت حابب أشوف أزاي أعملها وأقدر امارسها لأن حسيت فعلاً هي أد ايه مهمة بعد ما شفت فيديو بالمصادفة عنه علي اليوتيوب (سأكتب عن هذا الموضوع قريباً إن شاء الله ) و لقيت مئات الفيدوهات عن الموضوع ده و فهمته بسرعة مع أني لما نزلت كتاب عنه من النت لاقيت الموضوع صعب و مافهمتش حاجة عنه !!!
طيب هو في مواقع تاني زي اليوتيوب كده ؟!؟
اه في مواقع كتير جداً للنشر أو الـ Broadcasting
  • مواقع رفع شهيرة زي الـ 4Shared و MegaUpload و Esnips وغيرها ممكن تتتفرج علي الفيدوهات المرفوعة من المستخدمين و ممكن كمان تنقلهم لموقعك أو مدونتك عن طريق خاصية التضمين للفبدوهات (Embeded video)
  • موقع Vimeo و هو موقع تصميمه جميل و فيديوهاته رائعة جداً
  • موقع Academic Earth وده موقع علمي فيه فيدوهات للجامعات العالمية (محاضرات أكاديمية)
  • موقع TED وده بقي اسطورة ... موقع غير عادي و هو عبارة عن فيدوهات اغيير العالم ... كل عالم او صاحب شركة عنده فكرة يعرضها علي الناس في وقت قليل و الفيدوهات موجودة بـ Subtitle بلغات مختلفة منها العربية حالياً في كثير من الفدوهات عن طريق حركة TarjemTED
و في مواقع تانية كتير بس أنا عن نفسي بستخدم اليوتيوب بشكل أساسي لأني بلاقي كل حاجة عليه تقريباً و مش محتاج أني أقعد أدور في مواقع الفيدوهات علشان اعرف أكتر
حاجة أخيرة بقي هي اللي تزعل اوي .. هو أن المحتوي العربي في اليوتيوب و غيرها من المواقع قليل جداً ... أنا الصراحة بدأت أمل من البحث عن حاجة باللغة العربية لانالاستفادة بتبقي قليلة و بحس أني بضيع وقت... و الموجود منها اما مش مفيد و اما غير لائق دينياً و أخلاقياً...!
يعني مثلاً تلاقي أفلام ومسلسلات كاملة ملهاش أي لازمة (زي المسلسلات التركي اللي عدد حلقاتها بالمئات مرفوعة علي اليوتبوب و اهو كله بيسترزق !! طيب أيه لازمته مش كفاية أنها موجوده في التلفزيون !!!
أما الفيديوهات ذات المحتوي الغير لائق دينياً فتلاقي شيعة بتشتم في سُنَة و مسلمين بيشتموا مسيحيين و لا دول فاهمين حاجة و لا دول عارفين حاجة و ما فيش أسلوب لائق في الحوار ولا الكلام و ما فيش حد بيقول رأيه و دليله بأسلوب لائق و اللي مش عاجبه حاجة تلاقيه عامل فيديو و نازل شتيمة في التاني ...
والغير لائق أخلاقياً أقصد الفيديوهات الأباحية اللي بقت بالأجبار عليك بعد ما اليوتيوب حذفت زر الـ Collapse الخاص بالـ Related Video و بقي كل فيديو بتشوفه تلاقيه فيدويهات ماهى في المحتوي بالجنب و ما ينفعش تخفبها و تبقي بتتفرج عن فيدو مثلا بيشرح مميزات الـ iPad تلاقي فيديوهات ملهاش أي لازمة طالعة لك !!!
انا مش عارف اليوتيوب عمل كده ليه في التصميم الجديد مع أنه تصميم احترافي و خفيف و خلي شككل الصفحة رائع جداً !!!
انتهي

أخر أيام الأرض

استمعت اليوم إلي الفيلم الصوتي (أخر أيام الأرض) فيلم مميز جداً بيحكي أخر أيام الأرض ... قصة المسيح الدجال و صمود المؤمنين أمام هذا الكذاب و أتباع بعض الناس له لأنه سيريهم بعض الأيات من إحياء للموتي أمام أعينهم و سيعطي أتباعه الخير الكثير من جنات و عيون و في النهاية نزول نبي الله عيسي عليه السلام ليقضي عليه
العمل من تأليف وإخراج خالد المهدي ... أتذكر أني سمعت له فيلم صوتي من حوالي سنة و كان باسم (مملكة الأعداء الخفية) و لان الأخير كان عمل مميز جداً فلم اتردد في أن أستمع هذا الفيلم الذي كان أكثر تميزاًَ من سابقه
يمكنك تحميل الفيلم من هنا
برومو الفيلم

أنا و الراديو و الـ Podcast الحلقة الثانية

كنت قد أشرت في موضوعي السابق (أنا و الراديو و الـ Podcast الحلقة الأولي) إلي أن كلامي عن الـ Podcast لم ينتهِ و أني ساعود لأكمل الحديث عنه ... ما هو؟ .. كيف أحصل عليه ؟... ما أهميته ؟ ... ما هي أشهر الـ Podcasts العربية؟ ...
كنت قد أشرت في التدوينة السابقة إلي مقال الأستاذ محمد قاسر عن الـ Podcast و كيف يتم صناعته ... أنا هنا سوف أشرح الموضوع من أوله إلي أخره علي مرتين ... التدوينة التي تقرأها هي الأولي و الثانية ستقرأها قريباً إن شاء الله ...
الـ Podcast هي كلمة مكونة مقطعين ... Pod وهي من الكلمة iPod وهو الجهاز المعروف من Appple والكلمة الأخري هي Broadcast بمعني النشرأوالإذاعة ... انتشرت هذه الكلمة في عام 2004 علي يد الصحفي البريطاني Ben Hammersley من جريدة The Guardian المعروفة و أصبح هذا الاسم متدوالاً حتي الأن و معروف وهو دلالة علي الملفات الصوتية أو الفيديو - تسمي الملفات الفيديو Vodcast - و التي تنشر بانتظام علي شبكة الأنترنت في الحقيقة هذا النوع من التقنية أحدث ثورة هائلة في عالم الأنترنت لأانه كغيره من تقنيات الـ Web 2.0 -مثل الـ Social networks و الـ Blogs و تقنية الـ Wiki كلها أحدثت ثورة كبيرة في عالم الأنترنت و أصبح استخدمها شيئاً أساسياً في حياة كل الناس تقريباً - لا أتصور شخص يستغني عن الأنترنت ... بصورة مباشرة أو غير مباشرة !!!
ما جعل هذه التقنية تنتشر هو سهولة استخدامها و انعدام تكاليفها تقريباً ... فمجرد الدخول علي الأنترنت تستطيع ان تحمل ما تشاء من الـ Podcasts المحبب لك و سماعها في أي وقت كان ... فهي غير الراديو الذي يحتم عليك ميعاد معين لسماع حلقاته و إذا لم يحالفك الحظ و لم تستطع أن تسمع الحلقة فلن تستطيع إرجاعها مرة أخري ... أيضاً متطلبات عملها قليلة جداً فقط ميكروفون و كمبيوتر و أنترنت و برنامج تسجيل صوت - يوجد برامج مجانية مميزة مثل برنامج Audacity- فقط حدد الموضوع الذي تريد ان تتحدث فيه ثم أبدا في التسجيل الأمر بسيط ...
الـ Podcast مثله مثل أي ملف صوتي تستطيع أن تحمله من الأنترنت و تستطيع سماعه علي أي جهاز بعد ذلك (كمبيوتر شخصي- ipod - MP3 player .. إلخ )
ولكن ما يميز الـ Podcast عن غيره من الملفات الصوتية أو الفيديو الموجودة في الأنترنت هو أنك لن تبحث عن جديد الحلقات Eposides في كل مرة يتم عمل حلقة جديدة لن تذهب إلي الموقع الخاص بالـ podcasts و تحملها ... ببساطة شديدة ستعرف أن هناك جديد عن طريق خاصية RSS Feed التي تكلمت عليها في تدوينة سابقة و لكن هناك مشكلة بسيطة أن تقنية الـ RSS Feed تتم عن للملفات النصية فقط ولذلك يجب أولاًً تعريف RSS Feed مختلف حتي يتعرف برنامج قارئ RSS Feed علي قراءة جديد الحلقات - تسمي قارئات الـ RSS Feed للـ Podcasts بالـ Podcatchers و هي مكونة من الكلمتين Poscasts و Catchers - و يتم عمل ملف الـ RSS Feed عن طريق ملف يسمي XML و هو عبارة عن ملف به كل البيانات عن الحلقة الجديدة سواء كانت صوتية أو فيديو ...
و من أشهر برنامج الـ Podcatchers برنامج الـ itunes من شركة Apple و هو برنامج مميز جداً بجانب أنه خفيف و سهل الاستخدام و مجاني ...
حمل النسخة الأخيرة من البرنامج من هنا ثم أبدأ في تسطيبها و أبدا في سماع الـ Podcast المحبب لك ...
لاحظ أنك إذا اشتركت في Podcast معين فسيتم تحميل الحلقة الأخيرة منه مباشرة إلي جهازك و لن تتكبد عناء البحث عن الحلقات ...
______________________________
أما أشهر الـ Podcasts العربية ...
______________________________
في الحقيقة تقنية الـ podcasts ليست منتشرة بالشكل الكافي في العالم العربي بعكس الدول الأخري التي تستخدم التقنية بصورة كبيرة حتي أن جامعات عالمية تستخدمة للتواصل مع الطلبة عن طريق محاضرات في مواد دراسية معينة يتم بثها عن طريق هذا التقنية ومن أشهر هذا الجامعات جامعة MIT و جامعة Yale و جامعة Harvard
أما في العالم العربي فالأمر مقتصر علي بعض المواقع الكبري مثل
  • موقع قناة الجزيرة الأخبارية فهي تسجل بعض حلقاتها و تتطرحها بعد ذلك كـ Podcasts ... و يمكن التعرف علي البرامج التي يذيعونها بهذه الطريقة من موقعهم
  • هناك أيضاً الـ Podcast المميز لصاحبة محمد قاسر و الذي أشرت إليه في المرة السابقة و هو عن أخر المستجدات التكنولوجية والعلمية و اسم الـ Podcast الخاص به Sciware ... برنامج جميل جداً !!!
  • أيضاً هناك Podcast مشهور يتحدث عن أخر المستجدات في عالم الكمبيوترو و الأنترنت و اسمه hyperlinkpodcast و يمكن متابعتهم أيضاً من هنا
  • أيضاً موقع حريتنا يقدم برامجه علي هيئة Podcasts و يمكن متابعته من هنا
  • وهناك ايضاً Podcast يسمي Deera Chat وهو لشابان كويتيان ويتكلمان عن مواضيع مختلفة ...
  • وأيضاً هناك Podcast لشاب كويتي يسمي حسين ملا هادي و هذا هو الموقع الخاص به...
  • و هناك أيضاً Podcast عربي طبي لطو هو موجود هنا و هم طلبة كلية الطب في جدة ...
  • وهناك Podcast خاص بالتصوير الفوتوغرافي ... من هنا
  • وهناك أخيراً سوالف كاست و هو منتدي كامل خاص بكل ما يخص الـ Podcast و كيفية عملها
أكتفي بهذا القدر و سأكمل في الحلقة القادمة إن شاء الله
يتبع

الطريق ... قصة قصيرة





سيارة مرسيدس فاخرة ... يقودها رجل في العقد الثالث من عمره ... بجواره امراته ...  يظهر علي وجها علامات الضجر ... هو كذلك يضرب مقود السيارة في حنق شديد و كأنه سيرتفع بها للأعلي ...
بالخلف كان هناك عدة حقائب كانوا قد أعدوها للسفر إلي الأسكندرية و قضاء بعض الوقت هناك وهذا بعد أن تشاجرا كعادتهما لأن زوجها لا يقضي وقت معها كبقية الأزواج و دائماً بعيداً عنها في عمله .. و كأن عمله أهم من زوجته خصوصاً و أنهم لم يرزقا  بأطفال ... بعد ربع ساعة من السير بالسيارة قررا العودة إلي القاهرة ...
_________________________

سيارة BMW  ..يقودها رجل في أواخر الثلاثين من عمره  ... غير متزوج ...شنطة السيارة مليئة بالحقائب فهو عائد لتوه من المطار بعد رحلة سفر استمرت 10 سنوات استطاع فيها أن (يكوَن) نفسه ... لم يغب عن نظره أمه وأبوه أبداً فطوال سني سفره كان في شوق إليهما لكن الحياة ليست دائماً سهلة ... لقد وعد أمه أن سيأتي و يتزوج مباشرة و سيفرحها و ستحمل حفيدها قريباً ... أخر مرة كلمها كانت منذ أسبوعين .. لم ترد أمه أن تُظهر تعبها في التليفون و أنهت معه المكالمة بسرعة ... المسكين لم يعرف أن أمه الأن في المستشفي و قد لفظت أنفاسها الأخيرة من لحظات ... و الطريق ما زال طويلاً ...
_________________________

عربة (ميني باص) بها أربعة عشر رجلاً و امرأة ... الجميع قدم من (طنطا) لقضاء بعض المصالح ... منهم شاب أنهي الثانوية العامة لتوه ... كان يريد أن يصل سريعاً حتي يقدم في الكلية الحربية  ...حلم أبيه ...تكلم محمود (اسم الشاب) كثيراً مع أبيه بأنه لا يريد هذا الكلية ... أنه يعشق الهندسة ... و لكن أبيه أصر ... دارت بينهم مناقشات كثيرة حتي مرت الأيام واليوم هو أخر يوم للتقديم ... يدعي الأب من كل قلبه أن يوفق ابنه و يدخل الكلية الحربية .. لم يكن أمام محمود سوء الرضوخ لطلب أبيه ... ركب الميني باص ... و إلي القاهرة... ووقف الميني باص في الطريق ...
_________________________

أتوبيس ضخم به ما لا يقل عن 50 طالب و طالبة من طلاب الأبتدائية ... رحلة مدرسية أقامتها أحدي مدارس المنوفية للطلبة بعد شهرين من الدراسة المتواصلة ... رحلة عذاب يسموها التعليم ... أرادوا أن يخرجوا من هذا الجو الدراسي و يفرجوا عنهم قليلاً ... الرحلة كالعادة إلي القاهرة ثم الجيزة ... رحلة كل عام  حيث رؤية الأهرامات من بعيد و عمل (باي ... باي) لأبو الهول من بعيد .. كأنهم شياطين لا ينبغي الاقتراب منهم ... أو منطقة عسكرية ... ممنوع الاقتراب أو التصوير ... الأتوبيس يقف في الطريق .. لم يشعر أحد من الاطفال بوقوفه فجميعم كانوا يغنون ... أصوات الضحكات تأتي من هنا وهناك ....
_________________________

 سيارة لادا قديمة متهالكة بها امراءة و زوجها وابنيهما ... يجلس الابن و البنت بالخلف ...صمت  من الزوج والزوجة و كأن الكلام بينهما محرم أو انهما لا صلة بينهما ... البنت بالخلف تجلس و تلعب بالعروسة و الولد في سابع نومة .. يبدوا أن السيارة قد أثرت عليهما و أصبحوا أناس متهالكين كالسيارة ...
 _________________________

في أول الطريق تقف سيارة فخمة لا أعرف نوعها ... أول مرة أشاهد هذا النوع في الطريق السريع ... صاحبها رجل عجوز ... شاب شعره كله ... نائم علي مقود السيارة 
 لكنها نومة ستطول ... لأنه لن يقوم منها
والسيارة اللادا خلفه و من خلفة الاتوبيس و بعدها الميني باص و السيارة الـ BMW  و المرسيديس ... الجميع ينتظرون ...

انتهي 

أنا والراديو الـ Podcast الحلقة الأولي

من زمان جداً و أنا بحب الراديو و بحب اسمعه في كل وقت خاصة وأنا مش بيضيع وقت كبير زي التلفزيون و كمان في عدد كبير جداً من الإذاعات علي الراديو و لما دخلت النت في البيت ده خلاني أعرف أجيب أي إذاعة أنا عايزها ...
حبي للراديو قديم جداً كنت دايماً بشغل الإذاعة التعليمية أيام الاعدادية و الثانوي العام و لو بذاكر كنت بشغل إذاعة القراءن الكريم أو إذاعة الشرق الأوسط أو إذعة صوت العرب ... أو أي إذاعة تانية ألاقيها أثناء الـ Tunning ...
أنا فاكر لما أمي كانت بتصحيني علشان أروح المدرسة .. (أنا حاسس أن الكلام ده من ايام الهكسوس ما دخلوا مصر و أحمس طردهم ... الأيام بتجري) ... كانت لازم تشغل الراديو و أسمع أغنية يا صباح الخير يللي معانا يللي معانا ... الكروان غني و صحانا و صحانا ... وقبل ده كان يجي قراءة لشيخ محمد رفعت (الله يرحمه)... و بعدين بقي نسمع أهم الأخبار و أخذ الشنطة و أحط فيها السندوتشات و أروح المدرسة ...
ولا بقي برنامج أبلة فضيلة اللي كان بيجي الساعة 9:50 الصبح ... يا ولاد يا ولاد تعالوا معانا علشان نسمع أبلة فضيلة و نعيش عيشة جميلة جميلة ... أبلة أبلة فضيلة ...
و مسلسل عائلة مرزوق و همسة عتاب بتاع صفية المهندس وبرنامج لغتنا الجميلة بتاع فاروق شوشة و المسلسل الإذاعي اللي كان بيجي الساعة 3:45 كل يوم وأنا كل يوم اسمعه لو كان المسلسل حلو ... والبرنامج بتاع يوم الجمعة اللي اسمه علي اسم رقم التليفون بتاعهم و اللي كان عبارة عن مسلسل صغير كده و بيبقي في مجرم ( قاتل ... نصاب ... أي جريمة بقي ) و المطلوب من المستمعين أنهم يعرفوا مين المجرم ده و يتصلوا و يفوزوا ...
و برنامج ما يطلبه المستمعين و برنامج البرلمان الصغير - غلس أوي البرنامج ده (: - ده غير بعض البرامج اللي كنت بتاعبها في راديو الأسكندرية ... كان في برنامج بيجي أسمه (من أرشيف المحاكم) و هو برضه تمثيلية عن قضية حقيقية كانت في المحاكم و كانت بتبقي ممتعة جداً ... كله كوم بقي و البرنامج العام ده كوم تاني ... أنا فاكر أني كنت بنام علي البرنامج العام ده لأنه كان بيجيب مسلسل إذاعي أو فيلم و بيذيعه علي الراديو علي يومين أو أكثر و لو كان فيلم فتلاقي المذيع بيشرح لك أيه اللي بيحصل علي الشاشة لو الموضوع محتاج شرح ...
كانت أيام جميلة
لما دخل النت بقي أبتديت بره اسمع و أدور علي الإذعات .. الصراحة في إذاعات كتير أوي علي النت ... بقيت برضه بسمع إذعات كتير علي النت و لكن أكثر واحدة عجبتني هي إذاعة راديو حريتنا و هو راديو جميل جدا و منوع في برامج مفيدة و خفيفة ... غالباً و أنا قاعد علي النت بشغل الرديو ده علشان اسمعه أو لو مش عاجبني بنزل حلقة من حلقات برنامج أنا متابعة...
مثلاً في برنامج عندهم اسمه أحلام حقيقة .. مدة البرنامج حوال ساعة و بيجب ناس نجحوا في محال معين و بيحكوا قصة نجاحهم ... غالباً بشغل حلقة وأنا قاعد أتصفح أو أعمل Chat مع صحابي ... حلقة خفيفة و مفيدة ...
أخيرراً بقي أتعرفت علي حاجةاسمها الـ Podcast و أقريت عنها وسمعت عنه بس مش كتير ... و علشان تفهم بسرعة يعني أيه Podcast شوف الفيديو ده
هو باختصار تسجيل صوتي ... حلقات متصلة منفصلة عن موضوع ما ... سياسة ... أدب ... تكنولوجيا ... أو أي موضوع ممكن تتكلم فيه ولو مذكرت شخصية ...
وأنا كانت عايز أشرح شوية يعني أيه Podcast بس الصراحة الأستاذ محمد قاسر شرح الموضوع كويس جداً ... و أنا كمان لسه ما قريتش عنه كتير فأكتفي بالاشارة للـ Blog الخاص بالأستاذ محمد و سماع الحلقة الخاصة بالـ Podcast واللي اسمها كيف تصنع الـ Podcast بسهولة و بأقل التكاليف ... حلقة ممتعة و صغير ة نسبياً (حوالي نصف ساعة) ...
أنا لسه ما عرفش حاجات كتير عن الـ Podcast و لكن إن شاء الله لما أعرف أكثر هبقي أكتب هنا في المدونة و مش بعيد كمان تلاقيني عامل Podcast بصوتي ... وماله ): ...
في حاجة أخيرة عايز أقول عليها و هي إن في Podcast جميل أوي لتعليم الأنجليزية لـ Aj hoge و هي دروس ممتعة جداً و ده موجود علي موقع tweetmic و الرابط بتاعه هنا و ممكن تنزل كل المحاضرات بتاعته و تسمعها ...
موضوع الـ Podcast لسه ما خلصش ...