العربيزية بدون معلم


في Topic عايز أتكلم فيه من زمان جداً فأنا وأنت and All of us كلنا يعني responsible عنه و أنا حاسس فعلاً أنه topic مش simple و لأننا بجد بجد في problem كبير جداً... All over the world دلوقتي بيهتموا بحاجة very important لكل الناس مش بس علشان هما بلاد high level و عندهم -high Technology لا ده كمان علشان هما عايزين يبقوا عايزين from inside أنهم to lead the world و علي كدة هما مش أحسن مننا في حاجة every one have a lot of skills وwe must use it بس الـ problem فعلاً أننا شايفين أننا مش نستحق كده لان الـ problem في الـ government بتاعنا و أحنا لو قعدنا نـ depend علي الـ government في كل حاجة فعلاً مش هنتقدم في حاجة خالص ... believe me

لازم كل واحد from inside يـ decide أنه he will be the change that he wants .. معايا ... otherwise احنا مش هنبقي developed country any way... 
يبقي علشان نبقي بجد very effected to the other people ...لازم لازم لازم نكون قد الـ responsibility دي ... و أحب أقول example علي كده هو the Japanese people مع أنهم ابتدوا الـ development بتاعهم من حوالي fifty years - more or less بس أنا شايف أنهم قدروا فعلاً يحقووا results هائلة و العالم كله بقي بستخدم الـ products بتاعهم ...

يا جماعة تصدقوا أني كنت بكلم my friend في America و قاللي أنا عايز اجي Egypt علشان أركب الـ Camel تصورا أنهم لسوا فاكرين أننا دولة لسة بنستخدم الـ Camel في الـ transportation  ... بجد بجد بجد I can not believe اللي قاللوا ليا ده خالص ... بجد بجد I was shocked لما قال لي الكلام ده ...

علشان كده أنا النهاردة بفكركوا أنكوا لازم لازم لازم أنتوا تكونوا الـ start و ما نستانش حد يقول لنا What to do & When to do ... يا رب تكونوا understand للكلام اللي حبيت اوصلهلكوا و لو أي حد عنده اي comment انا هكون availble علي الـ internet from 8:00 to 90:00 pm
I am waiting for your comments ...
انتهت القصة ... اه كده انتهت ... حد فهم حاجة .. أشك و لكن للاسف معظم الناس بقت بتتكلم كده ... تتكلم 10 كلمات منهم 3 عربي و 7 انجليزي ... طيب ليه ؟ مش عارف ...

طالما اللغة فيها كلمات تفي بالغرض و مهياش مصطلحات علمية يبقي ليه نقول I see و ما نقلش انا فاهم مع ان فاهم ده من صميم اللغة و مش مصطلح علمي مستحدث علشان لو قلته ممكن يكون في ناس مش تفهمه ... ليه أقول I am waiting for you و ماقلش أنا في انتظارك !!! و خد من ده أمثلة كثيرة جداً !!! والكلام اللي في اول التدوينة يفي بالغرض ...

انا في أوقات كتير بستخدم اللغة الانجليزية في كلام انما لو كان فعلاً لمصطلحات علمية أو مواقع أجنبية أشير لها بس مش بستخدمها عمال علي بطال كده و خلاص !! و ساعات كمان بعمل شات بس بكون حريص أن استخدم اللغة العربية او الأنجليزية بس انما الفرانكوا اراب فأنا الصراحة مش برتاح له مع أني بعرف استخدمه كويس و بعتبره مسخ للغة بس ساعات بستخدمه في حدود ضيقة جداً و بحاول ابطله لانه مالوش فائدة ... 

من الحاجات اللي تغيظ بقي أن الواحد لو قال لحد thanks  و نطقها كده sanks  الناس هتعتبره مش فاهم في اللغة و ما يعرفش حاجة و يعقد يقول له طلع لسانك ، انما لو قلت لحد مثلاً خلي عندك ثقة بنفسك و طلعت لساني علشان أنطق حرف الثاء صح تلاقية بيسخر منك مع أن طريقة النطق واحدة  و لو غلط في أي لغة ده مش مشكلة لأنها مش لغتي أصلاً  ، أنما أغلط في لغتي ده اللي تبقي وحشة في حقي ...

في واحد صاحبي كان نفسه يعمل مشروع شايف انه هيكون حاجة جديدة و مش مسبوقة ...
قلت له أيه المشروع ده ؟
قال لي نعمل مجلة تتكتب بالـ arabish  او علشان نكون أوضح  تبقي زي الكلام اللي أنا كاتبه فوق كده بس يبقي العربي مكتوب بحروف لاتينية و الأنجليزي زي ما هو طبعاً ... طبعاً كلام سخيف جداً و أن كنت اتوقع أن تصدر مجلة و لو حتي علي الأنترنت بهذا الأسلوب ... ده أن ما كنتش موجودة أصلاً و أنا مش عارف ! 
أنا خايف في يوم أجي أذاكر مع ابني درس في اللغة العربية و اجي أفتح كتاب اللغة العربية بتاعه ألاقيه  مكتوب فيه 
lo5atona el gamila 
for 1st prep. school
by :- prof/ Ahmed Abd Elfatah & others 

هل ده ممكن يحصل  ...may be  ما فيش حاجة impossible دلوقتي .
انتهي 

لوحات فينسنت فان جوخ


بعض الصور لا تظهر بشكل صحيح في الألبوم أعلاه ، و لرؤيتها يمكن الضغط علي أي صورة و مشاهدة الصور منفرده علي بيكاسا أو لتحميل الألبوم كامل وعدد الصور فيه 124 صورة، يمكن تحميلهم من هنا بحجم 14 ميجا 

عن الطب و الأدب

 أقسم بالله أننى أحبهم جميعاً وأحترمهم لكنها القافية، فقد لاحظت أن عدد الأطباء الذين يكتبون «المقالات» فى الصحف العربية المختلفة أكثر من عدد الأطباء الذين يكتبون «الروشتات»
. كلمة للساخر جلال عامر في المصري اليوم  
سين سؤال :- هي  كلية الطب بيدرسوا  فيها أدب ، لا مش قصدي أن الأطباء تحس كده أنهم ناس محترمين و ولاد ناس أبداًَ و الله ، ما كلنا ولاد ناس،  أنا قصدي هما بيدرسوا فيها فن كتابة القصص و الرواية و الفنون المختلفة خصوصاً الأدب يعني و لا أيه ؟

 أيه السؤال الغريب ده ؟ 

اه ما لازم يكونوا بيدرسوا أدب أو بيعملوا امتحانات أن اللي عايز يدخل كلية الطب لازم يكون كتب رواية قبل كده أو مشترك في مسابقة للقصة القصيرة أو بيعرف يمثل أو يرسم لوحات فنية أو يغني أو يعمل أي حاجة لها علاقة بالفن علشان يقبل الدخول في كلية الطب ... ما هو مش معقول كل الناس اللي متخرجة من الطب/الصيدلية دي و محترفة الفن بالطريقة دي 

عايز امثلة  .. خد عندك 
  • يوسف ادريس \ أديب : طبيب بشري
  • يحي الفخراني \ ممثل : طبيب بشري
  • عزت أبو عوف \ موسيقي وممثل : طبيب بشري
  • فؤاد خليل \ ممثل كوميدي : طبيب أسنان
  • د.علاء الأسواني \ أديب : طبيب أسنان
  • نبيل فاروق \ كاتب : طبيب بشري
  • نزيه \ رسام كاريكاتير : طبيب بشري
  • د.نبيل فاروق \ أديي و صاحب عدة سلاسل كتب للجيب مثل السلسة الاشهر رجل المستحيل و كمان صحفي .
  • د.أحمد خاللد توفيق \ طبيب بشري و كاتب الشباب  الأشهر و يكتب في الصحافة و كاتب روايات و يعتبر أول من كتب في أدب الرعب في مصر و العالم العربي
  •  د مصطفي محمود \ غني عن التعريف طبعاً له الكثير من الكتب الأدبية و المسرحية ده غير الكتب الفلسفية و الدينية ، و برنامجه الأشهر العلم و الإيمان ذو الطابع الثقافي العلمي ، الديني الطبي  تحس أن البرنامج ده بتاع كله ...
  • د.أشرف حمدي فنان الكاريكتور المعروف صاحب مدونة كاريكاطظ ، طبيب أسنان ..
  • د.ميشيل حنا\  صاحب مدونة مستنقعات الفحم و مقالاته الأدبية و السينمائية مالية الدنيا و علي رأي د. أحمد خالد توفيق الكاتب ده أكثر كاتب بتتسرق مقالاته في المواقع الفنية علي النت و هو خريج صيدلية بالمناسبة ...


ده غير الناس اللي أنا متابعها من فترة و مهتمة جداً بالأدب عموماً و الفن خصوصاً عايز أمثلة خد عندك 


  • الرائع : أحمد الديب ... له صفحة علي الفيس بوك و له مدونة جميلة جداً اسمها في النص ، خريج كلية صيدلة ، صيدلية من طب مش مشكلة ، مش فارقة كثير يعني اهو كله منفذ علي بعضه ، احمد كان ماسك صفحة الدكتور أحمد خالد توفيق علي الفيس قبل ما يقرر غلقها و كمان له علاقات مع كتاب كبار أوي و صوره معاهم تدل علي كده ، أدخل علي صفحته و تعرف أنا قصدي ايه ...
  • المدونة اخر أيام الخريف ، صاحبة مدونة بره الشبابيك لها مدونة رائعة برضه ، معظم موضوعاتها تدور في الفنون مرة تقرأ مقال عن زهرة الخشاش لما اتسرقت  و مرة عن الشاعر عبد الرحيم منصور - رحمه الله - و مرة رأيها  في الفيلم الفلاني و الأغينة الفلانية ، الصراحة أن بدخل هناك بتوه ... خريجة صيدلية برضه  ...
  • المدونة د.دودي صاحبة مدون رفايع و دي مدونة تكتب ملخص للكتب التي قرأتها ، بحس أني مش بقرأ حاجة جديدة مع أني بقول أني بحب القراءة  ، معظم قراءتها عن الكتب القصصية  و الرويات  و الصراحة الملخص بيبقي وافي جداً لتقرر قراءة الكتاب  أو لأ  و برضه بدخل هناك بتوه ومش بعرف أكتب حاجة و أمشي و أنا ساكت !! وهي بتدرس في كلية الطب جامعة عين شمس 

أنما ليه الطب خصوصاً بيعمل فيهم كده؟ 

أنا نفسي أشوف كتاب أدبي مكتوب عليه اسم المؤلف و قبليه حرف الـ (م) الجميل ده ، و لو حتي كان مهندس في هندسة الفضاء مش مشكلة ...
في رأيي أن الطب بيعتمد علي الكلام و القص ، يعني وصف دقيق للأعضاء و الأمراض و العلاجات  و بالرسومات ، فبيطلع الطبيب من دول و هو بيعرف يقرأ كتير لأني اتعود أصلا يقرأ كتب الدراسة اللي كلها كتابة و بيعرف يرسم كمان لأنه مطلوب منه يرسم تفاصيل دقيقة في حتة صغيرة جداً في جسم الإنسان ، و امتحانتهم كمان معظمها كتابة و رسم فهو أصلاً متعود علي كده ... 
أنا بتكلم طبعاً علي الناس اللي في طب و لسه بيقراءوا و يكتبوا زي الناس الطبيعية ،بيقرأوا  كتب الكلية و بيذاكروا منها مش علي رأي الدكتور أحمد خالد توفيق ، العصر اللي جي ما فيش طالب علم هيقرأ في كتاب و كل الاعتماد هيبقي علي المذكرات و الملازم ، 
أنما مثلاً طلبة الهندسة هتلاقي عندهم كتاب كبير في التفاضل و التكامل  كله مسائل يا عيني ، و مطلوب منه أنه  يفاضل و يكامل و الكلام كله علي أرقام و علاقات حسابية ، مطلوب منك أنك تقعد ترسم شوية خطوط بالمسطررة الحرف ته " T سابقاً" ، و تعمل منظورو مساقط ، في مواد في هندسة ما فيش و لا كلمة ممكن تتقرأ زي الرسم الهندسي مثلاً أو التفاضل و التكامل كله رموز و مسائل و حاجة تحسسك أنك اله حاسبة ...

شوف طريقة مذاكرة واحد من هندسة كده و أنت تعرف أنا قصدي ايه ، هتلاقي كتب كاملة مليانة أرقام و جداول بيخرج منها ارقام بيستخرج منها حاجات علشان حل مسائل و هكذا ، بمرور الوقت بتبقي كمبيوتر  متبرمج تدخل علي الجدول ده تطلع القيمة دي تستخدمها في المعادلة التانية علشان تتطلع رقم تدخل بيه علي رسم بياني تطلع قيمة منه علشان تعمل حاجة ثالثة و بعدين ترجع تراجع الكلام ده كله و تتأكد ان شغلك صح و اللي غالباً بيطلع غلط ... ههههههههه

حاجة مهمة جداً كمان أن الأطباء بيتعاملوا مع الأحسايس و المشاعر ، بيتعاملوا مع بشر ، يعني هو بيحس المريض ده عنده أيه قبل ما المريض يتكلم و عارف حاسس بالمرض و أنسب العلاجات له مع ان المرض ممكن مشترك بين اثنين أنما العلاج يختلف ...
انما المهندس مثلاً كله تعاملة منع الالات و المعدات من ضواغط و طلمبات و الات ضخ الاسمنت العملاقة و الاوناش و المفاعلات و الضغوط العالية الحرارت التي تصل الي الالاف ، لاخظ أني مش بتكلم علي مهندس الديكور خالص ...ههههههه

و ممكن كمان يكون أن الاطباء مهتمين بالأدب لأن في جناس بين كلمة أطباء و أدباء ، أه يعني الفرق بس في حرف و الطه و الده ( حلوة الده دي) ولاد عم و لو مثلاً واحد بلدياتنا حب ينطق كلمة أطباء و كلمة أدباء مش هتحس بقفرق خالص ... جرب كده  ... أطباء ، ادباء ... زي بعض صح ؟
انتهي 

أيمن المالكي ... ولوحاته الفنية

عندما شاهدت هذه الصور لأول مرة لم أصدق أنها مرسومة ... هي لمصور فوتوغرافي و محترف... لا يستطيع شخص أن يرسم هذه الصور بهذه الدقة ... هكذا قلت لنفسي عندما شاهدتها لأول مرة ... أخذت أدقق أكثر من مرة و لكن في كل مرة تزداد حيرتي ؟...معقولة دي رسومات و مش حقيقة ؟!؟!؟!؟
بحثت علي الأنترنت ووجدت فعلاً أن الصور هي رسومات رسمها الفنان الإيراني الأصل (أيمن المالكي) و أنها ليست صور فوتوغرافية !!



ولد أيمن المالكي في طهران عام 1976 وأحب فن الرسم منذ نعومة أظافره ... و عندما كان في الـخامسة عشر من عمره بدأ في تعلم فن الرسم علي يد معلمه الأول و الوحيد (مورتيزا كاتوزين) وهو من أشهر الرسامين الواقعيين في إيران ومن حينها وهو يرسم رسومات واقعية إحترافية ...
تخرج من جامعة طهران من كلية الفنون قسم تصميم الجرافيك و منذ عام 1998 شارك في عدة معارض فنية وفي عام 2000 تزوج و في عام 2001 أنشأ ستوديو ARA و بدأ في تعليم الرسم معتبراً الطرق القدية و التقليدية ...

ملحوظة:
ترجمة الفنان أيمن المالكي مترجمة من موقعه الشخصي و الصور كلها ماخوذة من الموقع أيضاً

قالوا لا يمكن ... فكان خلاف ذلك

لأني مشغول جداً الفترة دي و الفترات القادمة فستكون التدوينات القادمة تدوينات خفيفة و أغلبها صور ، و سأعيد نشر  بعض التدوينات القديمة التي لم تنل حقها في القراءة ، و أتركم اليوم مع تدوينة صور جميلة جداً بعنون 

قالوا لا يمكن ...  فكان خلاف ذلك  

و حفاظاً علي مجهود الناشر الأول فهي موجودة علي الرابط التالي