كل سنة وأنت طيب يا بيه

هذه التدوينة ليس لها أي علاقة برمضان وليس معني هذا إني مش عايز أقول لكم كل سنة و أنتم طيبيبن في رمضان ...
 أبداً خالص مالص
ولا لأن أنا مش عارف إن رمضان علي الأبواب و بيرن الجرس كمان ...
 أبداً خالص مالص
 و لا لأني أكرة كلمة كل سنة و انت طيب التي تقال في كل الأعياد من أول عيد الفطر و الأضحي و الحب و الكره ، والأم و الأب،  والشرطة والشعب ، وتحرير سيناء وتعمير مارينا ، و لا اعرف سبباً واحد لكل هذه الطيبة المفرطة للمصريين  التي جعلت منا ناس طيبين أوي يا خال علي رأ ي عادل إمام

 أبداً خالص مالص
 و لا لأن الطيب في الزمان بيقولوا عليه عبيط 
 أبداً خالص مالص
كل هذا لم يحرك في ساكناً لكتابة هذه  التدوينة أمال بكتبها ليه يعني غلاسة ؟!   
 أبداً خالص مالص
لأ أنا بس حبيت أحكي قصة أظن أنها لطيفة و أهي هتبقي ذكري و نقول عشنا لنا يومين و بعدين بقي أحنا هننهرج أنا هكتب أهو بجد  D: D: 
أنا من يومين بالظبط كنت في محطة الرمل و كنت قاعد باكل عند محمد أحمد  اللي بحس ساعات أنه  هو اللي دخل الفول إلي الإسكندرية -  أيام حكم البطالمة - من شهرته في الفول و الفلافل في الإسكندرية !!!
طيب عادي يعني باّكل ايه المشكلة ما فيش مشكلة و لا حاجة و ربنا ما يجيب مشاكل الموضوع و ما في أني  و أنا باكل لاقيت الراجل اللي بينظف الشارع مشكوراً مأجوراً جايب لي قزازة  مياة ساقعة يبدو للوهلة الولي- حلوة الوهلة الأولي دي-  أنها نظيفة جداً و شكلها كده معدنية لان دي البلاستكة اللي بتبقي متبرشم بيها القزازة لسه عليها !!! 
أنا استغربت جداً ليه تديني مية ساقعة و جايبها منين دي و الغريبة أني معايا قزازة مياة في الشنطة اصلاً كمان اللي ممكن تستغرب له أكثر ان في كولدير جنبي  بحوالي 3 متر...
الموضوع وما فيه أن الراجل ده قال لي كل سنة و أنت طيب  و انت لما تسمع الكلمة دي يعني لازم تطلع فلوس يا صديقي 
يعني بتركن العربية بتاعتك و الراجل عمال يقولك هوب هوب باااااااسسس و يقولك كده تمام و كل سنة و انت طيب و هكذا بقي و ابقي شوف الفديو اللي عاملة لورانس العرب هيلخص كل الي عايز اقوله 
اللي عاجبي في الراجل ده أنه فكر شوية و بقي بيقول كل سنة و انت طيب بذكاء مش زي  الناس التانية يعني الراجل ده جاب القزايزمن مطعم محمد أحمد و بدل ما يرميها في الزبالة و خلا ص ، لا راح نظفها و ملاها من الكولدير و أدي  حضرتك خدمة و خصوصاً و أنت في الحر كده يبقي فعلاً راجل بيفكر ...
راجل زي ده ما تستخصرش فيه حاجة ، كفاية أنه تعب في الموضوع  ملو المياة ده و اللي عاجبي أكثر انه كان راجل مش رخم وواقف لك يقعد يقولك كل سنة و انت طيب كده باستفززاز ...
هو بيقد م لك خدمة لو  عايزها أهلاً  وسهلاً مش عايزها خلاص يا عم ما حدش ضربك علي أيد ك، فعلاً الرجل ده دخل دماغي و قلت يا ريت الناس تتعلم منك و الله 
صحيح كل عام و أنتم بخير و صحة و سلامة بمناسبة رمضان 
معلش مش هقول لكم
 كل سنة و انتم طيبين
اصلها بتتعبني نفسياً 

ســـــــــــــــلام 

هناك ٤ تعليقات:

عابرة السبيل يقول...

طيب انت شربت الميا؟
ولا كسرت بخاطر الراجل فى عز الحر ده

طيب والله احنا محتارين هنا على فول عشان السحور
ابعتلى سندوتشين وعلبه مخلل
وياسلام بقى لو علبتين وبادى وخيارتين يبقى كتر خيرك
كل عام وانت بالف صحه وسلامه
وشكرا للزياره

اللهم بلغنا رمضان وبارك لنا فيه

سكندري يقول...

أهلاً عابرة سبيل

لا و الله ما كسرتش بخاطر الراجل بس سيبت له المياه علشان يسترزق بيها تاني D:

أنا فهمت من مدونتك ان حضرتك في استراليا و لو عايزة فول و زبادي نبعتولك و مالة (: (: بس كله بفلوسه

Tarkieb يقول...

انا اعرف واحد معاه مقشة وما بيتحرك من مكانه بقاله يجي عشر سنين واي حد يهوب منه يقوله كل سنة وانت طيب ..اللي بيعرفه بيطنشه ...والجديد بيظرفه...كل سنة وانت طيب وكل فازلينستان ههههههههههههه....

سكندري يقول...

هههههههههه
هو فعلاً كتير شوية اليومين دول
كتير شوية دول كتير اوي

بس ممكن انت برضه ترد عليه و تقول له
و انت بالصحة و السلامة و تسيبه و تمشي

شرفتني بتعليقك