مساؤي الأنترنت

كتبت هذا الموضوع منذ أكثر من 3 أشهر و أظنه مهم الأن لإعادة النشر ... يا رب يعجبكم
هو الواحد المفروض يبص علي نص الكوباية المليان زي ما بتوع التنمية البشرية بيقولوا كده و يكون العنوان (مميزات الأنترنت) بس أنا فعلاً عايز أتكلم عن مساؤي الأنترنت لأني واحد بقعد علي الأنترنت لفترات طويلة جداً ... دا أنا عايز أخترع طريقة تخليني أونلاين و أنا نايم !!!
المهم بقي أيه هي مساؤي الأنترنت في نظري مع أنه عامل ثورة في كل المجالات يعني أي معلومة عايزها تقدر تدور عليها و تجيبها و ببلاش في أغلب الأحيان وإن ما كنش الـداتا دي فعلاً مجانية فهي(مسروقة) فمثلاً لو عايز برنامج وهو مش مجاني أكيد هتلاقي نسخة من البرنامج ده مسروقة (أيوة اسمها مسروقة مش مضروبة خلينا نعترف أنها مسروقة) وكمان موجود معها الكراك بتاعها و كل حاجة تمام ما عليك إلا أنك تحمل البرنامج ده وتبدأ تستخدمه و لومش عارف تستخدمه هتنزل كورسات تعليمية (مسروقة) و تتعلم أو كتب تشرح البرنامج ده و هي كمان (مسروقة) المهم أنك هتستخدم البرنامج 
أما الترفيه بقي فسهلة جداً شوف الفيلم اللي أنت عايزه و دور عليه في جوجل و نزله من أي موقع أفلام  وكمان هتلاقي الأفلام الأجنبية و مترجمة ... يعني مافيش أحسن من كده ...
أما بقي لو أنت بتحب التواصل مع أصحابك فمفيش أكتر من المواقع الأجتماعية اليومين دول فيس بوك و تويتر و زروبيا و جود ريدزو لنكد إن و.. و.. و .. القائمة لا تنتهي و كل موقع أجتماعي له تخصص معين يعني لو عايز تجمع أي حد تعرفه هتستخدم الفيس بوك ولو هتجمع الناس اللي بتحب تقرأ يبقي الجود ريدز لو هتجمع الناس اللي في مجال عملك يبقي لينكد إن و لو حابب تدون تدوين مصغر يبقي عليك و علي تويتر .. أياً كان هوايتك و اختصاصتك هتلاقي الموقع اللي يناسبك ...
أما بقي الايميل فأنت ممكن تبعت لأي حد رسالة ببلاش ... ممكن تبعت إيميلات لشركات لو كنت بتدور علي شغل أو تبعت عليه ملفات مهمة لصديق أو تبعت رسالة لجروب بتحب المجال بتاعه أو تتابع جديد المواقع اللي بتدخلها علي طول ...
أما بقي الشات فممكن تكلم واحد في فرنسا صوت و صورة و لا تدفع مليم و تكلم ناس بلغات تانية لو حابب و تتواصل مع الناس و تكلم صحابك اللي بقالك سنين ما شفتهمش
و كمان ممكن تخزن الملفات المهمة في مواقع الرفع و تتطمن عليها أنها مش هتضيع لأن لو جهازك حصل له حاجة مش هتعرف ترجع الحاجات المهمة دي ...
و كمان ممكن تعرف أخر الاخبار في الوقت اللي بتحصل فيه و كمان ممكن تتعلم أي حاجة جديدة ببلاش يعني النت كله مميزات و مفهوش عيوب أهو و بكده يبقي بصينا لنص الكوباية المليان زي بتوع التنمية البشرية ما بيقولوا ...
امال أيه بقي الكلام اللي أنا كاتبه في العنوان ده!!!؟؟؟!!!
مساؤي الأنترنت
أيوه أنا اقصد مساؤي الأنترنت ... النت في عيوب كتير جداً منها
1- اللنكات
يعني مثلاً تصور حضرتك دخلت علي الويكيبديا و حبيت تقرأ مقال معين في حاجة حابب تتعرف عليها ... كل اللي عليك أنك تتدخل علي الويكيبديا وتبدأ تبحث عن الحاجة اللي هتقرأ فيها و بعدين تقرأ ...كل سطر تقريباً هتلاقي فيه من 4 إلي 5 لنكات يعني الصفحة الواحدة ممكن تصفي لها علي 50 لنك ده لو كان الموضوع صغير و طبعا كل لنك من دول يفتح لك صفحة تانية ودي فيها مئات اللنكات و هكذا ...
الكلام ده مش في الويكيبديا بس ، ده في النت كله يعني مثلاً حضرتك فاتح الفيس بوك هتلاقي واحد حاطط مقال وعلشان تكمل المقال لازم تدخل علي اللنك علشان تعرف بقية الموضوع أيه ؟ ... وواحد تاني حاطط صورة و علشان تتفرج علي كل الصور لازم تفتح اللنك وواحد كمان حاطط فيديو و بعد ما تتفرج علي الفيدو هتلاقي لنك في الفيديو علشان تشوف الفيديوهات المشابه و الموضوع مش بينتهي ...
2- التشتت
يعني أنا مثلا ...و أنا شغال علي الأنترنت بكون فاتح بتاع 5أو6 tabs يعني لازم الفيس بوك و تويتر والياهو و اليوتيوب و أي حاجة بقرأ فيها كمان ...ليه بقي؟ ... أفتح الفيس بوك أكتب حاجة أوأكتب تعليق أوأشوف فيديو وبعدين أشغل اليوتيوب علي حاجة معينة و أسيبه يحمل وأشوف أخر التحديثات في تويتر و الياهو بقي أشوف أخر الرسايل و أكلم واحد في الشات و أبعت رسالة لواحد و.. و.. و القائمة لا تنتهي 
كل ده بيشتت و بيخليك مش عارف تفكر في أيه ولا في أيه هو ده اسمه multi-task بس الموضوع مش صح و لازم الواحد يركز في حاجة واحدة يخلصها و بعدين يشوف اللي بعدها أنما للاسف النت بيعلمك كده و أظن أن أغلب مستخدمي الأنترنت بيعملوا كده
3- دايماً في جديد
من عيوب الأنترنت أن كل ثانية في حاجة جديدة بتحصل وعلي الأقل إن ما كنش جديد للناس كلها ففي جديد لك أنت ....يعني خبر أول مرة تشوفه و حابب تشوف في أيه و كل حاجة بقي فيها جديد دلوقتي لدرجة تخليك تفتح بقك وأنت قاعد قدام الأنترنت و مستغرب ..هي الحاجات دي كلها حصلت و أنا نايم طيب بعد كده مش هنام وأقعد أتابع بقي ... حتي لو عملت كد مش هتقدر لازم يبقي في حاجة جديدة حاجة أنت ما تعرفهاش لازم ... لازم... ما تشغلش دماغك بالموضوع ده و اكتفي بالقدر القليل...
4-المعلومات العشوائية
يعني كل شوية في معلومة جديدة في حاجة معينة ده تخليك حاسس أنك تعرف حاجات كثير و أنت للأسف مش عارف حاجة ...الموضوع ده كان أحد الكتاب قال عليه (جلال أمين في كتابه التنوير الزائف) لأن الواحد كل شوية بيعرف معلومة ...مرة معلومة علي شكل صورة ومرة علي شكل فيديو والأكثر علي شكل نص...
مرة في موضوع عن السياسة و مرة عن الدين ومرة عن الفن ومرة عن الأقتصاد ومرة عن أخبارأصدقائك ... كل شوية في خبر مختلف ...
5-جوجل
رغم إن جوجل يعتبر ثورة من ثورات هذا الزمان و الأزمنة كلها كمان إلا أنه كارثة من كوارث الزمن برضه ... يعني أيه اللي تدور عليه هتلاقيه ؟؟؟!!!؟؟؟ يعني لو حابب يجيب لك لبن العصفور هيجيبه ... ما عندوش حاجة اسمها لأ ... أنا بحس و أنا داخل جوجل أني بدعك الفانوس و هيجي موظف من جوجل يقولي شبيك لبيك جوجل سيرش أنجن بين أيديك ... أطلب و أتمني و أنا اقول له ... أنا عايز أعرف عن لبن العصفور يروح هو رادد عليَ و يقول لي عايز عنه مقالات و كتابات (جوجل ويب) ولا عايز صور(جوجل صور) و لا عايز فيديو للعصفور وهو بيرضع ابنه (جوجل فيديو) ولاعايز أخر أخبار لبن العصفور(جوجل أخبار) و لا عايز تشتري لبن العصفور(جوجل شوبنج) و لا عايز كتب عن لبن العصفور(جوجل بوكس) ولا عايز مقالات علمية عن لبن العصفور(جوجل سكولارشيب) و لا عايز مجموعات بتتكلم عن لبن العصفور(جوجل جروبس) و لا مدونات بتتكلم عن لبن العصفور(جوجل بلوجس) و لا حابب تبعت كل اللي بحثت عنه ده في ايميل الي لبن العصفور@ جيميل و لا ايه؟؟؟؟!!!؟؟؟
طبعاً انا لازم اختار اختيار واحد و بعدها هيطلع لي جوجليون صفحة و يقول لك أنا بحثت ودورت و مش عارف أيه اللي هيناسبك؟ ... شوف أنت بقي !! ...أنا ماليش دعوة بس أقولك الصفحة الأولانية دي كويسة و لوعايزني أدورلك أحسن شوية بقي أنا تحت أمرك يعني ممكن تدور عن لبن عصفور ألماني و يكون لونه بني وحجم الصورة بتاعته 300*400 ميجا بكسل .... خلصني بقي ما كنتش صورة... طيب طيب خد الصورة دي
و في الأخر قبل ما يمشي يقول لي علي فكرة أنت لسه قدامك جوجليون (1 و علي يمينة 100 صفر) محاولة للبحث .. أدعك أنت الفانوس و ملكش دعوة ... شكراً لاستخدماكم جوجل سيرش انجن !!!
6-عيني عليك باردة
وطبعاً حضرتك لما تقعد علي الأنترنت كتير يعني بتقعد قدام شاشة كمبيوتر كتير وده مفهوش كلام خطر علي عينك جداً و لو مش مصدق روح أكشف نظر دلوقتي هتلاقي نظرك ضعف جداً يا ولداه و لازم تلبس نظارة لو ماكنتش لابس و أو تلبس نظارة قعركوباية لوكنت لابس نظارة عادية ... معظم اللي بيستخدموا الكمبيوتر و الأنترنت عامة لفترة طويلة نظرهم ضعيف و بيلبسوا نظارات ...
7-RSI
وده اختصار لمرض معروف اسمه repetitive strain injury وده معناه أن أيدك من كتر القعدة الغلط اللي علي الجهاز تلاقي أيديك بترتعش كتير و مش علي بعضك .. حاجة كده زي مرض الرعاش ... اللهم احفظنا .. وده لأننا مش بنسخدم الكمبيوتر أصلا صح ونعرف نقعد صح علي الكمبيوتر و أزاي نستخدم الكيبورد و الماوس و الي بكتب علي الكيبورد وهو نايم و اللي بيحط الماوس علي رجله و حاجات غرييب كده ...
8- تضيع وقت
ودي بقي مفهومة ومعروفة و مش لازم أتكلم فيها ... أنت تقعد علي الكمبيوتر من هنا و تلاقي الوقت بيعدي هوا و مش بيتحس به ... طيارة ... لو عايز أنت تضيع وقت و مش عارف تعمل أيه ؟!؟ أدخل بس علي الشات و كلم واحد صاحبك و التاني يدخل و التالت يكلمك في حاجات كتير غالباً ملهاش لازمة و بعدين تبص في ساعتك تلاقي الوقت جري فجاءة وخلاص الفجر هيأذن !!!
أو أدخل علي اليوتيوب و أكتب (أي حاجة في مربع البحث هتلاقي نتائج كتيرة جداً و أنت بس أدخل علي واحد منهم و متسألش بعد كده الباقي أيه ... كل حاجة تحت السيطرة جوجل مجهز لك Realted Videos حسب كلمات بحثك و الكلمات الموجودة في الفيديو اللي بتتفرج عليه حالياً و من فيديو لفيديو لفيديو ... اليوم خلص ...
9-فساد الدين
و مفهوم طبعاً أنا قصدي أيه ... يعني المواقع الأباحية بقت علي قفا من يشيل و اللي ميبعرفش يتحكم في نفسه قدام النت قول عليه يا رحمن يا رحيم ... عدد الصفحات الأباحية بقي بالملايين أخر أحصائية كنت قريتها بتقول أن عدد الصفحات الأباحية علي الأنترنت 4.2 مليون صفحة !!! والواحد منا معرض للصفحات دي بكثرة أثناء البحث في جوجل أو في الأعلانات المنتشرة في كل حتة ...
حاجة تانية خطيرة وهي الأفلام الأجنبية (والعربي كمان) اللي بقت للكبار فقط و كلمة للكبار فقط بقي معناها أنها تحتوي علي مواد اباحية أو مواد عنف وفي الأغلب أنها تحتوي علي مواد أباحية وبفضل النت الموضوع بقي سهل جداً و كل الناس بقت تعرف تجيب الأفلام دي بمنتهي السهولة و البركة في مواقع الأفلام اللي لا ترقب في مؤمن ألا و لا ذمة وبقت بجاحة عيني عينيك يعني تلاقي الشخص اللي حاطط لك الفيديو كاتب بالبنط العريض كده ... الفيلم للكبار فقط و لا يصلح للمشاهة العائلية ...وواحد يقوله جزاك الله خيراً أخي مش عارف مين و الله ما قصرت !!!!
حاجة تانية من تضييع الدين وهي ترك الصلاة المفروضة لأن االلي قاعد علي الأنترنت غالباً بيبقي مسطول و مش حاسس بالوقت والوقت بيمر هوا و دي طبعاً يودي أنه يترك الصلاة ...
اللهم أعني علي ذكرك و شكرك و حسن عبادتك ... اللهم أمين
10-Copy & Paste
وهنا طبعاً أقصد أن المحتوي بيتنقل بالنص من موقع للتاني و بالتالي مافيش إبداع او حقوق ملكية فكرية و لا حاجة و تلاقي الموضوع ده مشهور أوي في المنتديات العربية ( أن حاسس أن كل واحد بقي له منتدي خاص به) و بالتالي تبحث في جوجل علي حاجة معينة تلاقي الموضوع متكرر 100 مرة و تحت الموضوع يكتبوا (منقووووووووول) ده لو كان عنده كرامة ...
أما بقي أغلب اللي بينقل ما بيقولش أن الموضوع منقول و كان سيادته هو اللي عامله و بالتالي تلاقي الموضوعات كتيرة علي الفاضي و ده اللي أدي أن المحتوي العربي يسبب مشاكل لجوجل في البحث لأن الصفحات متشابهة
كمان المحتوي العربي علي الأنترنت بقي قليل جداً لو قارناا للغة العربية مع اللغات التانية زي الانجليزية والألمانية مثلاً ...
أنا كده قلت 10 مساؤي للأنترنت يعني ... تلك عشرة كاملة
انتهي

هناك 6 تعليقات:

amr awwad يقول...

موضوع جميل جدا
وبالفعل دى مشاكل النت
بس ما باليد حيلة من الصعب تلاقى اسم يشدك ومتدخلش تدور فيه

انا مثلا ممكن اتسحل على النت بالعشر ساعات متواصلة لدرجة الكمبيوتر ساعات بيفصل لوحده ويحلف 100 يمين مهو مشتغل غير لما يريح ساعه ولا حاجة

وعلى شرط مبيبقاش بايظ فيه اى حاجة لا هو شايف انه لو مريحش شوية هيضربنى او يولع فيا او يعمل عمليه انتحاريه وينفجر واروح انا وهو فى الكازوزه

وفعلا النظر راح والوقت بيضيع

بس الواحد على قد ما يقدر بيحاول يمنع نفسه من النت

لانه بالفعل مغارة بـ باب واحد لو دخلت من الصعب تخرج

ولكن الله هو المعين

والمحتويات العربية فعلا حاجة تغيط بس انا بحترم بتاع منقول وخصوصا لو ناقل موضوع محترم وليه لزمه

اخر حاجة عايز ارد عليها هو موضوع جوجل وهو بلا منازع نكستى الكبرى

انا ممكن بكلمة بحث واحد اقعد 5 ساعات ببص على نتائج البحث وفى الغالب كمان مش بقرا 1 على مليووووووون منها

ارحمنا يا رب

عابرة السبيل = ام بقلظ باشا يقول...

سلام عليكم

لا بقى مالكش حق
يعنى لولا النت ده كان زمانك قاعد على القهوة عمال تصرف فى مشاريب وفلوس وترجع البيت الوالد والوالده مايرحموش التعب اللى باين على وشك من كتر الرغى بره مع صحابك

لكن النت مافيش احسن من كده
بابا وماما يدخلو ينامو وانت طبعا قايلهم نص ساعه بس وداخل انام .............................
وتصلى الفجر كمان وتدخل تنام
فى حاجه احسن من كده ؟
بابا يفرح طبعا انك كنت صاحى عشان تصلى الفجر

وبعدين لو على التشتت مقدور عليه
افتح موضوع موضوع واقرا بتركيز هتلاقى الوقت عدى اسرع وعرفت تجمع معلومتين مالهومش اى علاقه ببعض

شفت بقى ان النت مش كله عيوب ازاى؟
دايما ظالمين الناس كده

سكندري يقول...

##amr awwad##

أهلاً بيك يا عمرو منورني دائماً في المدونة المتواضعة دي ...

النت مغارة بـ باب واحد لو دخلت من الصعب تخرج ...

اهو زي ما أنت قلت كده بالطبط بس هنهمل ايه بس ؟

لازم برضه نقعد علي النت كتير و النظر يروح و الوقت يروح، و جوجل افندي يطلع لنا لسانه قبل ما ننام و يقول لنا ، ابقي تعالي كل يوم يا صديقي ، انا مستنيك هه هه هه هه ...

و بالنسبة لبتوع منقول فعلاً بيبقوا محترمين في كثير من الأحيان بس أصلاً في منتديات قائمة علي الشكل ده ، أنه ينقل الموضوعات من الأخريين

انا بحترم اكثر بقي اللي يعمل موضوع و حاطط اللنك بتاع الموضوع الأصلي سواء مدونة و لا موقع في الموضوع يبقي كده هو واد عمل التمام

سكندري يقول...

##عابرة السبيل = ام بقلظ باشا##

و عليكي السلام يا فندم D:

أنا بصيت لنص الكوباية المكسور أقصدي المليان و بعدين قلت بقي المساؤي اللي انا شايفها في الأنترنت
هو أحنا أصلاً نقدر نعيش من غير النت اليومين دول

أبداً أبداًُ بلوبيف مي بلوبيف مي
D :D:

و بعدين هما الصراحة ما عدوش بيسألوني أنت هتنام امتي ، تقدري تقولي السؤال معدش له لازمة اصلاً ...

ما أنا كده كده ما بنامش ألا لما أكون مش قادر افتح عيني أو النت يفصل D :D:

وموضوع النص ساعة ده قليل قوي علي فكرة

شرقتيني جداً بزيارتك

سكندري يقول...

##عابرة السبيل = ام بقلظ باشا##

و عليكي السلام يا فندم D:

أنا بصيت لنص الكوباية المكسور أقصدي المليان و بعدين قلت بقي المساؤي اللي انا شايفها في الأنترنت
هو أحنا أصلاً نقدر نعيش من غير النت اليومين دول

أبداً أبداًُ بلوبيف مي بلوبيف مي
D :D:

و بعدين هما الصراحة ما عدوش بيسألوني أنت هتنام امتي ، تقدري تقولي السؤال معدش له لازمة اصلاً ...

ما أنا كده كده ما بنامش ألا لما أكون مش قادر افتح عيني أو النت يفصل D :D:

وموضوع النص ساعة ده قليل قوي علي فكرة

شرقتيني جداً بزيارتك

Tarkieb يقول...

بالنسبة لحكاية منقول دي في ناس بتنقل الحاجة بعد ما تتنشر بثواني والغريب الرد والتعليق على الصورة بيكون اكتر من الاصلي...الكراكات كلها برامج تجسس وبتبطئ الجهاز بس مجبرا اخاك لا بطل....اشهر سؤال بيسأل في مصر هو تركيبة الحشيش ....وغالبا بيجو عندي عشان عندي فيديو السادات بتاع الحشيش...اكيد جوجول عارفة الشعب المصري بيفكر في ايه من تحليل اسألته؟