الغتيت

في كل مكان تروحه لازم تلاقي واحد غتيت يعكر عليك صفوتك ويقرفك و يكرهك في عيشتك و دول بقوا في كل حته وفي أي مكان و اقصد بالغتيت هنا هو الرجل اللي بيكون قاعد جنبك في مكان ما أنت بتروحه يعني هتلاقيه في مكان أنت بتتضطر تقعد فيه جنب حد مثلاً 
  • علي البحر
  • في محاضرة  
  • في أي وسيلة مواصلات 
  • في السينما ، المسرح أو حتي قدام التلفزيون 
  • علي القهوة لما تتفرج علي ماتش كورة 
  • في المسجد






    وتعالي نمسك واحد واحد منهم كده و نقول شكل الغتاته بيبقي عامل أزاي،يلا بينا عزيز القارئ 
    علي البحر 
    كنت علي البحر من يومين قاعد كافي خيري شري و قاعد علي اللسان اللي هو جوة البحر و كانت الساعة حوالي 9 الصبح - و متسألنيش أيه اللي صحاك بدري كده مش عارف و الله - بس قلت أروح اقعد علي البحر شوية و البحر كان جميل و الجو صافي و الحياة حلوة (:
    و قاعد أنا مبسوط أوي بالفرجة علي الناس الي بتصطاد سمك وعلي البحر الجميل ده لاقيت واحد جه قعد جنبي 
    هو: السلام عليكم 
    أنا: وعليكم السلام 
    هو: البحر حلو أوي النهاردة 
    أنا: اه فعلاً البحر جميل .. هو أنا أعمي  ما أنا عارف أنه حلو و الله ( في سري طبعاً)
    و كان في ناس في البحر دخلت جوة أوي قام صاحبنا قال لي 
    هو:الناس دي دخلت جوة أوي 
    أنا: أكيد بيعرفوا يعوموا ما تقلقش 
    هو: دول كده ممكن يغرقوا 
    أنا: ما تقلقش يا حاج شكلهم بيعرفوا يعوموا كويس 
    أنا: (في سري) يا عم هما هبل ما هم معاهم عوامة اهو و شكلهم بيعرفوا يعوموا كويس 
    هو: هو أنا ممكن انزل علي الصخر ده علشان أشـ؟ (تييت) حذفت من رقابة المدونة 
    أنا: ما بصلتوش و قلت له: لأ طبعاً  ... روح أي كافتيريا هتنزل أيه بس !!! 
    في محاضرة 
    من يومين كنت في مركزالأبداع و كان موجود  د. زاهي حواس بيتكلم  عن مصر بين الماضي والحاضروالمستقبل ، كانت محاضرة حلوة بالمناسبة 
    المهم جه واحد قعد جنبي و د. زاهي كان بيقول أنهم بيفكروا يعملوا متحف مائي في الإسكندرية عند قلعة قايتباي و هو ما سمعش 
    هو: أيه بيقول أيه ؟
    أنا: بيقول أنهم عايزين يعملوا متحف مائي عند قلعة قايتباي 
    هو: ما ينفعش ده المياة معكرة هناك من الصرف الصحي ، أزاي يعني ما ينفعش 
    أنا: (في سري ) طيب أنا مالي أنا ما تروح تقولهم هو أنا مديرمكتب زاهي حواس و لا أيه ما توجعش دماغي 
    كان في سؤال جي للدكتور بيشتكوا من أن الاثريين في الاسكندرية بيعانوا من المركزية في التعامل في اي حاجة يعني أيه حاجة لازم يأخذوا الموافقة عليها من مصر، د. زاهي مشكور قال أنه هيطلع قرار يلغي المركزية دي بالنسبة للإسكندرية وأي  أوراق تطلع من الإسكندرية علي طول و تصفيق حاد بقي و بتاع (: (:
    هو:(بصوت عالي) : يا رب يصدق بس ، أهو كلام و خلاص !!!
    أنا : يا عم ريح بقي أنت خنقتني أنت اصلاً مواطن عادي يعني مالكش دعوة بالاثار و لا بشغلهم أنت جي تسمع محاضرة و خلاص (في سري طبعاً)
    د.زاهي كان بيتكلم علي سرقة الاثار المصرية 
    هو: أصل البلد منهوبة في كل حاجة احنا مش عارفين نحافظ علي حاجتنا 
    أنا: يا عم ارحمني بقي 
    الحمد لله المحاضرة أنتهت 
    أي وسيلة مواصلات 
    تيجي أنت تركب وسيلة مواصلات منهنا تلاقي اللي جبنك لازم يكون إنسان غتيت 
    هو: البلد بقت زي الزفت و الحاجة مولعة نار 
    أنا: (في سري) يعني أنا وزير المالية و لا أيه و لا عايزين أعمل مش فاهم و (مش في سري ) اه و الله الحاجة بقت غالية جداً هنعمل أيه بس D: 
    أنا: عندي ثلاث عيال مطلعين عيني 
    أنا: ( في سري) طيب أنا اتبني واحد فيهم  ولا أيه ؟ و (مش في سري) ربنا يعينك عليهم يا حاج ...
    هو: أصل دي حكومة بنت ؟؟؟؟ تيييت (حذفت من رقابة المدونة)
    أنا: ابتسامة صفراء علشان ما فيش كلام أقوله ...
    هو : وعمالين يغلوا علينا الأكل و الشرب ، كل حاجة في البلد دي بتغلي إلا الإنسان ، المصري ما عدش له قيمة لا في بلدة و لا بره بلده !!! و يقعد يمصمص في شفايفه!! 
    أنا: (في سري) خلاص يا عم الحاج أبقي اقلب تمساح في غانا و ريحني ...
    و في المواصلات برضه في نوع غتيت جداً اللي بيراقبك في كل حاجة أنت بتعملها خصوصاً لو ماسك جرنان يقعد يبص لك فيه و كأنه بيقولك ما تديني شوية كلام أقرأهم 
    و مرة واحخدة يقولك 
    هو: هو الماتش الساعة كام النهاردة؟؟ 
    أنا: الماتش مش النهاردة ده بكرة 
    هو: اه الساعة كام بقي؟ 
    أنا: أكيد الساعة 8:00 زي ما الماتشات كلها ما بتتذاع 
    هو: ده هيبقي ماتش مالوش حل ، و هنكسب بعون الله 40 - صفر !!!!!
    أنا:(في سري) ارحمني بقي  و سيبني اقرأ كلمتين 
    في السينما ، المسرح أو حتي قدام التلفزيون 
    هو :أنا شفت الفيلم ده قبل كده ، ده فيلم جامد جداً (مع حركة للرأس إلي الأمام حركة اليدين إلي الأمام)
    أنا : اه فعلاً سمعت أنه فيلم جميل و(في سري) اسكت بقي خليني أعرف أتفرج
    هو: أنت عارف أحمد حلمي ده رهيب أفلامه جميلة أوي 
    أنا: اه اه فعلاً عندك حق ...
    هو: بص بص الحتة اللي جاية دي جامدة  جداً و بيقعد يضحك 
    أنا:ما حطتش في دماغي و حاولت اتفرج علي أي حاجة في الفيلم و أحاول استعد للضحك لأن الاخ اللي جبني بيضحك 
    هو: نهايته حزينة أوي الفيلم ده 
    أنا: يا عم أرحمني بقي هو أنت حد قالك أني مش شايف يعني ما عارف أنه حلو و بيضحك و نهايته حزينه خلاص بقي





    • علي القهوة لما تتفرج علي ماتش كورة 
    هو: باسي(يقصد Pass) بقي لأبو تريكة ما فاضي أهو و انفراد و يلا جون (قال يعني الللعيب سامعه) 
    هو: حكام ولاد  ؟؟؟ تيييت (حذفت من رقابة المدونة) تلاقيه قابض من الفريق التاني 
    هو: طيب بالله عليك ده شوطة دي دا أنا لو جبت عيل من اللي بيلعبوا  في الشارع هيشوط أحسن منهم و في الاخر يأخدوا هما ملايين و أحنا بس نحرق في دمنا 
    هو :أنا  قلت أصلاً من زمان أني هبطل اتفرج علي متشات 
    في أثناء الكلام الكثير بتاعه ده دخل جون 
    هو: جووووووون ايوة كده فرحتونا بس جت متأخرة، يلا بقي حافظوا علي الجون و ماتضعوش الماتش 
    هو: أنت عارف أنا لو مكان المدرب أنزل فلان الفلاني ، أصل الواد علان العلاني!!!  ده مالوش فيها وهو مش لعيب علي فكرة أنما الواد فلان الفلاني  ده جااااااااامد ، هو ينزله بس و الماتش يخلص دلوقتي و ننكسب ...
    في نهاية الماتش 
    هو: دا أحنا قطعناكم 
    أنا: (في سري) أنتوا مين؟؟؟!!
    هو: دا أنتو المفروض ما تلعبوش كرة تاني 
    أنا: (في سري) أحنا مين ؟
    المسجد 
    في المسجد يقعد جنبك واحد غالباً بيكون راجل كبير و شعره ابيض و ساند علي الحيطة !!! والشيخ بيخطب أو يقول درس 
    هو: قول يا عم الشيخ قول يا رب الناس تسمع و نتفذ ...
    هو: الله ينور عليك يا شيخ ...
    هو:ربنا يزيك من نعيمه يا شيخ ...
    ده غير طبعاً مصمصة الشفايف اللي بتبقي بعد كل جملة من دول 
    كفاية كده بقي علشان ما ابقاش غتيت أنا كمان 
    سلام 

    هناك 11 تعليقًا:

    آخر أيام الخريف يقول...

    حلوة قوى قوى قوى ....انت ساخر عظيم با إبنى

    Hema .......ibrooo يقول...

    begaaaaad gamdaaaaa gedaaan we kaman be teblower el core beta3 el 3'atet fe3lan

    حَـبآيـۃْ.بـטּـدۉڷ يقول...

    هههههههه .. على كده انا غتيته درجه اولى .. والله انت خلقك ضيق شويتين ..

    ايه يعني لما واحد يفتح معاك حوار فـ المكروباص .. يعني الراجل يموت من الكبت !!

    والراجل بتاع السيما ده حرق عليك الفيلم .. كان ممكن تولع فيه اسهل ..

    اما القهوة بقى .. انت اللي جبته لنفسيتك .. يعني حد يسمع ماتش على القهوة ؟ اهي ملكيه عامه بقى .. والراجل اللي كان قاعد ده أهون ماللي عندنا .. اصل احنا عندنا متعصبين جداً بعيد عن السامعين :)

    تدوينه جميله جداً .. :)

    سكندري يقول...

    ## أخر أيام الخريف##
    متشكر جداً لاطراء حضرتك ،دي حاجة كده في الكلتش ، علي الماشي يعني ، أنما عظيم ده كبيرة عليا أوي D: D:

    سكندري يقول...

    ##Hema .......ibrooo
    أزيك يا هيما أبوس أيدك،أبوس أيدك بطل تتكلم لغة عربية فصحي بالArabish يا تتكلم عربي يا تتكلم أنجليزي
    أنما تتبلور و الـ Core هههههههه
    شكراً علي مرورك
     

    سكندري يقول...

    ## حَـبآيـۃْ.بـטּـدۉڷ##
    أنا خلقي ضيق ممكن بس في أوقات بنكون عايزين نقعد من نفسنا ، لحظة اسمتاع ، لحظة راحة ، لحظة تركيز أنما اللي أنا حكيت عليه ده الواحد لازم يتخنق بجد يعني

    شكراً لمرورك

    ملحوظة انا هرجه الـ comment Moderation لاني مش عارف مين بيعلق و امتي و أنا كده بنشر كله ألا لو كان سبام طبعاً
    نلقاكم في التدوينة القادمة

    سلام

    Lionel Messi يقول...

    بجد بجد موهوب الموضوع جامد جدا وانا لو صاحب جريده انت حطيتك في ركن الفكاهه

    موت علي نفسي من كتره الضحك واحلي حته (يا عم هما هبل ما هم معاهم عوامة اهو و شكلهم بيعرفوا يعوموا كويس ) هنشوف بكره هتعمل ايه

    كفايه كده علشان شكلي غتت اووووووي

    سلام

    Tarkieb يقول...

    طب احنا مالنا اللي الغتت طلعه عليك حطلعه فينا ههههههههه....طب ماقبلتش حد يشوف واحد ماشي مع واحده حلوه والغتت يطلع يقولك يدي الحلق للي ..... ويفتكر انه حسين فهمي بقى ويحكي انه لو دي معاه كان عمل وسوى ...انا بشوف مصريين كتير كدة في اوروبا والله

    سكندري يقول...

    تركيب

    طيب ممكن اطلع انا غتيت اوي و اقولك
    انت قريت التدوينة ليه ؟؟
    هههههههه

    انا لو قعدت افكر في أعداد الغتيتيين هلاقيهم كثير اوي

    زي ما بتقول الحكمة

    ""الغتاتة كنز لا يفني""

    ههههههه

    و موضوع الواد اللي مفكر أنه دنجوان عصره و اوانه دول كتير اوي ، ايه الواد المفقع اللي ماشي مع القمر ده

    و كأنه عنترة !! معلش بقي اصل كل واحد واخد في نفسه قلم

    ست البيت يقول...

    غتيت ايه بس دا
    دا البلي بيحصل بالضبط
    بجد مدونة روعة استمر
    استمر
    بجد كلامك منطقي لحد بيتكلم من وعي وثقافة مش من هبل
    عجبني قوي موضوع التربية
    يااااااااااه
    فكرتني كنت كتب عنه من كام سنة
    بس في مذكراتي اللي مصيرها تحت السرير
    تحياتي

    سكندري يقول...

    اهلاً اهلاً يا ست البيت
    هو في حد بيقلب في المدونة
    ههههههههه
    دا أنا قربت أنسي اللي انا كتبته هههه
    و متشكر جداً علي اطرائك
    علي فكرة مدونة حضرتك مش ظاهرة معايا ؟
    منتظر بقية تعليقاتك علي الموضوعات