ساسو

أحدثكم اليوم عن ساسو ، مستغربين من الاسم ، عادي جداً ، ساسو لمن لا يعرفها أحد الصديقات التي تعرفت عليها في الجامعة ، من اللواتي يبدأن حديثهن بقول Okay  بصوت عالي و إذا قلت لها أنك لا تحب حساس الجيل فقد أركتبت خطيئتك الكبري التي لا تُغتفر ، تمشي في تؤدة و دلال كالمُهر الصغير، وتضع في الـ mobile  الخاص بها نغمة أليسا "أيام الشتا" و تضع به كمية من الدباديب تستطيع أن تفتح به بيت للزواحف ،عفواً بيت للهدايا ، هي دائماً حالمة تعيش الرومانسية في كل لحظة من حياتها ، تنتظر أن يأتي حبيب القلب علي حصان أبيض في أحمر و عليه قلوب كثير قوي ، ليأخذها إلي الجنة الموعودة ، جنة الحب، الحب الحب ، الشوق الشوق اللي من طرف أخوكي اللمبي D :D: D: 
إذا تحدثت معها في اي موضوع و كانت تريد الاعتراض علي كلامك ، تبدأ كلامها بـ أنا Already I understand what you want to say بس no way  يا أهمد (أيوة بتقول أهمد و مش أحمد زي البني اّدمين الطبيعيين) ، how come ثم تقول لك بكل بنرفزة I don agree with you ...
إذا أرادت أن تضحك كما يضحك الناس علي أي شئ ظريف لا تعرف ألا ان تقول LoL بجد يا أهمد النكتة دي Very funny
في أحد المرات أردات أن تمدحني فقالت لي ، اهمد أنت حد Cute خالص خالص !
بتحب الـ friends  بتوعها جداً و لازم نخرج كتير و نـ have fun كتير كتير !!
هي لاتعرف من الطعام ألا الكول سلو و البيتزا و هارديز لحم كتافها من خيره ، لا تحب الطبيخ و العك اللي مامي بتعملهم ، So bad، يعني أيه فتة وعك كده فوق بعضه و لا البتاع الأسود ده اللي اسمه سبانخ Off  حاجة Over أوي !!!
سألتها مرة عن ايميلها لأرسل لها بعض الملفات المهمة التي يجب أن ننتهي منها قبل نهاية الأسبوع و إذا بالأيميل كما توقعت sweet_girl_saso@hotmail.com وعلي فكرة كل البنات أيميلهم مشابهة إلي هذا الايميل قد تجد مثلاً  so_sweety_baby@yahoo.com
، وربما Lovely_girl_88@hotmail.com
وربما يكون Love4ever_dodo@yahoo.com
يجب أن يكون فيه الكثير من الـ Sweet و من الـ Cats ومن الـ Love و من الـ Baby و لا بأس من شوية Underscore كثير كده 
لا اعرف سبباً واضحاً لهذا ، نادراً ما تجد أيميل بنت ألا و هو يحمل الكلمات السابقة ، مش بقولكم رقيقة جداً 
أهم ما يشغل تفكيرها أن الـ T-shirt  بتاع حماقي كان كميل خالص و الحفلة بتاعت عمرو دياب كانت جامدة أخر ثلاث أربع حاجات ، و أليسا في الكليب الأخير كان الـ Feeling  بتاعها WoooooooooW !!! 
 قد تبقي علي السلم لساعات لأن علي السلم "صرصار" هي لا تريد أن تدوس عليه علشان هرام يا أهمد و أنا بخاف من دول ، اهئ اهئ ، يا مامي أعمل أيه now !!!!


نفسهل تتجوز واحد زي مهند الزوج الحلو الأمور اللي بيحبها بجنون، نفسها يكون  زوجها So Kind ،So cute حنين كده و يحبها بجنون و نتفسح بقي كتير و نلف العلم كله في الـ Hoony moon 
أسمها علي الفيس بوك so sweet girl  وصورتها، هي في حجرة نومها و ماسكة الدبدوب الأبيض الكبير ذو القلب الأحمر العملاق 

الـ Quizes اللي بتعملها كلها تدور في فلك واحد،  افتح الـ Life box  وشوف حياتك هتبقي عاملة أزاي ! ، افتح الـ Love box  و شوف حبيبك عايز يقولك أيه !! ، أعرفي هتتجوزي أمتي ؟!!! ، و كمان كل شوية الـ Quiz  بتاع Create New Look ده ... حاجة تفرس!!!
 كل ما تفعله في الحياة أن تجلس في غرفتها و تسمع أسامة منير علي نجومFM  ، دائماً سيرته علي لسانها، بالخير طبعاً ، أصل أسامة ده حساس أوي و بحب أسمعه و هو بيتكلم عن الحب أوي و بستناه بالميعاد مرة فاتني الحلقة بتاعته كنت مضايقة أوي أوي أوي يا أهمد ، أسامة ده كميل كميل كميل !!!

تعشق حاجة اسمها Shopping و تقول دائماً خلقنا لـنـ عمل Shopping !!! 

تعر ف كل من يعملون في المولات من كثرة ترددها علي المحلات الموجوده هناك و تنتهز الفرصة للشراء في الـ Big sale حين يصبح ثمن الـفستان 1500جنية بس !!


Oh My God هي الكلمة الأكثر ترديداً علي لسانها و تدل  علي الدهشة المستمرة من الأشياء التي تحدث ، Oh My God النسكافية اتأخر أوي ، I can not wait و Oh My God الراجل ده أوفر أوي ، Oh My God شوفت ماشي ازاي ، Oh My God أنا مش مصدقة نفسي ، مصر كسبت الجزائر 4-0 ، Viva L'Egypt !!!
هي لاتكف  عن الهمس والضحكات المختلسة .. أشعر معها بأنني ذئب وديع جلس أمام  حمل  مفترس !
مجتهدة جداً في دراستها ، قبل الأمتحان بيوم اشترت الملخصات من المكتبة اللي في وش الكلية و سهرت طوال الليل حتي الثالثة فجراً بس يا خسارة ما لحقتش غير أنها تخلص 5 ورقات بس ، أعمل ايه يعني اقطع نفسي؟؟؟ 


حجابها Modern أوي تظهر من شعرها أكثر مما تخفي و بعدين هو البنطلون ضيق شوية ، مامي علي طول تقول لي كده ،بس Never mind ،بابي بيقول لي أنت زي القمر كده يا Baby ! 
أمك دعاية عليك إذا اضطريت للمشي معها علي سيراميك ، ستشعر أن الماكنة المخصصة لحفر الشوارع اشتغلت في دماغك ، لا أعرف من مخترع الكعب ، و لا أعرف كيف يستطعن المشي فيه بالتك توك تيك ، تك توك تيك الكثير دي !!!
لم تحضر المحاضرة الأخيرة و التي وعدنا دكتور المادة بأنه سيقول أهم ما سياتي منها في الامتحان و يأخذ أسماء الحضور و عندما اتصلنا بها لتعرف السبب ، قالت لنا بكل حزن ... "ظفري الكبير اللي بربيه من 3 سنين اتكسر" ، معلش ما قدرتش اجي المحاضرة !!!
منذ شهرين قابلتها أنا و فؤاد صديقي علي إحدي شواطئ الإسكندرية مع شخص لا أعرفه أنا شخصياً و لم يكن من أصدقائنا في الكلية و لكني وجدت فؤاد يبتسم لهما و يكتم ضحكة خبيثة من ضحكاته أياها وسلمت علينا و قالت لنا :  دا توتي (طلع اسمه حاتم بعد كده) خطيبي اتخطبنا من أسبوع ،علي فكرة توتي يبقي ابن طنط فيفي مرات عمو كمال صاحب بابي 
و عندها ملت علي صديق فؤاد لأساله هو توتي شغال ايه ، قال لي توتي دي مش شغال ده ابن عمو فؤاد جوز طنط فيفي 


انتهي 

هناك ١٢ تعليقًا:

آخر أيام الخريف يقول...

هاهاهاهاهاهااه للأسف فعلاً نوعية البنات دى موجودة بكثرة ,صدقنى لو قلتلك ان انا شخصياً بنزعج منهم جداً رغم إنى بنت برضه .

حلوة التدوينة يا سكندرى كالعادة ولو انك فطرتنا فى نهار رمضان :)))

غير معرف يقول...

ههههههههههه

مقال جميل ، خيل إلي إنه من ابداعات د / احمد خالد توفيق خاصة لما قرأت جملة أشعر معها بأنني ذئب وديع جلس أمام حمل مفترس !

بجد أحييك على المقال الجااامد جدااا ده
تسلم ايدك ^_^

سكندري يقول...

##اخر ايام الخريف##
أنا بنزعج منهم جداً و الله و ساعات ببقي بفكر هو قادرين يعيشوا كده ازاي اصلاً

طبعاً انتي مش منهم ، كفاية مدونتك ،

سيماهم في مدوناتهم ... ههههههه

و بعدين اي موضوع الفطار في رمضان ده
هههههههههه

شرفتيني يا دكتورة

سكندري يقول...

##سموو الامير##
تعرف يا أحمد أنا لما شفت تعليقك أقعد اضحك كتير و الله هههههههه

هو فعلاً أنا قريت شوية مقالات كتير من مقالات د. أحمد الفترة اللي فاتت ، و أحييك علي ملاحظاتك دي
الجملة فعلاً من قصاصات أحمد خالد توفيق الغير قابلة للحرق
هههههههه

أنتظروني في " لا ساسو" D :D:

آخر أيام الخريف يقول...

ميرسى على حسن ظنك ..انت فطرتنا فى رمضان عشان قعدنا ننم كده :))

سكندري يقول...

العقو
علي فكرة مافيش نميمة و لا حاجة انا في السليم D:D :D:

دي قصة فيها من الخيال الكثير و الاسماء اللي في القصة زي ساسو و فؤاد والأيملات مش حقيقة طبعاًو الا هيبقي فيها سين و جيم
و ممكن نون
ههههههههههه
شكراً لمرورك

Tarkieb يقول...

كان في واحدة قريبتنا من النوع ده...عاملة نفسها بنت بارم ديله مع ان ابوها كان ازعر ههههههه....عايز تعرف الناس دي على حقيقتهم نرفزهم وحتشوف بلاوي....يالو ....دي يالا كانت بتقولها كدة....اكيد ساسو برضة من عينة يالو.....يومك فل

Amr Awwad يقول...

هههههههههههههههههههههههههههه

جميلة اوى اوى واسلوبك رائع


وفعلا ساسو شخصية منتشرة هذه الايام
وعجبنى موضوع حساس الجيل اللى مبينزليش من زور ومش عارف بيبلعوه ازاى ؟ حد يجاوبنى

والاخ اسامة وعمو عمرو دياب والاخ حماقى والكلمات الانجليزى الكتير المتخلله للعربى المكسر مثل ( اهمد )


باختصار ساسو هى مثال منقرض يبدو هذه الايام انه عائد وبقوة واصبح وباء

وابقى سلم لى على توتى ابن عمو فؤاد جوز طنط فيفي

-------

غير معرف يقول...

هههههههههههههه فعلا ده بيحصل بس تعمل ايه ساسو لما تكبر وهى شافيه مجتمها بيحترم متحدثى اللغات الاخرى والجنسيات الاخرى وبيقول ع المتمسك باصوله وعادات {بلدى وبيئه} ده غير انها كبرت ع الكرتون الاجنبى بدل (بكار) وماعندهاش فكره عن مسلسل الساعه 8 ع القناه الاولى لانها بتتفرج ع هانا مونتانا وجوناس برازرز و فريندز وتفتكروا لما تحب تشترى هدوم هتحب تلبس زى مين؟؟؟؟؟؟؟؟؟؟؟؟؟


M.SHA

سكندري يقول...

## تركيب ##
يومك زي العسل
عليك شوية الفاظ تهلك من الضحك
ابوها كان أزعر
ههههههههه

البنات دول كثروا اوي
أنا ما قلتش غير جزء صغير من اللي جوايا :))
منورني دائماً

سكندري يقول...

##عمرو عواد##
ما حدش هيجاوبك
انسي يا امر " اقصد عمرو يعني ""

سكندري يقول...

##M.SHA##
أهلا بيك في المدونة
فعلاً ساسو ضحية انفتاح اعلاميو ثقافي كبير
و مش البنات لا الولاد كمان
تلاقي الواد او البنت من دول لا عارفة تتكلم انجليزي و لا عارفة تتكلم عربي و بتبقي مسخة مشهوة

و لبسها برضه لا هي لابسها حجاب و لا هي فاتحها علي البحري
و ثقافتها لا هي مصرية و لا هي امريكة أو غربية و لا هي حاجة
مسخ و خلاص
علي راي عادل امام في عمارة يقوببان

"أحنا في زمن المسخ"

لنا الله