عن التدوين ... أدون

أول مرة عرفت فيها عن المدونات كان في أول ديسمبر 2008 و كنت ساعتها  بسمع عن المدونات كتير بس لأن النت ماكنش متاح في البيت فكنت بالكاد - حلوة بالكاد دي -  بقعد ساعتين في الأسبوع وأجيب الحاجة اللي أنا عايزها من النت علي فلاش ميموري  وأقراها في البيت، وغالباً كانت الحاجات دي كتب أو صفحات نت أو ملفات وورد منوعة أنما مكنتش أعرف أنزل فيديو واتفرج عليه أو أتصفح في المدونات لكن لما دخلنا النت في أواخر 2008 بدأت أتعرف شوية علي المدونات وبدأت أتصفح فيها وفي أواخر 2008 وبالظبط الساعة 11:50 مساءاً من يوم 31 ديسمبر2008 عملت المدونة دي وكنت ساعتها مش عارف اسميها أيه وغيرت الاسم  أكثر من مرة لغاية ما استقريت علي الاسم ده ::سكندري:: و ده بقي الاسم المتداول لي في النت يعني لو دورت في أي منتدي و لقيت الاسم ده يبقي أنا ... ^_^ ما حدش رخم بقي يسجل بالاسم ده في أي منتدي D:

و كنت ساعتها مش عارف أنا بفتح المدونة ليه بس تقدر تقول تقليد مش أكثر أشمعني أنا اللي ما ليش مدونة يعني !!؟؟

بس بعدها بفترة أكتشفت أن المدونة دي عالم تاني و في ألاّف المدونين اللي في العالم العربي و طبعاً الغربي و بدأت أكتب في أي حاجة أنا عايز أكتب فيها وطبعاً لأني مش متعود علي التدونين كان بالنسبة لي حاجة بايخة أوي لدرجة أني في أوقات كنت بكتب تدوينة و ما تعجبنيش بعد ما أخلصها أقوم حذفها و في أوقات كتير جداً بيتجيلي أفكار علشان أكتب عنها بس أنسي أو أعمل أي حاجة تانية لأن الصراحة الموضوع تعود في الأول و الاخر...

يعني لو عودت نفسك علي التدوين أكيد هتدون وهتبقي أحسن و لو ما دونتش هتفضل محلك سر ... و هتبقي متلقي مش أكتر... 
بس ساعات كانت بتجيلي أفكار كده تقولي ؟ هو أنت بدون ليه يعني علشان الناس تقرأ لك؟ و لو أنت تعمل عايز تعمل حاجة مفيدة الناس تتعلمها منك و تبدأ تغير في الناس ؟ طيب ليه مش بتكتب في ورق، أو في أجندة و خلاص ولاَ لازم الناس تشوفها  ولا علشان التدوين ممكن يبقي فائدة ليا و لأي حد تاني ممكن يقرا المدونة ... 

إنما الأسئلة دي لقيت أنها ملهاش لازمة أني أسألها ... طبعاً ::خير الناس أنفعهم للناس :: بس في الأول :: إن الله لايغيرما قوم حتي يغيروا ما بأنفسهم :: يعني الأول لازم الواحد يغير من نفسه و بعدين يغير من الناس يعني الأول الواحد لازم يفيد نفسه و بعدين يفيد الناس لأنه باختصار ::فاقد الشئ لايعطيه :: و لا أيه ؟!... 

أنا استفدت من التدوين حاجات كتير أوي ... 

التدوين بيحسسك أن لك كيان وأسلوبك الخاص و أثرك و كلماتك اللي لما ترجع بعد كده و تقرأها تحس بأنك عملت حاجة كويسة.

التدوين مهم جداً لأي شعب عايز يبني حضارة يعني أنا ليه مثلاً ما نعرفش حاجة عن الشعوب البدائية ... لأنهم بساطة معرفوش فن التدوين وكانوا بيعيشوا علشان يكلوا و يشربوا و يتناسلوا و يحاربوا أعدائهم من الطبيعة والبشر ...
 ما فيش أي شعب بني حضارة ألا و هتلاقيه بناها علي أسس علمية و ثقافية مكتوبة ومدونة، يعني الشعب المصري القديم بني الحضارة الفرعونية لأنهم ببساطة كانوا بيدونوا كل حاجة بيتعلموها علي أوراق البردي وعلي جدران المعابد وكمان كانوا بينحتوا في الصخر علشان يدونوا انتصارتهم و أمجادهم و حياتهم اليومية كمان دول كمان  كانوا بيمضوا حضور و إنصراف في الشغل بتاعهم LOoOoOoOL

أفتكر اني لما شفت فيلم :: رمسيس الثاني... قصة الخلود  :: أنه لما عاد من معركة قادش و فشل أنه يحاربهم و خاف أن الشعب يثور عليه أمرهم أنهم يكتبوا علي جدران المعابد انتصاره لأن الناس ما بتصدقش ألا المكتوب أنما المسموع بتنسي مع الأيام و حتي لو الكلام المكتوب غلط الناس بتصدقوا لأنه ملموس ومرئي ..م الاّخر ::اللي بيكتب بيعيش::

العرب زمان كانوا شعب بيقول  شعر و بلاغة يعني تلاقيهم كلهم بيعرفوا يقولوا شعر و حفاظينه و مهم  جداً و كان عندم المعلقات اللي هي وسيلة من وسائل التدوين برضه ...

المسلمين أيضاً دونَوا القراّن و السُنَة علي الأخشاب و عظام الحيونات حتي علم اللغة ما كنش ممكن يبقي موجود غير ألا لما أبو الأسد الدؤلي دونَه و أرسي قواعده و لوماكنش كده مكنش عرفنا أمتي نرفع الفاعل بالضمة و أمتي  بالواو وامتي ننصب المفعول و أزاي ننطق صح ..

المسلمون يدونون 

و بعدين العلوم اتشعبت و بقي كل عالم مختص بأكثر من علم و بقت كتب المسلمين تتكتب و تدرس في الجامعات  العربية في الأندلس و أفريقية و في كل مكان حتي أن ملك أسبانيا ارسل بناته علشان يتعلموا في بلاد االمسلمين.

 كل حضارت العالم اللي عايشة مُدونة حضارتها علي الصخور و علي الأوراق و بأي وسيلة ممكنة و شوف أنت بقي حضارة بابل و حضارة شعب الأزتك في أمريكا الجنوبية و غيرهم ...

طيب هو أحنا ليه مش متقدمين دلوقتي ... الجواب باختصار لأننا مش مهتمين بالعلم و التدوين ... حضارة أي أمة بتقاس بالكم المعرفي النافع فيها يعني أحنا مثلاً بيصدر عندنا كام كتاب و في أي مجال ... ممكن يكون بننشر كتب كتير جداً أنما اغلبها كتب و لا تعمر ولا ينفع تبني أمة،  أنما علي العكس تلاقي الأمم المتقدمة مهتمة بالتدوين و بالكتابة إلي أقصي حد و طبعاً كنتاج لده تلاقي الناس عندهم دودة قراءة ::book worm :: يعني الواحد لازم يكتب علشان الكتابة هتخليه يقرأ أو يقرأ لأن لما يقرا أكيد هيكتب الاتنين بيوصولوا لبعض ...اقرأ لتكتب و أكتب لتقرأ 
و التوين كمان خلاني اتعرف علي أفكار ناس تانية و سواء كنت اتفق معها أواختلف بس في النهاية أنا احترم أرائهم لأن لهم رأي وبيكتوبوه  و يا سلام بقي لو الراسي ده براحة كده مش زعيق و اضرب عيارين في الجو و خدهوم بالكلام الكتير ليغلبوكم و يا سلام لو اللي بيدون ده مدونته شكلها حلو و منظمه بصراحة بتبقي حاجة تفتح النفس و أنا داخل أقرأ  في مدونة من المدونات دي تدوينة و تعلق عندهم و هما يعلقوا عندك و يبقي في تواصل هو أينعم أفتراضي بس أنت مش هتقدر تقابل كال الناس في الطبيعة و بعدين أنت عايز أيه من الواحد غير اللي بيفكر فيه أنا لا هيمني شكله و لا هيمني عنوانه و يهمني فكرة التدوينة (كنت كتبت حتة حلوة كده من أسبوع أبقي شوفها::الفكرة::)يبقي تمام و لو ما عجبتنيش يبقي كأن شئ لم يحدث و كل واحد حر في مدونتة يا عم الحاج و لو في رأي أنا شايف أني بيه هضيف للموضوع أو هقدر أوصبل فكرة كويسة للمدون يبقي هعلق و اقول له و لو مختلف معاه يبقي برضه هقول له ، و مع أني كسول شوية في موضوع  التعليقات ده بس بحاول أعمل كده فعلاً أصل الواحد زمان كده كان بيقرأ كثير في مقالات الصحف وغيرها و بيكسل  يكتب تعليق يعني اللي عملتوا في الناس هيطلع عليك يا صديقي D :D: 


ومن الحاجات برضه اللي اتعلمتها من المدونات هي أن الواحد كتابته  مش بتضيع في النت زي المنتديات والفيس بوك اللي الوصول للحاجة اللي الواحد كاتبها  قبل كده هيبقي شئ شبه مستحيل و كمان الحرية في التعديل و الاضافة أي وقت دي حاجة جميلة جداً بعكس بعض المنتديات أكثر من شكل عكس الورق يعني ممكن تضيف صور و فيدوهات للمدونة و تجيب روابط لحاجات تانية و هكذا .. بصراحة تحكم كامل ما فيش مثيل له ما هو النت مش كله غلط و حاجات وحشة ،يعني في مدونات جميلة جداً و بتخليك قاعد مظأطط كده و فرحان و أنت بتقرأها و فرحان لو في تعليقات علي تدوينتك لو هي حلوة و جابت نتيجة و دخلت دماغ الناس اللي قرأتها ...


بس في حاجة كده قعدت أفكر فيها من كام يوم و هي أن الواحد مننا مش بيقرأاللي هو كاتبه قبل كده أنا أشك أن في حد بيقرأ التدوينات بتاعته دي تاني يعني مثلاً أدخل مدونتي وأجيب الموضوعات القديمة و أقعد أقرأ ده مستحيل طبعاً دا أنا فكرت فيها و قرأتها لما جيت أنشرها علشان ميبقاش فيها أخطاء أملائية و بعدين أقرأها تاني ليه يعني ؟
 في كلمة عجبتني أوي قراتها في مجلة العربي بتاعت الشهر ده (أغسطس 2010) في صفحة قالوا بيقول فيها ::ايري دي لوكا:: الكاتب الروائي الإيطالي ، ::أنني أنفصل عما كتبته و لا أعيد قط قراءة ما نشرته في السابق، لم يعد ملكي ، ليست الكتب أطفالاً كما يسميها البعض ، هي رفيقتنا فحسب ، تصاحبنا مرحلة ثم تغيب إلي حياتها الخاصة :: 

فعلاً هو ده اللي بيحصل أنها مرحاة لا أكثر أكتب عنها و خلاص 

هو ممكن ارجع لها تاني لو عايز أكد فكرة انا كنت قلتها قبل كده كإشارة مرجعية يعني أنما ارجع أقرأها تاني من الاول أنسي عزيزي القارئ دا أنت طيب أوي D: D: D: 

 من التدوين برضه عرفت مدونات كتير بتابع منهم كثير سواء كانت مدونات تكنولوجية أو علمية أو أدبية أو عامة و علي رأي الحكمة اللي بتقول :: الطيور علي أشكالها تقع :: 

مشكلتي في التدوين حاجة غريبة جداً أني مش بحب أكتب تدوينة كده علي الماشياللي هي سطرين و خلاص دي مش عارف ليه ؟!!  يعني لازم الفكرة تبقي حلوة و كبيرة كده و بنت حلال مصفية لاّخر قطرة D: 


يعني مثلاً في تدوينات بتفضل عندي في الـ Drafts بتاع شهر أو اثنين زي التدوينة دي كده أنا بقالي شهرين كاتب أول جزء فيها و قفلت علي كده و بقيت مش عارف أنهيها أزاي أنما الحمد له جه ميعادها اهو و تنشرت 

كفاية كده بقي أنا هكتب أيه تاني عن التدوين مش كفاية برضه و لا أيه ؟!!

ما حد يرد عليا يا ناااااااااااااااااااااااااااااس