سكندري: الرحلة السكندرية

مرة أخري الرحلة السكندرية ... و اليوم مع عامود السواري ...أو pompy pillar ... في منطقة كرموزبالإسكندرية

المكان كبير جداً جداً و أول ما تدخل هتلاقي تماثيل كتيير جداً زي اللي كانت في المدرج الروماني في منطقة الاثار الغارقة .. ده واحد منهم

تدخل جوة شوية هتلاقي مكان كبير جداً اسمه "مقياس النيل" وده كان بيسخدم زمان علشان يقيسوا مستوي النيل أد ايه و بالتالي يعرفوا هيفرضوا ضرائب أد ايه ...

و ده طبعاً "عامود السواري" ...طوله حوالي 27 متر من أول القاعدة إلي أخر التاج

ندخل بعد كده علي قدس الأقداس و ده مكان تحت الارض يصل في النهاية إلي نسخة من العجل أبيس ...

هذا هو معظم ما يوجد بالمكان ...رغم أن هذا المكان الأثري كبير جداً ألا أن الأماكن الموجودة فيها ليست كثيرة !

ملحوظة :- بالنسبة لكوم الشقافة أنا مش هجيب سيرتها لأني مش حابب المكان أوي و كمان ممنوع التصوير فيها...

أما متحف المجوهرات فده من أروع الأماكن اللي ممكن تزورها (وتتحسر) !

فيه ممتلكات أسرة محمد علي والمتحف أصلاً يخص الملكة فاطمة الزهراء (فاطمة حيدرF.H) به تحف و مجوهرات أثرية كلها من الذهب والأحجار الكريمة من الأبرة للصاروخ ... طبعاً منعوني أني أصور أي حاجة ... بس المتحف ده بيبين فعلاً أد أيه الأسرة الحاكمة العلوية - يعني من أيام محمد علي باشا - كانوا عايشين في ترف ... القصر كله مبني علي الطراز الأيطالي و كل شئ بالذهب و الأحجار النادرة حتي فرشة السنان و الامشاط !!

تاني يوم رحنا علي مكتبة الإسكندرية ... بصراحة أحنا محظوظين كأسكندرانية أن عندنا مكتبة الإسكندرية ...

السلسلة ... أمام مكتبة الإسكندرية

كان برنامج الزيارة هو زيارة متحف السادات الذي أتحفني بكل محتوياته من قصاصات كان قد كتبها السادات في أوقات كثيرة وكتب له منها علي سبيل المثال(يا ولدي هذا عمك جمال) و كتاب (قصة الوحدة العربية) وعدة كتب أخري...

وكل مقتنياته السادات تقريباً موجودة هناك من مكتبته و نيشانه والراديو الخاص به مع تسجيل صوتي و هو يقرأ سورة الفاتحة و كذلك مقالات في الصحف عنه وصفحات كثيرة من الجرائد بعد اغتياله مباشرة ...ستجد أيضاً المفاجأة الكبري ... البدلة التي تم اغتياله فيها و البدلة دي لما شفتها خفت جداً ... الدم موجود علي البدلة و مكان الرصاصة موجود بقطع كبير في البدلة و الي اغتاله كان محترف ...جاب الرصاصة في القلب لي طول !

...في أثناء زيارتي في هذه اليوم زرت المتحف مرتين ...و لما أروح تاني هدخل المتحف مرة تانية إن شاء الله .بس علي رواقة ...

بعد المتحف دخلنا القبة السماوية ... و رغم أني مشترك في المكتبة من عدة سنوات ألا أني عمري ما دخلت القبة السماوية علشان اشوف الفيلم اللي بيتكلم علي الأجرام السماوية من الشمس والكواكب ومجرتنا - درب التبانة - بصورة عامة ... إذا كنت موجود في الأسكندرية و ما زرتش القبة السماوية و ما شفتش فيلم فيها فنصيحة مني روحها ... مش هتندم ...

صورة لأعلي القبة قبل عرض الفيلم ... التصوير ممنوع !

القبة السماوية عبارة عن قبة كبيرة و الشاشة موجودة في القبة بالكامل علي شكل نصف دائرة و لما يبدأ الفيلم هتحس أنك موجود في الفضاء بجد ... حركة النيازك و هي قادمة من بعيد يحسسك أنها ستصطدم بيك و دوران الكواكب حول الشمس يجعلك تدور حول نفسك

الفيلم كانت مدته نصف ساعة بس مروا بسرعة جداً

بعد القبة السماوية دخلنا نتفرج شوية علي المتاحف الموجودة في المكتبة بشكل عام منها مثلاً متحف الفنون الشعبية و دي صورة منه...

و منها مثلاً متحف موسمي اسمه "خيال الكتاب" و هو عبارة عن متحف بيتم فيه عرض كتب علي اشكال غريبة جداَ توصل فكرة في ذهن اللي عاملها، مثلاً الصور دي بتعبر عن كتاب عبارة عن غلاف به صور لرفوف المكتبات و لكتب كتير جداً دي اسمه كتاب الكتب Book of the books ...