مع نفسي ...!

سؤال :- بتحب تقعد مع نفسك ؟

استفسار :- يعني ايه أقعد مع نفسي ؟

جواب علي الاستفسار : يعني تقعد تتكلم مع نفسك شوية ، تدردشوا  شوية ، و تشربوا شاي ، تخرجوا مع بعض في جلسة رومانسية هادئة:D  المهم تبقي مع نفسي ...

جواب علي السؤال :- اّه فهمت قصدك ، اّه طبعاً أنا  بحب أقعد  مع نفسي كتير جدا علي فكرة أنا  تقريباً علي طول قاعد مع نفسي أصل أنا وحيد و بحب الوحدة قوي قوي  ... مش وحيد أمي و أبويا بس لا دا أنا أصلاً ما بحبش اقعد مع الناس كتير ... بتخنق ؟

لا علي فكرة أنا مش قصدي أنك تقعد مع الناس و تبقي اجتماعي أولا،  أنا قصدي أنك تقعد مع نفسك ، تختلي بنفسك ، تفكر، تتأمل ، تحب  ... أنما أنت  ممكن تكون شخص وحيد ومش بتختلط مع ناس كتير بس في نفس الوقت تكون مش بتقعد مع نفسك ، أنت بتكون قاعد لوحدك أنما مش مع نفسك

اااااه  .... فهمتك

تصدق أنا مش بقعد مع نفسي خالص ..أنا ممكن أكون بقعد لوحدي كتير أنما مقدرش أفضل قاعد كده معملش حاجة ... يعني لازم أكون  بعمل حاجة،  اقعد اتفرج علي التليفزيون،  أي قناة مش هتفرق أو أقرأ جرنان أو كتاب حتي لو ميكي ماوس ،  المهم ألاقي حاجة تشغلني أو أنسي بيها  اللي ممكن افكر فيه أصل الوحدة وحشة !!!
...
اه أنما مش بتحاول تقعد مع نفسك ، تتكلم معاها تشوف هي عايزة ايه محتاجة ايه الي ناقصها و أنت مقصر في حقها

يا عم ما تكبرش الموضوع بقي و أهي ماشية و خلاص
ما الموضوع كبير بس انت اللي مش واخد الك و هو كده كده بيمشي و ما ينفعش يقف أو يرجع ورا ... !! المهم أنت تكون ماشي صح في طريق صح (قدر الإمكان) و ألا هتكون زي الحيوانات اللي بتجر ساقية لافة طول النهار و مغمين عينيها علشان ما يدخوش ... بس اهه برضه بيقول اهي ماشية و خلاص و في الاخر اليوم بياكل و يشرب و ... ينام يعني أحنا كده نبقي عاملين زي الحيوان المربوط في ساقية ؟!!

لا لا مش للدرجة دي ...


 بس تصدق هو ده اللي حاصل فعلاً .. الواحد  من كتر ما هو مش واخد باله هو بيعمل ايه تلاقيه بيتوه فعلاً !!!


 فعلاً الواحد لازم يقعد مع نفسه شوية يراجع اللي بيعمله يمكن في حاجة غلط أو في حاجة أصح من اللي بيعمله و هي الأولي بالعمل اولاً

فعلا هو ده اللي أنا اقصده : أنك تكون صديق نفسك قبل ما تطلب من الناس الصداقة أنك تعرف نفسك كويس قبل ما تقول لنفسك أنك لازم تعرف الناس كويس .. الأولي بالمعرفة هو نفسك و بكده هتبقي تعرف تتعامل مع الناس علي اختلاف شخصياتهم و أرائهم و أنك تقعد مع نفسك و تشيل كل اللي ممكن يشغلك عنها لا تلفزيون و لا كتب و لا جرائد و لا أي حاجة ممكن تشغلك ...و يستحسن أنك تستخدم ورقة و قلم و تسجل الحوار الي دار بينكوا علشان تقرأها علي نفسك   بعد كده و تبقي عليك حٌجة و اهو يبقي كده شهد شاهد من اهلها ...

انتهي

هناك ٥ تعليقات:

غير معرف يقول...

تمام عندك حق
وبعدين اللي مبيحبش نفسه ميدورش على حب حد
ومتزعلش ان ملكش أصدقاء طالما أنت مش مصادق نفسك
:)

سكندري يقول...

أهلا بيك سمو الامير ...
شرفتني بتعليقك
يا رب تكوت التدوينة عجبتك

غير معرف يقول...

تصدق فعلاً عندك حق
أنا زمان كنت شبه وحيد، وكنت بقعد مع نفسي برضو
دلوقتي قلبت نفسي وقلبت الناس ومعدتش بقعد مع حد أصلاً D:

لا بس بجد الواحد فعلاً لازم كل فترة يقعد مع نفسه زي ما ذكرت كدة.

سَارةٌ يقول...

عجبتني اوووي فكرة انك تتحاور انت ونفسك سوا سوا .. وتسجل الحوار بينكم ..

بس تفتكر لو قلت لحد على كده

ممكن يفتكرني مجنونة ..؟

بتتكلمي مع نفسك يابنتي ؟ .. من قلة الناس اللي حواليكي ؟ .. طب اتكلمي مع امك اقرب الناس ليكي .. بس متتكلميش مع نفسك لحسن يجرا لعقلك حاجه .. :D

اجابه متوقعه .. :):)

عامةً عجبتني جدا الفكره دي .. والواحد محتاج يقعد مع نفسه بحد .. قعده يعيد فيها حساباته .. ويشوف هيعمل ايه ف الخطوه الجايه ..

شكراً عالبوست الجميل ده .. :):)

6ony يقول...

Realy it's agreat but I want to say some thing.am really feel lonely :( and it's hard for any person