فضفضة

أخبراً النت رجع،  النهارده يبقي بقالي 13 يوم بالظبط بعيد عن النت ...
كنت حاسس أني عايش في كهف بعيد عن البشر كلهم، لا أخبار عامة ولا  أخبار أصدقاء و لا كلام و لا سلام  ...
الصراحة كنت مخنوق جداً أول فترة النت يقطع فيها و كنت حاسس أني  معزول عن العالم كله بس بعد فترة لاقيت في حاجات كتير كنت متابعها وملهاش لازمة حاجات كتيرة بقي، بس بعد فترة الواحد بينسي الحاجات دي و الحاجات المهمة هي اللي بتفرض نفسها ... 
قريت في الفترة دي كتاب (ما فعله العيان بالميت) وهو كتاب قصصي في حاجات حلوة جداً و أسلوب بلال فضل جذاب و كلماته رشيقة جداً، بس كنت أتمني أنه  ما يكنش في شتيمه زي كتاب (تاكسي .. حواديت المشاوير)  اللي كنت اتكلمت عليه قبل كده في التدوينة اللي فاتت ... علي العموم الكتاب في مجمله كويس ... 



و كنت قريت كتاب (حبه هوا) لوليد طاهر وهو عبارة عن شوية كاريكاتيرات و تعليق عليه ... كتاب صغير خالص ... و خفيف 



اما كتاب (ما لاتعرفه عن جوجل) فوفقت عن قراءته الفترة اللي فاتت لأني النت كان فاصل والكتاب ده بالذات ما ينفعش اقرأه ألا لما يكون النت موجود أن شاء الله أكمل قراًته و أكتب أهم الأجزاء فيه كما وعدت ...
كنت بتفرج علي التلفزيون الفترة اللي فاتت كتير وكانت أهم قناة بتفرج عليها هي قناة ON TV  قناة رائعة بكل ما تحمل الكلمة من معاني ... خاصة برنامج (مانشيت) لجابر القرموطي) اللي كنت بستناه يومياً علشان أعرف اللي تم في البلد لأنه كان بيجيب أهم ما كتب في الصحف و أهم القضايا علي الساحة و بعديه اتفرج علي جزء كبير من برنامج ( بلدنا بالمصري) و غالباً مكنتش بعرف أتفرج عليه لأخره لأني كنتت بنام أو أخرج مع صحابي ...البرنامج ده في رأيي أفضل برنامج برنامجtalk show  في مصر هو و برنامج العاشرة مساءاً أنما الباقي تقدر تقول أن قلته أحسن .. أنا مكنتش بطيق حاجة أسمها برنامج(90 دقيقة) و معتز الدمردراش بكل كمية الجهل المركب اللي كنت بشوفها و هو بيحاور الضيوف و كمية الضحك الهيستيري اللي كان بيصيبه و يخليه كالمشعوذ لما يستضيف فنانة أو مغنية تحس كده أنه هيطير من الفرحة أنما في الموضوعات المهمة لا حياة لمن تنادي ...

ما علينا ... أنا بجد حزيييييييييييين علي اللي بيحصل في البلد ، البلد بتنهار من أساسها ...أنا من كتر الأخبار اللي بسمعها في الأخبار خلتني أصاب بإحباط ...
الناس خلاص فاض بيها الكيل و السرقة و الفساد عيني عينك و دي عينه من الاخبار اللي مخلياني حزين جديد علي البلد 

خد عندك 
  • أزمة القضاة و المحامين اللي مش راضية ترسي علي بر...
  • الناس كلها مش مصدقة أن تقرير اللجنة الثلاثية اللي كلفها النائب العام بتشريح جثة  خالد سعيد ،شهيد الطورائ صح و عندهم حق طبعاً .. و البلاد هايجة و كلها وقفات سلمية وفي كل حتة و لا زم حق خالد يرجع له ... مش معقول يكون مات بالخنق ... دي أكيد متلفقة باينة أوي يعني ... و طبعاً معاهم حق ...
  • حكمن المحكمة الإدارية العليا ببطلان عقد بيع مدينتي لأن طلعت مصطفي اشتري 3مليون و600 ألف متر من الدولة بسعر 1 جنية للمتر ... يا بلاش و يخرج الوزير المغربي وزير الاسكان و يقول أن عقد البيع الباطل لا يبطل عقود بيع الوحدات السكنية و البورصة طبعاً منهارة و الدولة بيروح عليها مليارات ...
  • سليمان عامر صاحب مشرع السليمانية أخذ من وزراة الزراعة أراضي للزراعة بتراب الفلوس و بني مدينة السلمانية و أخذ المياه الجوفية وعمل بيها ملاعب جولف وطبعاً أخذ الأرض دي بتراب الفلوس وأخذ من مخزون المياه الجوفية و حق الدولة اللي حق حق المواطن يضيع هباءاً منثوراً في الأرض أو في جيوب الكبار فقط ...
  • مصر دولة فاشلة حسب تقرير مجلة Foreign Policy  الأمريكية و ترتبيها في الفشل رقم 49 من اصل 60 دولة فشل ... يا حلاوة !!!
  • مش عارفين نحل أزمة ميه النيل مع  دول حوض النيل لغاية دلوقتي !!! 
  • وقوع سيارة من فوق كبري التونسي يخلي الوزارء في لحظة يقولوا لازم ننقل سوق الجمعة من مكانها إلي 15 مايو و مش مشكلة مصالح الناس و التجار اللي ضاعت دي!!!
  • 5 مدرسين يموتوا في المراقبة  علي الامتحانات في الصعيد و كل ده لتعنت وزير التعليم و عدم قبول اعتذار المرضي منهم أو توفير أماكن تصلح للعيش الأدمي يعني ما فيش لا مراوح و لا سراير و لا يحزنون- لأ  في يحزنون - و المفروض أن هما يشتغلوا وهم ساكتين ...
  • امتحانات صعبة و من خارج المناهج و دموع الطلبة و أولاء الأمور و أمتحانات سهلة و بها أخطاء و تحس أن الدنيا ماشية بالعكس ...
  • الرئيس يعين نواب بمجلس الشوري منهم مثلاً أنس الفقي اللي هو أصلاً عضو بمجلس الشعب فيقدم استقالته من مجلس الشعب و يروح الشوري ... كأنه بتنقل من فصل خامسة تاني إلي فصل خامسة أول بتاع المتفوقين
  • قبل ما دورة مجلس الشعب تخلص النواب بيتخانقوا و يتهموا بعض أنهم بيسرقوا البلد وواحد منهم سرق كراسي متحركة مخصصة للمعاقين وهربها لليبيا علشان يبعيها هناك و اتمسكت في السلوم و التاني عايز 2 مليون علشان يعالج  مريضان بس عل نفقة الدولة و فلوس عمالة تتنهب عيني عينك!!! و فضايح بالكوم  
بس بقي كفاية كده،  الواحد مش ناقص و حاسس أن ما فيش حاجة بتتصلح في البلد و الناس بدأت تنفجر و بقت قنابل موقوته مجرد ما تنفجر واحدة هتلاقي ألف واحدة انفجرت بعدها ... الناس تعبانة أوي و ما فيش مشكلة بتتحل 

و لو خلصنا من مشكلة يخرج لنا 100 غيرها 

لك الله يا مصر

هناك تعليقان (٢):

غير معرف يقول...

طيب انا هارد على جزئية جزئية

1- كتاب بلال فضل ( ما فعله العيان بالميت ) عجبني أوي أسلوبه القصصي المتميز والكتابة الساخرة لكني بردو باعيب عليه التلميحات والعبارات التي تميل للجنس كل شوية

2- كتاب حبة هو لوليد طاهر فكرته جديدة بس صغير أوي ، عجبني فيه حبة حاجات كده زي " جوايا حد زعلان من إني زعلان من حد جوايا " و " قال الحرامي النبيه لأخيه : خير من أن تلعن الظلام ، اسرق فيه " وحاجة كمان بتاعة حبة الهوا اللى طيروا الورق بس مش متذكرها أوي

3- كتاب مالا تعرفه عن جوجل لسا مقرأتوش وماليش نفس مشعارف ليه ، زي ماتقول حاسس اني اللى اعرفه عنه مكفيني حتى الآن :)

4- التليفزيون فأنا قليلا ما اتفرج عليه بس باحب اتابع برامج قناة الرسالة واقرأ والجزيرة الوثائقية ودريم 2 بس أول مرة اسمع عن قناة أون تي في ياريت لو تقولي ترددها وجزاك الله خيرا

5- أحوال البلد واللى بيحصل فيها فمش هاقول غير كلمتك الأخيرة
لك الله يا مصر

سكندري يقول...

أزيك يا سمو الامير و يارب تكون مبسوط في الاجازة و تخلص من الـ 20% اللي فاضليين لك في الكلية

1- مش عارف "بلال فضل" عمل كده و ليه معظم الكتب الأدبية بقت تميل لكده ليه ؟؟ أنا مش عايز اقرأ كتاب شيكاجو علشان عارف أنه ملئ بالحاجات دي ...
2- فكرة كتاب "وليد طاهر" جميلة بجد يس الكتاب محتاج يكبر شوية أنا قعدت اتصفحه و في الاخر اكتشفت أني خلصته ... D:
 
3-أنصك بقراءة الكتاب ده لانه بجد جميل و في حاجت هتفيدك بدرجة لايمكن تصورها علي الاقل شوف جوجل تبيهات :GOOGLE ALERTS شئ رائع بجد و أنا إن شاء اله لما اخلصه هكتب ملخص ليه ...

4- التلفزيون قناة أون تي في متميزة أوي و تردددها 12398 أفقي و ليهم صفحة علي الفيس بوك http://www.facebook.com/profile.php?id=774807439&v=wall#!/pages/ON-TV/213125065934?ref=ts
كفاية موضوع On Time اللي بيجيب الاخبار كل ساعة و شريط الاخبار اللي في أسفل الشاشة اللي مش بيسيب خبر مهما كان قليل ألا و كتبه


شكراً علي تعليقك