خدوا بالكم من اكونتاتكم !!!!

الفيس بوك  ... موقع أجتماعي معروف للجميع يدخله كل يوم ملايين الناس و أخر إحصائية أعرفها عن عدد المشتركين فيه وصلت إلي 400 مليون مستخدم ... و يقولون أن الموقع رقم 2 في جذب المستخدمين بعد موقع موقع البحث الأشهر Google  
يستخدم الفيس بوك الأن كل من هب و دب -أو حتي لم يدب - الصغير قبل الكبير و من كل المستويات الفكرية لأن سهل جداً و بيجمع لك كل أصحابك في مكان واحد ... طبعاً هي فكرة رائعة أنك تقدر تجمع كل أصحابك من زمان و في كل الأماكن اللي أنت مريت بيها في حياتك من مراحل دراسية مختلفة و شغل و أفراد العائلة الواحدة وأصدقائك من الرحلات و غيرها ... هذا لاشك فيه و الكل أصبح يعرفه ويعرف أهميته في الاتصال مع الناس ، وهو أداة شديدة لا الخطورة لأنه ممكن يسبب مشاكل كبيرة جداً إذا أُسئ استخدامه
، مثلاً إذا كنت متضايق من مديرك في الشغل جداً و رحت كتبت علي الـ Wall  بتاعك أن المدير ده إنسان لا يطاق و أن الشغل أسوأ شغل في الدنيا وأنه بيخليك تعمل Shit Stuff و نسيت أنك اضيفت مديرك بالخطأ إلي قائمة أصدقائك ... أيه هيكون المتوقع عمله ؟؟؟؟؟
طبعاً المدير هيقرأ اللي حضرتك كتبته و أقل واجب يعلمه أن حضرتك مطرود  من العمل 
، مش مصدق طيب شوف الصورة دي كده 
اضغط علي الصورة للتكبير 
أهو كد ه الكلام وضح جداً 
يعني من الأفضل انك ما ضفش الأشخاص المهمين جداً في الفيس بوك أو لو اضفته يبقي خليك حذر جداً في التعامل مع الفيس بوك و من تحديثاتك علي الفيس من صور و فيديوهات و كلام علي الـ wall  الخاص بك ...

حاجة مهمة جداً بالنسبة لينا كلنا و هي الصور و المعلومات الشخصية 
في الحقيقة أنا برفض أضيف أي شخص أنا معرفوش لأني حاطط المعلومات الشخصية بتاعتي علي الفيس بوك من أرقام تلفونات و عناوين و غيرها ومعني أني أعرَف شخص تاني المعلومات دي وهو ما يعرفنيش يعني ممكن يستخدمها استخدام غير شرعي ومش بعيد تتدبس في حاجة انت في غني عنها ... يبقي الافضل بقي أنك تضيف اللي أنت تعرفه بس أصدقائك أقاربك و هكذا ، انما الأضافة لمجرد زيادة أعداد الأصدقاء فده شئ سخيف في رأيي و مش مفيد بالمرة لأنك لا يمكن هتقدر تتواصل مع كل الناس ده حتي اللي أنت تعرفهم كويس ، يبقي أيه لازمة إضافة ناس أنت ما تعرفهم اصلاً !!!!

و خد بالك الحاجة المنشورة علي النت عموماً و علي الفيس خصوصاً بقت مش بتاعتك يعني أي صورة أو فيديو لك ممكن يكون مش مناسب عرضة أو هزار مع صحابكم أو بتهزروا مع بعض هزار و تقل شوية  و أتحط خطأ علي الفيس بوك يبقي أضمن أن فضحيتك هتبقي بجلاجل - و شخلاليل كمان - و أنسي أنك تعرف تحصر الفيديو أو الصورة دي  تاني لأنك لو مسحت الفيديو أو الصورة من الصعب أنك تعرف هل في  نسخة منهم موجودة مع حد تاني أو لا ؟؟؟!!!

شوف مثلاً الفيدو ده و اسمع أو ل كلمتين لأو باما 
و أنت ممكن تتحكم في مين اللي يشوف الـ feed بتاعك علي الفيس بوك و مين ما يشفوش و ده بقي سهل أوي أنت بس تدخل علي الـ Privacy  وهتلاقي كل حاجة موجودة و سهلة تتحكم فيها 

و الشئ بالشئ يذكر ... لو أنت مشترك في خط DSL  يبقي أتاكد من الناس اللي معاك و اللي أنت موصلهم النت و - ده طبعاً حاجة غير شرعية يعني لو اتمسكت المفروض في قضية بس علشان أحنا اتعودنا علي كده فما بقتش فارقة الموضوع ده - اتأكد من الناس اللي انت معاهم كويس لأن لو حصل حاجة غلط ... جريمة تجسس أو اخترق مواقع أو
أي حاجة غير شرعية عاماً هتبقي أنت المضرر أولً أ و أخيراً لأن الـ IP بيكون واحد في كل الوصلات اللي مشترك فيها  

يعني نصيحة أخيرة 

خدوا بالكم من اكونتاتكم !!!!

هناك ٣ تعليقات:

سَارةٌ يقول...

عجبني موضوع البوست ده جدا جدا جداً ..

الفيس بوك بقى حاجه خطر اووي .. ناس بتزعل مع بعضها بسببه .. الوآحد يمكن لو خد حريته زياده عن اللزوم ممكن يتسبب ف مشاكل كتيره .. زي الست بتاعت الشغل دي ..

نيجي للصور والفيديوهات .. دلوقت لو عايز تنتشر بسرعه يبقى عالفيس على طووول .. جروبات مليااانه ناس .. وفيديو لو حطيته عندك يوم تلاقيه ف ثواني عند غيرك .. زي الصفحه بتاعت المدعي إنه " الله " .. انتشر بعد 5 ساعات وبدأت ناس كتيره تبعت الصفحه ويتراسلوها وكده .. وهما بإديهم نشروها ..
اساساً .. معتقدش انه الفيس ليه خصوصيه .. وبصراحه مبلاقيش منه فايده كبيره .. لإن صحابي ممكن اكلمهم عالتلفون او الميل .. لكن عالفيس بحس ان الوآحد متراقب .. *_* .. حتى لو حدد خصوصية صفحته .. مش بفضله كوسيلة تعارف يعني ..

ربنا يحمينا من الفيس بوك وشره وبلاويه .. ^_^

تدوينه جميله كعادتك .. :)

سكندري يقول...

منوراني يا حَـبآيـۃْ.بـטּـدۉڷ

و شكراً علي تعليقك

فعلاً الفيس بوك ده أداة شديدة الخطورة اليومين دول بس برضه ما ننكرش أنها مفيدة جداً في تجميع الأصدقاء من كل مكان
و ده مش موجود في أماكن كتير زي الأيميل مثلاً
و هو أسرع وسيلة إعلامية حالياً

الواحد ما ينكرش أنه الفيس بوك بقي أنترنت جديد و في حاجات حلوة جداً و صفحات مميزة بس برضه الواحد لازم يخلي باله شوية في الكلام و في اللي بيعمله علي الفيس بوك عموماً

بس أجمل ما الفيس هو أنك تجميع أصدقائك كلهم في مكان واحد .. بصراحة ده أكثر حاجة بتميزه
الحاجات التانية ممكن الواحد يجيبها من مكان تاني
مواقع

منتديات

مدونات

أنما الصحبة الحلوة

لالالالالالا

غير معرف يقول...

تعرف ؟ انا كنت كل شوية اعمل دي اكتيفيت عشان ناس معينين كده للأسف عندي في قايمة الاصدقاء

لغاية ما اتظبط ال Privacy
دلوقتي مقسم الناس اللي عندي وكل جروب ليه مجموعة من الصلاحيات في البروفايل بتاعي منعا للمشاكل اللى كانت بتحصل زمان

بس دلوقتي الحمد لله العملية أصبحت أسهل بكتير