الموبايل في مصر يعني ايه ؟

الموبايل في مصر يعني ايه ؟

• يعني لزوم المنظرة و أعمل به Show قدام الناس.
• يعني أغير التليفون كل شهر لأنه بقي موضة قديمة.
• يعني مش لاقي أكل و أجيب كارت بـ 100 علشان أعرف أتكلم وقت ما أنا عايز.
• يعني تحس أن أنت رجل أعمال.
• يعني لو ماسك موبايل مفهوش MP3 Player و Camera يبقي أنت أكيد بيئة أوي ... (أنا عارف الناس دي عايشة أزاي من غير MP3 Player و Camera).
• يعني تبقي ماسك الموبايل في أيدك اليمين و موبايل تاني في أيدك الشمال ... رجل أعمال سياتك و مش ملاحق علي التليفونات.
• يعني أهم حاجة عندك لما تلاقي واحد صحابك أنك تسأله ... معاك نغمات جديدة للموبايل ؟
• أنك تجيب أغاني شعبي عليه و تقعد في المواصلات (أي وسيلة مواصلات حتي لو حمار بـ 3 أرجل ) و تشغله الصوت علي أخره و تعيش بقي .. و طظ في أي حد مش عايز يسمع أو مهتم بالكلام التافهة اللي حضرتك بتسمعه.
• يعني تشغل القراءن و تعلي الصوت علي أخره و أنت قاعد تحكي و تتكلم في مع صحابك في مواضيع تانية خالص و ماسك السيجارة و عايش و لو حد قالك أقفل الموبايل لو سمحت أو شغل الـ Head phone تبص له من تحت لفوق و تعتبره قال حاجة حرام ... دا أنا مشغل قراءن !!!
• يعني تشتري موبايل فيه كاميرا أمامية و كاميرا خلفية و أنت عمرك ما تتصل بحد Video Call و أول ما تجيب الموبايل تبص في المراية الصغيرة اللي جنب الكاميرا و تبتسم ابتسامة بلهاء و تأخد لنفسك أول صورة.
•  يعني تبقي واقف بتصلي و تلاقي الموبايل بتاع واحد عمال يرن وهو ولا هو هنا ... و لا حتي بيطلع الموبايل يقفله ... طيب ما هو يا تقفل الموبايل قبل الصلاة يا تقفله و أنت بتصلي لما يرن و بعدين الراجل اللي بيتصل ده ما بيهموش و عايزك ترد يعني ترد مش عامل حسابه أنك ممكن تكون مشغول.
• يعني تقعد تلعب Snake لما تحس أنك بقيت من فصيلة الزواحف.
• يعني تبعت بالبلوتوث أحدث أغاني المطرب العالمي أبو الليف ... أنا مش خرنج.
• يعني تشتري الموبايل الصيني ووزارة الإتصالات تتفق مع شركات الإتصالات أنها توقف الخدمة عنك لأن الموبايل الصيني ما لوش رقم مسلسل فريد Unique serial number و بكده يكون مش مطابق للمواصفات و كمان يصعب مراقبته لأن فيه خطين و بيعمل مشاكل في الشبكات ؟ طيب هما سمحوا باستيراده ليه من الأول ؟؟
• يعني تقدر تدخل علي النت في أي مكان و في أي وقت و بجنيه واحد بس في اليوم.
• يعني تسرق شركة إتصالات مصروكل مرة تدخل النت تدخل ببلاش عن طريق اللعبة المعروفة بتاعت الساعة 12 بالليل.

في استخدام أخير ... بعض الناس بيستخدموا الموبايل عشانه

أنهم يستخدموا الموبايل في المكالمات المهمة ... بس دول قلة !!!