و تفرق ثلاثتنا

(1)
ليلتها ما نمتش  ، هنروح الرحلة بكرة ، هيه هييه هيييه !!!
أنا مش قادر أنام ، دي أول رحلة أروحها في المدرسة ،  طول الليلة كنت صاحي احلم بالرحلة دي ، بحلم وأنا صاحي ، ترا را را ...
رحنا الرحلة ، كان يوم ممتع و شفنا حاجات كتيييييييييير 
في أول رحلة مدرسية إلي معالم الأسكندرية في الصف الثاني الأبتدائي قررت أن أزور كل متاحف الأسكندرية ، أن أكون رحالة عظيم ، أعرف كل أثار بلدنا ، أن أقرأ في أدب الرحلات وأسافر أماكن كتير أوووي ، أولها بلدي بالأماكن السياحية اللي فيها  ، أزور الأقصر و أسوان ، رشيد و دمياط و بعدين أسافر إلي تونس و المغرب و سوريا و الاردن والصين و البرازيل  و أنجلترا واليونان و  ... و ...
خلاص أنا قررت أن أكون مثل ابن بطوطة ... زي أي رحالة عظيم قضي حياته في السفر و الكتابة عن السفر و معرفة عادات الناس و استكشاف الجديد ...
فجاءة الحلم انتهي ... الرحلة المدرسية الاولي خلصت و راجعين البيت علشان ننام و نصحي بدري و نخلي بالنا من مذاكرتنا !!! 
بس حقيقي أنا كنت سعيد جداً بالرحلة  دي ...
(2)
بعد قراءة أولي القصص القصيرة له (مش عارف مين ده) قررت أن أقرأ جميع ما خطت يداه من القصص و الروايات ، سيكون شغلي الشاغل في الفترة القادمة هو أن أقرأ له و أتعلم ، سأكون أديب بارع و قاص ليس له مثيل ، سأكتب القصص و الروايات و الحكايات وستباع كتبي في كل مكان ، سأكتبها تحت الاسم المستعار أيضاً "سكندري" أحب هذا الاسم كثيراً و عندما أفوز بجائزة كبري في مجال الأدب سأكون سعيد جداً ، ربما سيكون شعري شاب وقتها أو ربما لم يكن لدي شعر أصلاً و لكني سأكون في قمة سعادتي ، خصوصاً و أن أري كتبي مترجمة إلي أكثر من لغة ، و تباع بالملايين ، شعور جميل فعلاً  ...
ستتصل دار الانتاج (س) لشراء أحد رواياتي لتحويلها إلي فيلم و لكني أعتذر بشدة لدار الأنتاج و أقول لها :-"أنا لسه ماضي مع دار الإنتاج "ص"  أحنا ممكن نتفق علي اي رواية تانية!!!" 
و لكن ميعاد النوم قد جاء الأن ... قرأت هذا الكتاب فقط ، غداً سيكون يوم أفضل و استطيع أن أنهي كل هذه الكتب كما حلمت اليوم ...
انتظروني 
(3)
لا فعلاً الراجل ده كلامه جميل جداً ، أنا قررت أن اسمع بقية حلقات البرنامج ده ... هدور عليه علي النت و أجيب كل برامجه و أقرأ كل كتبه ، أنا ازاي ما كنتش واخد بالي منه ؟؟؟!
 أنا الفترة اللي جاية هكون مشغول جداً مع الراجل العظيم ده ...

جوجل ---نتائج البحث  -- 48974132168794 نتيجة 
كده تمام 
ايه ده ؟ ده كل كتبه مرفوعة هنا أهو ، لا و أيه كمان ، البرنامج اللي كنت بدور عليها أهو و بجودة عالية جداً ... اووووه كده تمام ... دونلود بقي و خلينا نستمتع ، ده أنا هقعد أسبوع في الأوضة بتاعتي مش هخرج لغاية ما أخلص الحاجات دي ، أنا ممكن ما أنمش 
لا و كمان شوف الاكونت بتاعه علي الفيس بوك أهو .... اشترك 
و كمان توتر ... أشترك
 وخد ايميله كمان علشان تبعت تساله ة تناقشه في كتبه و برامجه  و ... و ... 

الان حان وقت الراحة ... تظبيط الشغل أهم من الشغل ، أنا كده حملت كل حاجة له ، و رتبتها في فولدر بأسمه بكرة -إن شاء الله - هبدأ بقي القراءة و السماع الحلقات و بص علشان ما تزهقش و تمل  أنا هشوف حلقة و اقرأ شوية و هكذا و هكتب عن الحلقات دي في المدونة و ... و ...و .... من بكرة بقي كل حاجة هتبان ...
(1)
هو ده غلط و لا صح ؟؟؟؟
أني كال ما أشوف حاجة جديدة انبهر و اندهش 
هو ده غلط و لا صح ؟؟؟؟
 كل لما اعرف فيها معلومة جديدة أقول بيني و بين نفسي  أني لازم أعرف  أكثر و أدور علي معلومات أكثر ...
هو ده غلط و لا صح ؟؟؟؟
أني أفضل عايز أعرف دائماً الجديد 
حتي لو ما حققتش معظم احلامي ... هفضل أحلم أني أفضل أحلم 
أحلم و أنا صاحي ... مش نايييييييييييييييم
(2)
هو:-ايه يا بني الحوار ده  ، بص انا هقولك علي حاجة واحدة بس تحطها حلقة في ودانك 
أنا: حوار، حلقة وودان ...  قول ، كل كلامك حكم !
هو: بص يا بني أنت لازم تركز في حاجة واحدة بس  صاحب بالين كذاب ، لازم تركز في حاجة واحدة لأن في حاجات كتيرة حلوة في الحياة دي و مش هتعرف تعمل كل حاجة ، فهمت الحوار يا صاحبي .
أنا : فهمت !
(3)
تكلم ثالثنا : أنا موافقك يا أحمد أحنا لازم نحلم و ننبهر بكل حاجة جديدة بس برضه مش كل حاجة لازم نحلم بيها و نعيش في الخيال كده كتير ،  الرحلة عجبتك أوي كان كفاية عليك أنك تنوي أنك تزور معلم سياحي تاني كل فترة ، أنما خلاص من مجرد زيارة في رحلة ما أخذتش فيها ساعتين زمن بقيت عايز تلف العالم ، و مش لأنك أعُجبت بكام قصة و لا رواية تبقي نجيب محفوظ وجبرائيل ماكريز و عايز جائز نوبل كمان في الأداب 
و لا مش علشان عجبك كلماته  و كتبه تبقي تنعزل عن العالم و تبقي عايز تعرف كل حاجة عنه 
هو: كلامك مقنع يا صحابي .
أنا: اسكت أنت يا بني ، كمل يا ثالثنا ...
ثالثنا: خلاصة الكلام أن يومنا أربعة و عشرين  ساعة مش مليون ساعة لو ما ركزتش في حاجات معينة في حياتك اللي هي أساسية في الحياة مش هتعرف تعيش بس برضه في ظل سعيك وراء الأوليات في حياتك   ووراء لقمة العيش لا تنسي أن تعيش ...
اشتغل و اتعلم و رفه عن نفسك و عيش هواياتك و سافر و أقرأ و أكتب و العب و قابل ناس جديدة و اتعلم حاجات كتيرة بس المهم تبقي متوازن و مش أي حاجة تبهرك .


و تفرق ثلاثتنا 

هناك ١٦ تعليقًا:

قلب ينبض لله يقول...

الحلم التاني عجبني اكتر واتمنالك تحققه
وكتبك تترجم لأكتر من لغة وتتحول رواياتك افلام
هذا يضمن لك البقاء حتي الموت وبعد الموت ايضا

التركيز مهم ومطلوب ...احنا بنحب اكلة بعينها ونشتهيها دايما بس دا مابيمنعناش اننا ناكل باقي الأكل وندوقه ونستمتع بيه...نفس الحكاية ...ماتوقفش احلامك وماتلخصهاش في حلم واحد لأن وقت ماالحلم دا يتحقق هايجيلك اكتئاب لانك كدا خلاص خلصت وحققت حلمك ...

غير معرف يقول...

أولاً، طريقة لذيذة في العرض، تسلم الدماغ.

ثانياً، أنا مع الكلام إللي في الآخر، ولو إني مش عارف مين فيكم أنتم الثلاثة إللي قاله، بس عموماً دا رأيي:
مش عيب ولا غلط إنك تعرف في كل حاجة وعن كل حاجة، بس خللى ميزانك معاك، في حاجة هتحتاج تعرف عنها مجرد معلومة على الطاير أو يادوب تعريف بيها من باب العلم بالشيء، وحاجات تانية لازم تعرفها بالتفصيل الممل، وحاجات في النص عايزة معلومات نص نص.
ودي وجهة نظر خاصة بي.

غير معرف يقول...

تدوينة جميلة فعلا
م/سكندرى احب اطمنك كلنا هذا (الطفل)
اجمل حاجة عند الاطفال ان كل حاجة جديدة ومبهرة و غامضة كمان الاطفال عندهم خاصية (لاول مرة) اول يوم ف المدرسه...اول كتاب اقراه(غير حياتى وتفكيرى)...اول هدية اجيبها لماما من مصروفى فى عيد الام...الكلية...الشغل...
الخاصية دى تقل كل ما بنكبر
علشان كده لازم نحافظ ع اننا نشوف الدنيا بعيون الاطفال ننبهر ونفرح باقل شىء جميل ونسال زيهم كمان ايه ده؟ وليه؟ وبشتغل ازاى؟...؟..؟...؟...؟ ونحاول نعرف ونتعلم.


* اسئلة الاطفال رغم برائتها قد لايستطيع اكثر الرجال حكمة وذكاء الاجابة عنها.
* انا متفق جدا جدا جدا مع ثالثكم.

د/دودى يقول...

اااااى ضربت عالوتر الحساس.....

بس دى طبيعه المرحله اللى احنا فيها دى انا بقى كنت افظع منك بمراحل لانى مش بس حلمت لا و كمان خدت الخطوه الاولى و احيانا التانيه فى كل طريق و اعود اعود لا شئ معى سوى كلمات كلمات ليست كالكلمات زى الاغنيه ما بتقول....

تدوينه تحفه

الميكروباص يقول...

يعجبني فيك التفاؤل المستمر
ولله من زمان ملقتش حد مقبل على الحياه ومتفائل كده

Criativo يقول...

فعلاً تنظيم الوقت معضلة محتاجة حل !!

لكن الموضوع مش سيء للدرجة دي

على كل حال الأخ "ثالثنا" كان عنده حق ^_^

تحياتي

غير معرف يقول...

متعرفني على ثالثكم ده يتوبك فيا ثواب :)

مش هاقدر اقولك غير انك أبدعت كفكرة وأسلوب

أحنا لازم نحلم و ننبهر بكل حاجة جديدة بس برضه مش كل حاجة لازم نحلم بيها و نعيش في الخيال كده كتير ، الرحلة عجبتك أوي كان كفاية عليك أنك تنوي أنك تزور معلم سياحي تاني كل فترة ، أنما خلاص من مجرد زيارة في رحلة ما أخذتش فيها ساعتين زمن بقيت عايز تلف العالم ، و مش لأنك أعُجبت بكام قصة و لا رواية تبقي نجيب محفوظ وجبرائيل ماكريز و عايز جائز نوبل كمان في الأداب
و لا مش علشان عجبك كلماته و كتبه تبقي تنعزل عن العالم و تبقي عايز تعرف كل حاجة عنه
يومنا أربعة و عشرين ساعة مش مليون ساعة لو ما ركزتش في حاجات معينة في حياتك اللي هي أساسية في الحياة مش هتعرف تعيش بس برضه في ظل سعيك وراء الأوليات في حياتك ووراء لقمة العيش لا تنسي أن تعيش ...
اشتغل و اتعلم و رفه عن نفسك و عيش هواياتك و سافر و أقرأ و أكتب و العب و قابل ناس جديدة و اتعلم حاجات كتيرة بس المهم تبقي متوازن و مش أي حاجة تبهرك .

ماشاء الله عليك :)

الظل يقول...

فكرة ممتازة فى قالب أروع

فعلا احنا بننبهر بالحاجات الجديدة

واعتقد معظم الناس كدة

بس المهم ان احنا نفرق بين المفيد واللى هقدر ابدع فيه وما بين اللى لا

وطبعا من وجهة نظرى ان انا لازم اعرف اى حاجة عن كل حاجة وكل حاجة عن اى حاجة (اللى بحبها طبعا وهشتغل فيها )

سكندري يقول...

## قلب ينبض لله##
بشمهندسة رضوي
زيارتك شرفتني ،
فعلاص الحلم الثاني جميل
أنا فاكر أول مرة أروح مكتبة الأسكندرية وقفت و بلمت كده و قلت يا نهار أبيض كل دي كتب !!!
و بعدها قريت شوية كتب و اتفرجت علي الباقي و روحت ...
بس كفاية اني فتحت المدونة دي و بقيت باكتب فيها انما كتب بقي و ترجمة و كلام من ده ، ما اعتقدتش
أهي هواية بس مش أكثر و كفاية أني ابقي مبسوط لما اقرا أو أكتب اعتقد كده كفاية أن الواحد يبقي راضي عن نفسه
أتمني تكرار الزيارة (:

سكندري يقول...

##مختار##
أزيك يا مختار
واحشن جداًً يا صديقي
و ألف شكر علي الكلام الجميل ده

ووجهة نظرك وصلت و كلامك صح 100 %
عحبني أوي تعبيرك
خلي ميزانك معاك :(

يعني أنت عارف الاثنين الأولنيين علشان تسال عن الثالث
هههههههه

متورني دائماً

سكندري يقول...

## غير معرف ##
نفسي تبقي معرف بقي :(
كلامك جميل أوي ... أوي ، أوي ، أوي ، أوي

سكندري يقول...

##د.دودي##
أزيك يا دكتورة
معلش مقصر معاك بس فعلاً مشغول
ليا زيارة للمدونة إن شاء الله قريب

الحمد لله مش أنا لوحدي

أنا ساعات ببدأ في حاجات و برجع حافي من غير خفي حنين و لا صندله حتي
(:

سكندري يقول...

##لورانس العرب##
أنا سعيد جداص بزيارتك للمدونة المتواضعة دي

و كلامك اسعدني جداً

من بعض ما عندكم يا بشمهندس :(

يا رب نفضل دائماً كده في عيوننا
بسمة
و في عقلنا
أماني
و في قلبونا
ثناء لله تعالي :(

سكندري يقول...

##كرياتيفو ##
طيب ما تعرفش هننظم الوقت أزاي ؟
دي معضلة كبيييييييييييييييرة
و بحاول أنظم الوقت قدر الامكان و الله
و ثالثنا ده راجل زي العسل و هو فعلاً بيحاول يعمل اللي بيقول عليه ده :(
منور المدونة لأول مرة يا كرياتيفو
و متقطعش الزيارات
(:

سكندري يقول...

## سمو الأمير ##
ما تعرفنش أنت عليه ينوبك فيا ثواب (:
بس ايه اكلام الحلو ده

و أن كان التدوينة عجبتك فأنا مدونتك كلها عجباني و شكلي كده هسرقها من غير ما حد يعرف
هههههههههه

سكندري يقول...

## الظل ##
متشكر جداص علي الكلام الجميل ده

و يا رب الطموح ده يفضل معاك علي طول