العربيزية بدون معلم


في Topic عايز أتكلم فيه من زمان جداً فأنا وأنت and All of us كلنا يعني responsible عنه و أنا حاسس فعلاً أنه topic مش simple و لأننا بجد بجد في problem كبير جداً... All over the world دلوقتي بيهتموا بحاجة very important لكل الناس مش بس علشان هما بلاد high level و عندهم -high Technology لا ده كمان علشان هما عايزين يبقوا عايزين from inside أنهم to lead the world و علي كدة هما مش أحسن مننا في حاجة every one have a lot of skills وwe must use it بس الـ problem فعلاً أننا شايفين أننا مش نستحق كده لان الـ problem في الـ government بتاعنا و أحنا لو قعدنا نـ depend علي الـ government في كل حاجة فعلاً مش هنتقدم في حاجة خالص ... believe me

لازم كل واحد from inside يـ decide أنه he will be the change that he wants .. معايا ... otherwise احنا مش هنبقي developed country any way... 
يبقي علشان نبقي بجد very effected to the other people ...لازم لازم لازم نكون قد الـ responsibility دي ... و أحب أقول example علي كده هو the Japanese people مع أنهم ابتدوا الـ development بتاعهم من حوالي fifty years - more or less بس أنا شايف أنهم قدروا فعلاً يحقووا results هائلة و العالم كله بقي بستخدم الـ products بتاعهم ...

يا جماعة تصدقوا أني كنت بكلم my friend في America و قاللي أنا عايز اجي Egypt علشان أركب الـ Camel تصورا أنهم لسوا فاكرين أننا دولة لسة بنستخدم الـ Camel في الـ transportation  ... بجد بجد بجد I can not believe اللي قاللوا ليا ده خالص ... بجد بجد I was shocked لما قال لي الكلام ده ...

علشان كده أنا النهاردة بفكركوا أنكوا لازم لازم لازم أنتوا تكونوا الـ start و ما نستانش حد يقول لنا What to do & When to do ... يا رب تكونوا understand للكلام اللي حبيت اوصلهلكوا و لو أي حد عنده اي comment انا هكون availble علي الـ internet from 8:00 to 90:00 pm
I am waiting for your comments ...
انتهت القصة ... اه كده انتهت ... حد فهم حاجة .. أشك و لكن للاسف معظم الناس بقت بتتكلم كده ... تتكلم 10 كلمات منهم 3 عربي و 7 انجليزي ... طيب ليه ؟ مش عارف ...

طالما اللغة فيها كلمات تفي بالغرض و مهياش مصطلحات علمية يبقي ليه نقول I see و ما نقلش انا فاهم مع ان فاهم ده من صميم اللغة و مش مصطلح علمي مستحدث علشان لو قلته ممكن يكون في ناس مش تفهمه ... ليه أقول I am waiting for you و ماقلش أنا في انتظارك !!! و خد من ده أمثلة كثيرة جداً !!! والكلام اللي في اول التدوينة يفي بالغرض ...

انا في أوقات كتير بستخدم اللغة الانجليزية في كلام انما لو كان فعلاً لمصطلحات علمية أو مواقع أجنبية أشير لها بس مش بستخدمها عمال علي بطال كده و خلاص !! و ساعات كمان بعمل شات بس بكون حريص أن استخدم اللغة العربية او الأنجليزية بس انما الفرانكوا اراب فأنا الصراحة مش برتاح له مع أني بعرف استخدمه كويس و بعتبره مسخ للغة بس ساعات بستخدمه في حدود ضيقة جداً و بحاول ابطله لانه مالوش فائدة ... 

من الحاجات اللي تغيظ بقي أن الواحد لو قال لحد thanks  و نطقها كده sanks  الناس هتعتبره مش فاهم في اللغة و ما يعرفش حاجة و يعقد يقول له طلع لسانك ، انما لو قلت لحد مثلاً خلي عندك ثقة بنفسك و طلعت لساني علشان أنطق حرف الثاء صح تلاقية بيسخر منك مع أن طريقة النطق واحدة  و لو غلط في أي لغة ده مش مشكلة لأنها مش لغتي أصلاً  ، أنما أغلط في لغتي ده اللي تبقي وحشة في حقي ...

في واحد صاحبي كان نفسه يعمل مشروع شايف انه هيكون حاجة جديدة و مش مسبوقة ...
قلت له أيه المشروع ده ؟
قال لي نعمل مجلة تتكتب بالـ arabish  او علشان نكون أوضح  تبقي زي الكلام اللي أنا كاتبه فوق كده بس يبقي العربي مكتوب بحروف لاتينية و الأنجليزي زي ما هو طبعاً ... طبعاً كلام سخيف جداً و أن كنت اتوقع أن تصدر مجلة و لو حتي علي الأنترنت بهذا الأسلوب ... ده أن ما كنتش موجودة أصلاً و أنا مش عارف ! 
أنا خايف في يوم أجي أذاكر مع ابني درس في اللغة العربية و اجي أفتح كتاب اللغة العربية بتاعه ألاقيه  مكتوب فيه 
lo5atona el gamila 
for 1st prep. school
by :- prof/ Ahmed Abd Elfatah & others 

هل ده ممكن يحصل  ...may be  ما فيش حاجة impossible دلوقتي .
انتهي 

هناك 22 تعليقًا:

Tarkieb يقول...

طب واية يعني؟ انا كنت زمان باتكلم كدة ولما ربنا رضي على وتيت بقيت أستخدم الالماني بدل الانجليش ههههههه ولما حد في مصر بيسمعني بيقولي ايه الواد ده اللي الانجليش بتاعه زبالة لأن نطق الكلمات مختلف...لعلمك لو بصيت على فاتورة التليفون في ألمانيا وكنت من الجيل القديم اللي كان بيدرس لاتيني بدل الانجليزي مش ح تفهم حاجة لانهم عالين شرايح هابي اور وهابي دي وهابي ميد دي وهكذا...مشي حالك واللغة هي دليل التفوق ..ولو تفوقنا في اي حاجة لغتنا حتتفوق بدليل ان اسامي النجوم والفلك والابراج مازال بالعربي .

ابراهيم رزق يقول...

اتفق معك جدا فيما تقول واعتقد انها هجمة تتارية على اللعة العربية وانظر الى اسماء المحلات لو المحل اسمه بالانجليزية ممكن نمشيها لكن تلاقى المحل اسمه بالعربى لكن مكتوب بالحروف الاتنية اللى ممكن طريقة كتابتها تغير المعنى و مع ذلك نصر على كتابتها بالحروف الاتينية مع انها اسماء عربية مثل عباية وجلابية و المصطبة و دوار و صابحة و خضرة و شلبية و اللع كل الاسماء دى بتتكتب لاتينى والشوبنج و الشاور و الشىء اللى يغيظان لو فى كلمة محرجة و قلناها بالانجليزية يبقى مفيش احراج مثل اندر وير ماله تعبير الملابس الداخلية او كلمات او شتائم بذئية لو قلناها بالانجليزية يبقى احنا مؤدبين كأن المعنى اختلف عند نظقه بالانجليزية
خالص تحياتى ماى دير
ابراهام رزك

amr awwad يقول...

موضوع جميل
وان شاء الله موضوع
lo3'atona el gamila

فاذا كان من يستخدم العربية فى الوقت الحالى بيتقال عليه متخلف
فما بالك بكتاب اللغة العربية .. بالطبع لازم يواكب العصر

سمو الامير يقول...

ههههههههه

ال post ده أنا قريته before
لس really يستحق اعادة النشر again

:D :D

د/دودى يقول...

يااااااااااه اخيرا لاقيت حد واخد باله من الموضوع ده غيرى....اكتر حاجه بتعصبنى فى الكون كله حكايه الفرانكو فى الكتابه بذات عالفيس و حكايه الكلام "المهجن" المخلط اللى نصه عربى و نصه متعرفش ايه بالظبط.... حنى كلمه "لامؤاخذه" او "اسف" بقت سورى ابسط و اسهل و اقل احراجا .....فجأه كده كلنا بقينا اجانب غريبه يعنى امال العيال فى الثانويه العامه كل شويه يطلعوا يصوتوا من امتحان الانجليزى ليه؟؟

سكندري يقول...

طالت المدة كثيراً و الان أنشر التعليقات
أعتذر لكل من القراء المعلقين علي هذه التدوينة و لكني فعلاً مشغول جداً الفترة دي
معلش بقي استحملوني (

##تركيب##
هي فعلاً بقت عادي
بس أن مش من الجيل القديم
انا عندي 24 سنة بس يعني حضرتك - علي رأي سيد شبطة- يعني الانجليزي الجدد
اخر version منه كمان (:

انا مش فاهم حاجة في موضوع الفاتورة ده
عادي مش مشكلة (:
بس أنا معاك لو تفوقنا في حاجة أكيد هنفرض سيطرة لغتنا عليها
و أسماء النجوم بالعربية صح
و في حاجات كتير بالعربية منقوله للغات التانية
بس أحنا دلوقتي متفوقين في ايه ؟؟؟

أنا الصراحة بتخنق جداً لما الناس تفكر أنها لما تعرب العلوم يبقي أحنا كده تفوقنا
يعني مثلاً يقولك جزء الماء رمزها هـ2أ
بدل H2O دي اسمها خزعبلات طبعاً

سكندري يقول...

##ابراهام رزك##
أولاً أنت مشرفني لثاني مرة علي التوالي (:
في محلات كثير اسمها بالأنجليزي أنما لو حبيت تعرفه أسمه ايه مش هتعرف لانهم بينقي أصعب حاجة
لو شكيبر طلع من التربة مش هيعرف يعني ايه

معاك في نقطة الفلحسة اللي احنا بقينا فيها و أن احنا مش بننكسف من الانجليزي و انما العربي بقي كخة
حتي الشتائم بقت بالأنجليزي كويسة أنما بالعربي يبقي أنا قليل الادب

زي ما الرقابة عدت حاجات كتير مثلاً في فيلم احمد مكي اللي كان فيه "ايه سفن ايه" و "موزر فكر" و غيرها من الحاجات اللي أحنا بنشتغل فيها نفسنا و ودنك منين يا حجا

سكندري يقول...

## عمرو عواد ##
أزيك يا باش محامي (:
أنا مرة كنت سمعت من مذيع- مش فاكر مين -أنه بيقول لابنه أنتوا اخدته ايه في المدرسة النهاردة قال له سورة الالفنت elphent ههههههههه

سكندري يقول...

##سمو الامير ##
أنت كده دائماً
فاهمني و عارف أنا بعمل ايه
أيوة يا عم أنا نشرت التدوينة دي من زمان
بس انا زودت عليها شوية حاجات و نشرتها تاني علشان اللي ما قراش يقرأ

و بعدين أنا الفترة دي مشغول شوية و مش عارف أكتب حاجة جديدة
اعذروني بقي (:

سكندري يقول...

##د.دودي##
أنا بقينا لا بنعرف عربي و لا انجليزي و بتلزق في الانجليزي و بقينا مهجنين لغوياً
بس تهجين أخرج طفل مشوه

سكندري يقول...

##د.دودي##
أنا بقينا لا بنعرف عربي و لا انجليزي و بتلزق في الانجليزي و بقينا مهجنين لغوياً
بس تهجين أخرج طفل مشوه

A. Mokhtar يقول...

كلام زين يا قصص، ورغم إني رديت في المرة الاولى، بس هزود تاني ومفيش حاجة ورايا يعني.

من الحاجات فعلاً إللي تغيظ المثال إلى أنت ضربته في حرف ال ث ، لو مطلعتش لسانك في كلام الإنجليزي يبقى أنت تعليم مجاني وملكش في الإنجليزي، مع إن كوتو موتو ده عمره ما نطق معظم حروف لغته الأصلية صح.

فعلاً اللغة دي زي أي علم، مجرد تحصيله مش كفاية، المهم تعرف إمته تستخدمه وإزاي وليه.

Tarkieb يقول...

كل سنة وانت طيب وبخير

•βЯξαҜ• يقول...

ههههههه .. اللي تخاف منه ميجيش احسن منه ..

وبعدين هو ده الديفيلوبيشن الإيجيبشاوي.. :D
وأساساً متلاقيش اللغه المفبركه دي منتشره وبشده غير ف مصر ..!!
نحن نختلف عن الآخريين خاالص أكيد :D

الظل يقول...

بوست جميلة أوى

عندك حق فعلا

ربنا يستر على الجيل الجديد

سكندري يقول...

## مختار##

فعلاً اللغة دي زي أي علم، مجرد تحصيله مش كفاية، المهم تعرف إمته تستخدمه وإزاي وليه.

هو ده كلام الناس العاقلين

منورني دائماً يا جميل

سكندري يقول...

##βЯξαҜ##

انتي غيرتي اسمك ليه

أنا مش عارف بقي ده يعني ايه ؟؟

كل سنة و أنتي طيبة

مصر أم الدنيا بقي و لازم نبقي متفوقين في حاجة
يعني نسيب الناس تتقدم و أحنا قاعدين نتفرج يعني ؟؟

سكندري يقول...

## الظل##
ربنا يستر علي ولايانا (:

الجيل الجديد هيكون جامد أخر ثلاث أربع حاجات

جامد فحط (: (: (:

كل سنة وأنت طيب يا جميل

سكندري يقول...

## تركيب ##
و أنت بصحة و سلامة دائماً و مدونتك بخير
سلمي لي علي شبطة كتييييييييييير
و أقوله ياكل لحمة مصري مش صيني (: (:

سمو الامير يقول...

كل سنة وانت طيب

بجد والله واحشني جدااا ونفسي اشوفك ( عشان آخد العيدية بتاعتي ) :D

سكندري يقول...

##سمو الأمير ##
و الله و أنت واحشني جداً جداً جداً
بس عايز أقولك حاجة مهمة

سكندري مش بتاع سندوتشات

سكندري بتاع مدونات

أنسي العيدية بقي (:

ع.سالم يقول...

This post فعلا فعلا عبقري..And this blog is more عبقرية من البوست كمان... أنا فعلا بحب الblogs اللي ليها style محدد بيبيّن شخصية الكاتب ..

GO ON !
_____

وف ودنك بقه ...
Visit my blog please :)

3een-wants-to-see.blogspot.com