الإعلام الهادف و الإعلام الهايف

المفروض أني اعتذر في أخر التدوينة دي وأقول معذرة للأطالة بس أنا قلت اعتذر من دلوقتي و أقول معذرة للاطالة  برضه   (:

الإعلام من أقوي المؤسسات في أي دولة،  به تتقدم الأمم ويعلو شأنها و ثقافة شعبها وبه أيضاً يمكن إلهاء الناس و جعلهم "يأكلون البلوظة" !!!

اللي بيحصل في مصر حالياً هو أننا بنأكل البلوظة و فرحانيين و كل واحد يطلع علي التلفزيون و يقول لك : "أنا بقدم فن راقي" و "أنا بدافع عن فني" و "فني هو حياتي" و يقول لك أن حريص أني اقدم للجمهور وجبة دسمة من الكوميديا أو مسلسل هادف أو أي كلام فاضي من ده و الحقيقة  أن معظم ما لدينا من إعلام هو إعلام هايف و ليس هادف ، إعلام يغيب الناس عن الحقائق اللي المفروض يعرفوها و يكونوا علي اتصال مع العالم بها ...

اللي بيحصل في الجهاز الاعلامي بتاعنا ده ما يفرحش حبيب (بس بيفرح عدو طبعاً ) ...

تعالي مثلاً نفتح مع بعض التلفزيون ونشوف اللي موجود فيه

رياضة 

مثلاً قنوات الكرة اللي بقت أكتر من الهم علي القلب، مودرن سبورت و الأهلي و قنوات الجزيرة والنايل لايف وغيرها من القنوات و دول قضيتهم الأساسية و شغلهم الشاغل هوالكلام عن الكرة و الرياضة، المفروض أنه يكون بالأيجاب و يكون فيه حث للناس علي ممارسة الرياضة و لعب كرة القدم و بيان الأخلاقيات الموجودة في كرة القدم و في الرياضة عموماً ،أنما ده مش بيحصل طبعاً ...

 يعني مثلاً موضوع الجزئر ده قعد فترة كل واحد بيدلوا بدلوه فيه ( أو بجردله ) و بيشتم في الجزائرو الجزائريين لغاية ما كرهنا الجزائر و بقت عدوتنا اللدودة ، ده بعض الناس شبهتها باسرائيل !!!

وحتي اللي ما لوش فيها بقي بيتكلم شوفوا مثلاً الفيديو ده بتاع "الفنانة" الي اسمها "زينة"  بتشتم في الجزائريين و رجالتهم و ستاتهم كأنها من الأنبياء و الجزائريين من الأبالسة ، حاجة زي دي فيها قضية سب و قذف لشعب بحاله !!!



و طبعاً مافيش مذيع أحترم نفسه و هدي الموضوع و قال يا جماعة مهما كان و مهما حصل دي رياضة و دول شعبين ما ينفعش نعمل كده مع بعض، لكن تقول أيه بقي الشعب لازم يهيج و يثور و كل المصريين يشتموا في الجزائريين و كل الجزائريين يلعنوا سنسفيل المصريين لأننا أسوأ من الأسرائيليين في نظرهم و لاننا مَن صَنع الجزائرايين في نظرنا !!!!

و نخرج من المشكلة دي بفجوة كبيرة بين مصر و الجزائر كشعوب لدرجة أن في ناس قالت أنا لو شفت واحد جزائري في الشارع هقتله !!! لأنهم شعب همجي ما يستحقش يعيش !!!!
فين دور الإعلام بقي هنا ؟

المواطن الساذج الغلبان اللي عايز يعرف الحقيقة راح فين ؟؟؟ طبعاً ترسخ في دماغه أن الجزائر هي العدو اللدود للمصريين و أن الجزائريين برضه قالوا أن المصريين دول فيهم مساؤي الدنيا و الكل عارف اللي كان بيتكتب في الجرائد و بيتقال علي شاشات التلفزيون

قضية شوبير و مرتضي منصور اللي مش بتخلص أبداً...

شوبير ساب الحياة و كان رايح O TV  و بعد كده اتوقف و بعد كده عايز يروح مودرن مصر و مرتضي بيقول لازم يعتذر مروراً  بقي بتدخل الشيخ خالد الجندي في الموضوع و بقي شكله وحش أوي ومروراً بأن شوبير قال أن في قيادات عليا كانت وراء مشكلة مصر مع الجزائر و غيرها كتير أوي،  الموضوع ده بقاله بتاع 5 أشهر أنما أنه يخلص لا
أن واحد زي مرتضي منصور راجل كان مستشار ورئيس محكمة و يطلع يقول كلام سوقي و تعبيرات سوقية و شوبير اللي المفروض رياضي و إعلامي كبير و يخرج بسيديهات و كلام ما يصحش أن ناس زي دي تتكلم فيه...

هو مش المفروض برضه الرياضة بتهذب النفوس و أن  الاعلام ده رسالة ؟؟؟؟!!!

و خد عندك بقي كل يوم يخرج يقولك مشكلة انتقال جدو للزمالك و أنه مضي عقد مع الاهلي و بعدين مشكلة الحضري و أنه هو كان يروح الاهلي و بكاؤه علي مودرن سبورت و بعدين يقولك أن مضي عقد مع الزمالك ؟؟؟

نخلص من ده يطلع لنا اللاعب الفلاني عايز يروح نادي كذا و اللعب الفلاني مصاب و العاب الفلاني صباعه متعور؟!!!

طيب أحنا استفدنا أيه من الكلام ده؟!!!؟

أنا أكاد اجزم أن أكثر من 90 % من متابعي الكورة في مصر لا يمارسون أي نوع من الرياضة !!! كل واحد يحمل كرشه قدامه و عمال يشتم في الفريق الفلاني و الفريق العلاني و الإعلام دورة في كده أنه بيولعها عي رأي المغنيين الشعبيين  في الافراح "ولعها ولعها شعللها شعللها" !!!

أفلام 
تعالي بقي للأفلام و قنوات الأفلام اللي بقت أكتر من الهم علي القلب برضه  خد عندك قناة الحياة أفلام و كايرو سينما و روتانا سينما و دراما فيلم و روتانا زمان و قناة 1 و 2 من قنوات أوربت و يمكن في أكثر بس أنا ما اعرفش ده غير طبعاً الافلام اللي بتجي علي قنوات المنوعات ...

أيه هي أفكار الافلام بقي ؟ كلها أفلام أما سخيفة أو خليعة و لما يجي حد يتكلم يقول لك أنا ببين المشاكل اللي موجودة في مصر علشان نعرف نحلها !!!

طيب هي مشكلة الشذوذ الجنسي ده موجودة بدرجة كبيرة جداً للدرجة دي بحيث أنها تعرض في أكثر من فيلم و لا مشكلة العشوائيات لازم أعرضها و أجيب  الناس تقول كلام سوقي شعبي دنئ علشان اعرف أن المشكلة موجودة و ماذا بعد العرض ؟؟!!!

لا شئ

أيه فائدة أن الشاب الكوميدي بيكون دائماً أبله و بقه معوج و شارب حشيش و أمه توصيه أن يشرب بيرة بعد ما يخلص الأمتحان  ... يعني هو ده الشاب الكوميدي اللي بيضحك الناس و يخليهم يقهقهوا في السينما ...

أيه فائدة عرض المتدين دائماً رجل أهبل مدهول و مربي ذقنة ثلاثة متر و بيكون مرتشي و بتاع نسوان و لازم يكون إرهابي و معاه سلاح و بيكون ضد الحكومة ...

ليه أفلام المقاولات كثرت أوي اليومين دول و أفلام الأسفاف الخلقي اللي كلها مشاهد عارية أو كلمات بذيئة بقت كتيرة أوي ...أيه فائدة الرقابة و فين أصلاً مقصات الرقيب!!!

يمكن في ناس بتقول لك أن الموضوع عادي يعني ما تحطش في دماغك ما لوش تأثير ادينا بنضحك شوية و خلاص

بس للاسف الشديد بقي الافلام لها كبير الاثر علي الناس

بالله عليكم أنا عايز طفل صغير يكون شاف كام فيلم من بتوع الرجل المتدين الارهابي و بعدين يدخل مسجد و يلاقي الأمام ملتحي، ايه هيكون وجهة نظرة حول الرجل ده؟ أكيد ده إرهابي اللي بيشيل سلاح و بيقتل الناس !!!صح ؟و لا أنا غلطان ؟ هل هيقعد يتعلم منه حرف أو يصلي وراه ؟ لا طبعاً ما هو إرهابي أصلا ً !!!


شوف مثلاً الاطفال اللي في مدارس بعد مشاهدة مسرحيات تستهزأ بالمدرسين أيه هيكون رد فعلهم ؟! ..طبعاً المدرس ده عندهم  وسيلة للسخرية و الاستهزاء و الضحك و لازم نعمل فيه كام موقف علشان نضحك عليه ...

اللي بيحصل للأطفال بعض فيلم اللمبي  طبعاً بيعوجوا بئهم و يكلموا كلام مش مفهوم  وده بيبوظ دماغهم (غيرأنها بايظة أصلاً في التعليم) يعين شباب الجيل الجاي ده متربي علي أفلام تافهة !!!


هل ممكن نترجم الافلام بتاعتنا دي و نعرضها بره (علي أساس أن مصر دي دولة جوة ) و تقول للناس ده فننا و ده بيعبر عننا وعن شعبنا ... وهي دي مصر ...
طيب ممكن مثلاً ، مثلاً واحد من برة مصر يجي يتفرج علي فيلم (اللمبي 8 جيجا) و هو مترجم طيب ده هيترجم ازاي أصلاً؟؟! ...  ولا يشوف فيلم (الريس عمر حرب) و يعرف أن المصريين قاعدين في البارات و هاتك يا لعب و قمار لحد الصباح الماكر !!!!

هل أفلامنا بتعبر عننا كمصريين فعلاً ولا أحنا في طريق وهما في طريق تاني خالص !

مسلسلات 
تعالي لقنوات المسلسلات اللي برضه بقت كتير جداً ميلودي دراما و كايروا دراما وبانوراما دراما اللي بتسيب علامة في بيتك و سين و Art حكايات و مودرن روايات و غيرها كتير...
المسلسلات  - معظمها - منحوتة علي قد البطل و بتكون ممطوطة علي قد الثلاثين يوم بتوع رمضان علشان الموسم الكبير بتاع المسلسلات ، قناة الحياة_1 كانت بتعلن عن  االمسلسلات الحصرية بتاعتها من أول شهر خمسة يعني قبل رمضان ما يجي بـ 3 شهور ... ، المسلسلات أصلاً ما كنتش اتصورت ؟!!!!

و بعدين بدأوا في حاجة من كان سنة أنا شايف أنها ملهاش أي لازمة و هي مسلسلات السيرة الذاتية :- أم كلثوم ،اسمهان، إسماعيل ياسين ، السندريلا،عبد الحيلم حافظ و قاسم أمين و غيرهم - انا مش متابع أوي بس دول اللي اعرفهم - ... يوووووووووووه ايه ده كله !!


ما حدش يقول لي أن المسلسل بيعرض تاريخ الزمن اللي كان عايش فيه البطل و ده كلام فارغ طبعاً لأن الحبكة الدرامية بتخلي الأحداث تتغير و كل واحد شايفها بصورة غير الصورة !! يعني أنك تقرأ كتاب مهما كان حجمه أحسن لك من أنك تشوف مسلسل لا يقل  عن 30 حلقة عن قصة حياة فنان أو فنانة و ده مش تحامل علي حد بقدر ما هو توضيح للأهم في حياتنا و اللي المفروض نعمله ...

توك شو 
أما برامج التوك شو فدي بجد بقي حاجة تقرف .... أنا نفسي في حياتي أشوف برنامج توك شو و أكون فيه وجهة نظري الشخصية لأن كل برنامج توك شو بيستضيف عدد من الشخصيات و كلُُُُ له وجهة نظره الشخصية والمفروض أن المضيف - اللي هو المذيع - يدير حوار ما بينهم بحيث أقدر أطلع أنا بحاجة مفيدة واسمع كل واحد رأيه أيه في الموضوع اللي بيتكلموا فيه !! 

بس أبقي قابلني ... المذيع ما بيدرش الحوار تلاقيه عمال يسكت في الضيف الاول مرة و الضيف الثاني مرة تانية و مرة واحدة يقولك هنطلع فاصل إعلاني و بعدين يقولك معانا مداخلة تليفونية و بعدين يقولك نعتذر للمشاهدين، احنا وقتنا محدود و أنا مضطر أقفل الحلقة و يجي التتر و شوية إعلانات و خلاص !!!!

المشاهد العادي اللي زيي و زي ملايين الناس اللي بتتفرج أيه هيكون اللي اتعلموه؟

و لا حاجة 

أو خلينا نقول للأسف أنهم اتعملوا حاجة سلبية جداً ألا و هي أنك ما تسمعش الي قدامك غلوش عليه بالكلام وعلي صوتك و اقعد اتنطط علشان الناس تصدقك و خدوهم بالصوت ليغلبوكم ، أنا بعاني من المشكلة دي وهو أن ناس كتير جداً مش حابة تسمع تيجي تتكلم تلاقيه  اتعود يقول رأيه في أي وقت و بأعلي صوت ...

و بعدين فين اداب الحوار بقي ؟؟؟؟

حمرا ...إبراهيم عيسي

من الحاجات برضه اللي ضايقتني جداً و أنا بشوف التليفزيون السنة دي أنه ما عدش في خطوط حمرا و ما عدش حاجة اسمها قدوة و قمم إعلامية ...
حاجة زي برنامج حمرا انا شفت إعلانه علي قناة موجة كوميدي  - القناة اللي قدرت تلعب علي الوتر الحساس للمصريين وعرفت أنهم محتاجين هلس و كوميدي و حاجة تروح عن نفسهم و قدرت تتدخل كل بيت وتسيب علامة فيه لانه قناة خفيفة - المهم اعلان حمرا انا لما شفته استغربيت جداً

أزاي يقدموا برنامج بالاسم ده و طبعاً المعني في"بطن" الشاعر أنما مصيبتي كانت أكبر لم عرفت مين اللي بيقدموا ... قامة إعلامية كبيرة وله باع طويل في الصحافة و رئيس تحرير جريدة شهيرة جداً (جريدة الدستور المصرية)  أزاي يقدم برنامج بالاسم ده؟؟؟

و لما تشوف البرومو و تعرف أنه مستضيف مين ؟ ممكن تصوت بأعلي صوتك و تقول


  هي الناس حصل لها أيه ؟

أزاي ناس من أمثال أيمن نور اللي كان - و لازال -  ممكن يكون رئيس الجمهورية  يكون طلع في برنامج اسمه حمرا !!!! 

أزاي مفيد فوزي وبثينة كامل و معتز الدمرداش و زاهي حواس و عمرو أديب و محمود سعد و بلال فضل يطلعوا في برنامج اسمه حمرا ؟؟؟؟ 



الإعلانات 


الأعلانت كثرت أوي في التليفزيون وفي الصحف لأن القنوات التليفزيونية  زادت أوي و بقت ملهاش حصر، من نوعية الاعلانات اللي أنا حفظتها الاعلان عن المنتج الطبي العجيب No Pain Cream اللي بيشفيك من أخطر الأمراض زي الام العمود الفقري اللي بيروح أول ما تستخدمه ، الأعلان مستفز جداً و كأنه بيقولك لك بلا طب بلا نيلة بقي ، خليك معانا و أنت تكسب و أسأل مجرب و لا تسأل طبيب 


و إعلانات 0900 اللي كثرت أوي أوي أوي  ...

خد عندك

 اتصل لو عندك مشكلة عاطفية أو لو عايز تفسرحلمك أو للدردشة مع أحمد عبدون أو لو عايزة تعرفي هتطبخي أيه النهاردة ولو عايزة تعرفي برجك أيه و أوراق التاروت بتقول لك ايه ؟ ( مش عارف ايه أوراق التاروت دي كمان ) و اتصلي علشان تعرفي أفضل حماية لبشرتك أزاي و اتصل علشان أزاي تحل مشاكلك الجنسية مع زوجتك في سرية تامة و أتصل علشان تنزل أغاني نجمك المفضل و اتصل علشان تنزل اللعبة الخطيرة و تلعب أنت و صحابك و اتصل علشان تنزل الأدعية الدينية و المصحف و الامساكية و اتصل علشان تكسب حج و عمرة و اتصل  علشان تعرف مين المجرم الخطير اللي اكتشفه المفتش كرمبو مهيب الركن و اتصل علشان تعرف جحا اتسجن ليه؟ و اتصل علشان نخرب  بيتك و نضيع فلوسك علي الفاضي ....إلخ، إلخ 


و طبعاً لأن الاعلام مش بس تليفزيون ، لا الأعلام تلفزيون و راديو و صحافة و كتب و مجلات و أي وسيلة أخري فأنا احب أنقل كلمة كنت سمعها من أستاذ فاروق جويدة كان بيقول  فيها "ليس العبرة بكم ما ينشر أنما العبرة بكم ما يؤثر في الناس"

و ألا فإن مصر بها الكثير من دور النشر و بها اّلاف المطبوعات من صحف و مجلات و درويات و إذهب إلي أي موزع صحف و ستعرف أن الكم كبير و لكن هل هو مهم ؟؟؟!

لا اعتقد ...

يعني مثلاً في قصة قصيرة كنت قراتها ووجدتها صدفة في الفيس بوك و دي مفروض منشورة في جريدة ... أحب اسيبكم تقرأوها أنتم بقي لأن أنا مش لاقي تعليق اقوله عليها !
اضغط علي الصورة للتكبير أو اقرأها علي صفحة الكاتب في الفيس بوك 

لو حد تحجج بان أحنا عندنا مشروع قومي كبير اسمه "مهرجان القراءة للجميع" فسأقول له اسكت!!  ... فمهرجان القراءة للجميع لا ينشر ألا المنخنقة والموقوذة و المتردية و ما رفض السبع أن يأكله من الكتب - علي رأي عمنا بلال فضل - أنا اشتريت كتب قبل كده من مكتبة الأسرة و كانت غاية في السوء منها ما به شتائم صريحة "ش" و "خ"و"و" و غير ذلك أما الكتب التي بها هدم للعقيدة فهذه كثيرة جداً و قد وقع في يدي منها الكثير و الكتب التي بها قصص جنسية أيضاً وجدتها في مكتبة الأسرة !!

كتب أخري من نوعية الكتب التي لا يقرأها ألا الاكاديميون وهي  متخصصة جداً عن السينما أو المسرح أو الكتب العلمية البحته  أجدها ملقاة في مكتبة الأسرة !! 

أين أذن حق الثقافة للشعب المصري و للشباب المصري خاصة ً .. لا شئ يا ولدي

أين الرويات العالمية المترجمة و الكتب الخاصة بالشعر العفيف والجميل و كتب دينية وسطية لا علامانية و لا كما رأت بأم عيني في المكتبة علي مر سنوات أتابع فيها المكتبة !!!

مكتبة الأسرة أو مهرجان القراءة للجميع مشترك فيه عدة وزارات ، وزراة الثقافة و الشباب و التنمية المحلية و غيرها و ميزانيتها كبيرة جداً و لكن ما الفائدة  ... لا شئ !!!


لا أنكر أننها تطبع بعض الكتب المفيدة و لكن غيض من فيض و قليل من كثير لا يكفي  و في الأول و في الأخر هما يشكروا علي مجهودهم ده بس يا ريت يطبعوا كتب ممكن قرأتها و الاستفادة منها  و أما الزبد فيذهب جفاءاً و أما ما ينفع الناس فيمكث في الأرض 

الخلاصة ... أنت و ما تقرأ و ما تشاهد فإذا كنت تقرأ و تشاهد و تتابع العقلاء و هم موجودين - الحمد لله - فأنت ستكون كذلك أما إذا اتبعت التلفزيون و هطرقته فلن تحصد ألا خيبة الأمل ...


كويس أنك وصلات لأخر التدوينة و أديني بقولك تاني برضه 

معذرة للاطالة (:

هناك ١٦ تعليقًا:

آخر أيام الخريف يقول...

بص انا معاك فى كل ما كتبت ما عدا حتة الميزان الأخلاقى و الدينى للأعمال الفنية ... يعنى من حيث ان الشذوذ انتشر ايوه انتشر بنسب مخيفة للأسف بس لسه شىء من الحياء موجود فبيتداروا أو بيحاولوا يتداروا لأن الناس حواليهم برضه بتبقى عارفة , ولو دورت فى المدونات هتلاقى منهم اكتر مما تتخيل . عموماً ما اتعودتش ابص لعمل فنى او ادبى من زاوية ان ده يصح و ده ما يصحش او ده حلال و ده حرام .... يعنى م الآخر انا منهم ...أيوه أيوه ... بتوع حرية الإبداع و مشجعى خالد يوسف مع تحفظى على زيادة جرعة المشاهد الإباحية فى افلامه الأخيرة بدون مبرر.....لكن لحد حين ميسرة مثلاً كان ماشى كويس قوى . ارجو انك ما تكونش اتصدمت فيا ...... :)))))

غير عن كده تسلم ايدك بصراحة مقال فى الجون خصوصاً موضوع الجزائر ,انا صوتى اتنبح يا بنى بقول الكلام ده و ما نابنى الا الشتيمة و الخيانة و العمالة و اللستة اللى بالك فيها .

مقال حلو فعلاً. تحياتى

سكندري يقول...

أولا كويس أوي أنك وصلتي لأخر التدوينة دي ... انا كنت حاسس أنها طويلة و ما حدش هيوصل للأخر ...

ثانياً :- أنا اقصد أن الحرية مهما وصلت فلازم يكون لها حدود و اللي نقدر عليه بالمشاهد الاباحية و الكلمات البذيئة دي ممكن برده نعبر عليه بصورة أفضل من كده و هيوصل المعني و يتفهم كويس جداً
و بالنسبة للشذوذ الجنسي أنا مش عارف فعلاً هو كتير و لا ايه و ما دورتش علي المودنات بس مهما كانت كتير برضه مش لازم أجيب مشاهد يكون فيها الاتنين ( سواء رجالة أو ستات ) علي سرير واحد ..

كفاية أني اتكلم عن الموضوع و هي هتتفهم لوحدها

أذكر أني قريت مرة أن طه حسين كان لما يحب يذكر في رواية له أن البطل سيلتقي مع زوجته كان بيقول أنهما دخلا و أغلقا الباب عليهاما من الداخل ... بس خلاص

ما فيش جرح للمشاهد و لا للاخلاق بتاعته

أنما اللي بيعمله خالد يوسف زاد عن الحد

في فيلم كلمني شكراً مثلاً أيه لازمة ظهور غادة عبد الرازق بالشكل ده ؟؟؟
بجد حاجة وحشة جداً

في فيلم دكان شحاته أيه لازمة هيفاء اللي هي مش ممثلة أصلاً تطلع تمثل و معروف طبعاً هي طالعة ليه ؟

مش علشان موهبتها الفنية الصارخة ؟؟؟

أكيد علشان حاجة تانية خالص !!!

أما موضوع الجزائر و مصر ده فانا بقي كنت شوية شوية هبوس أيد الناس علشان تبطل تتكلم علي الفاضي و يبطلوا يولعوا في الامور أكثر ما هي مولعة و كل واحد يقول لي شوفت الجزائريين و لاد الـ .... عملوا ايه في المصريين و انت ولا شفت و لا عرفت
بس الاعلام بقي هو اللي ودي الدنيا في داهية

علي فكرة انا مش مصدوم فيكي و لا حاجة
كل واحد له حرية الرأي المهم نقدر نتفاهم كويس
و شكراً علي مرمروك

آخر أيام الخريف يقول...

"كفاية أني اتكلم عن الموضوع و هي هتتفهم لوحدها

أذكر أني قريت مرة أن طه حسين كان لما يحب يذكر في رواية له أن البطل سيلتقي مع زوجته كان بيقول أنهما دخلا و أغلقا الباب عليهاما من الداخل ... بس خلاص

ما فيش جرح للمشاهد و لا للاخلاق بتاعته

أنما اللي بيعمله خالد يوسف زاد عن الحد "

فى هذا نتفق تماما... أفلامه الأخيرة فعلا أوفر.

"كل واحد له حرية الرأي المهم نقدر نتفاهم كويس"

يا ريت الناس كلها زيك ...احييك على تفكيرك المستنير و عقلك الراجح .

سكندري يقول...

شكراً ليكي ... و مرحباً بيكي في المدونة (:

ساسو يقول...

موضوع في منتهي الجمال
بجد بجد تسلم ايدك


تقبل مروري

سكندري يقول...

أهلا بيكي يا ساسو
و كويس أن الموضوع عجبك
منوراني في المدونة

Amr Awwad يقول...

والله ما حسيت بطول التدوينه , التدوينه رائعة
ولكن دعنى قبل الثناء والشكر والكلام الحلو الكتير اللى هقوله
ازعق شويه واقولك ملكش دعوه بام كلثوم ولا حتى بالمسلسل بتاعها عشان اولا ام كلثوم يعنى ( ام كلثوم ) مش محتاجة شرح , والمسلسل فى وجهة نظرى الغير نقديه والغير محايده على الاطلاق ما دام الوضع يخص ام كلثوم فهو رائع

---

كدة انا زعقت نبداء بقى فى الاعجاب
وانا اوفقك كل الاتفاق حتى ان كثيرا مما كتبته , احضر لتناوله ولكن انا أأخذ موضوعا موضوعا بتفصيل اكبر
---
فموضوع الاعلام الرياضى او كما اسميه اعلام كرة القدم لان هذه القنوات لا تعرف غير كرة القدم رياضة
فهؤلاء كارثة بكل القاييس يخبون بفضائح الاعبين ولا يخبرونا بمحاسنهم ( انهم اعلام لجلب الفلوس فالناس تحب الفضائح )
والمسلسلات والافلام المسفة كلها عايزه الحرق ولك كل الحق فى موضوع تناول الاراهبى على انه بزقن ودائما يتكلم بأسم الدين فهذه من اكثر كوارث السينما على الاطلاق
اما برنامج حمرا فاعتقد رغم اسمه المستفز فسيكون جيد
ولكن هذه هى الاسماء التجاريه ( اللى بتجيب الكاشات )
واخيرا فعن الكتب فانا افضل سوق الازبكيه عن مهرجان القراءة للجميع الذى يؤكد ماخرا فى اعلانته انك لازم تروح المكتبة عشان تتثقف فى الوقت اللى عمرى ما شفت مكتبه عامه فى منطقتى ولا المناطق المجاوره ( ولا هشوف )

شكلى طولت ؟ ... اعترف طولت ؟

Amr Awwad يقول...

اتفق معك فى كل ما قلته فالاعلام الرياضى او كما احب ان اسميه ( اعلام كرة القدم ) فهو لا يعرف غير كرة القدم رياضة كارثة بكل المقايس يكفى ان الاخ مدحت شلبى بيطلع يتكلم 9 ساعات متواصلة كل اسبوع لو بيشرح نسبية اينشتين كان خلصنا
والافلام ايضا عليها علامات استفهام كثيره فلا تفهم ما هى الفكرة الذى يريد ان يوصلها ( الا اذا كان كل ما يريده هو الاباحيه وتشويه الدين وتعليم التفاهه )
واخيرا الكتب التى لا نفهم منها شيئا فى الغالب
واكتر شئ بيغظنى اعلانات القراءه للجميع
اللى بتلح عليا انى اروح المكتبة عشان اقرا واتثقف وانا عمرى ما شفت مكتبة عامه الا ما ندر ( وفى الغالب مش هشوف )
تحياتى للاسلوب الجميل

-------

ملحظة ملكش دعوه بمسلسل ام كلثوم ( انا بحبه ) :D

سكندري يقول...

اهلا بيك يا أستاذ عمرو في المدونة منور والله ...

يمكن أنت ما حستش بطول التدوينة بس أنا حسيت أصل انا مش بكتب تدوينات طويلة نوعاً ما و قعدت اكتب في التدوينة دي كتير فحسيت بطولها ...ما علينا

زعق زي ما أنت عايز المهم بصوت واطي علشان ماحد ش في المدونات التانية يكون نايم و لا حاجة و أنت تصحيه D:

بالنسبة لمسلسل أم كلثوم فده فعلاً كان مسلسل جميل ، أنا فاكر اني اتفرجت عليه كامل أيام ما كان ببتعرض ،

أنا جبت سيرته بس علشان أجمع مسلسلات السير الذاتية اللي أكيد بتتفق معايا أنها لا تغني و لا تسمن من جوع !! و أن قلتها أحسن بكثييييير ...

علي العموم انا في انتظار التناول اللي أكيد هيبقي رائع لموضوعاتك اللي بتحضرها دلوقتي

بخصوص برنامج حمرا فهيبقي كويس أكيد لأن الناس اللي موجودة فيه مش قليلين و كفاية إبراهيم عيسي ده ممكن يقوم بالبرنامج لوحده من غير ما يستضيف حد
بس الاسم متسفز جداً و الطريقة اللي المستضيفين بيقولوا الكلمة بيها أكثر استفزازاً

و بالنسبة لمكتبة الاسرة فأنا برضه عمري ما شفت مكتبة عامة من اللي بيقولوا عليها دي ...

و مرة كنت في السويس لاقيت مكتبة كده غريبة علي الكورنيش و لاقيت الاطفال قاعدين بيلعبوا ألعاب الفلاش و الكبار علي الفيس بوك أو الشات !!!!

مساء الانوار يا كابتن عواد (:

Hema .......ibrooo يقول...

ma32eny ba5talef ma3aaak fe 7agat keteer we laken besara7aa beye3gebny 2eslobaaak ya abo 7meeeeeed we tare2tak fe el nazaar lel modoo3 we lakeen mesh shayeef 2enak mota7amel shwayaa 3ala betoo3 el cinema we el 2aflam la2en men weghet nazary el motawad3aa 2en el cinema lazeeem ten2el kol el beye7sal fe el mogtama3 sawaa2 daah kan we7eesh wala 7eloo wala 7alaal wala 7araam la2en el cinema heyaa merayeet el mogtama3 we lo kont shayef nafsaak we7esh fe el merayaa da mayeb2ash el 3eeb fe el merayaa da yeb2aa el 3eeb feek 2enty we yakfy 2enak shoft 3eyoobak fe el meraya dee la 2en feeh nass 3ayeshaa we mabetbosesh fe el merayaa we teshoof 3eyobhaaa fakraa nafsahaa heya el saa7 we daa door el betel3aboo el cinema fa 2enty mata5galsh men el cinema beta3etny laken 2e5gal men el mogtama3 el 2enty 3ayeeesh feeeeeeeh......
2ama belsesba le mosalsalat el seraa el zateyaaa fa 2ana ma3ak fe weghet nazarak heya beteb2aa 7abka derameya we kaman beteb2a sard 2a7dass men weghet nazar el kateeb laken lehaa fayedaa keberaa yemken ma kontesh 3arefhaa 2ela lama 2o5ty el so3'ayara sa2aletny meen 2om kalsoom dee fala2et 2eny mogarad lama 2a2olahaa de kaneet mo3'aneyaa 3azemaaa la2etoo moshkefayaa we kaman sa3b 2ageblahaa kotob 3anahaa e2raa fehaa la2en 2enty 3areef 2ad 2eeh 2en el 2agyal el gededaa bet7eb el ma3lomaa el sare3aaa we el sahlaaa we ba333d kam yoom kedaa sa2aletny meen 3abd el 7aleem 7afeez daa fala2eet el 2egaba sa3ba bardoo teosalahaa we hena gatly fekret 2eny 2a5aleha tetfarag 3ala el mosalsalat beta3ethoom la2en mesh ma32olaa yekonoo 3arfeeen sha3ban 3abd el re7eem we maye3rafoosh 3abd el 7aleeem
we thanx lel 2erayaaaa
we sorry lel 2etalaaaa

سكندري يقول...

أهلاً بالباشمحامي اللي نفسه يبقي باشممثل قد الدنيا و أنا متأكد انك هتمثل في يوم من الأيام و لو حتي قدام المرايا D :D:

شكراً علي إطرائك الجميل ده و بالنسبة لنظرتي الحلوة دي فده ببساطة لأني لسه مغير النظارة قريب D :D:

و لأنك دارس سينما فأنا اللي جبت ده كله لنفسي لما قلت لك أقرأ الموضوع ده
المهم يا سيدي معاك حق السينما مرايا و لازم تبين الكويس و الوحش و أن كانت المفروض تيبن الوحش و تصحله علشان يبقي كده عملت اللي عليها و زيادة و تشكر بقي D :D:

أنما انت شايف أن السينما دلوقتي بتبين الكويس و الوحش و لو بينت الوحش بيكون أزاي

الوحش غالباً بيكون معروف بس المفروض نصلحة يعني مثلاً قولي لي أن في حاجة اسمها شذوذ جنسي بس ما تجبش اثنين علي سرير واحد تقريباً مش لابسين و موجودين تحت البطانية و النور ينطفا و يحصل شوية حركات كده و بعدين تقول لي أن السينما كده بتعالج الشذوذ الجنسي

و ما تجبش واحدة قدام الكمبيوتر بتشحن موبايلة عن طريق أنها بتكشف الجزء العلوي كله منها قدام اللي يشحن لها علي الموبايل و تجيب لي الصورة بالظبط و بعدين تقول لي السينما بتصلح ؟

و ما تجبليش هيفاء وهبي كله اللي بتعممله أنها جاية تُقبل و تتحضن و غيره من البطل و غيره ، ايه الفكرة بقي في كده !!!

أما بالنسبة لمسلسلات السيرة الذاتية فانا فعلاً شفت مسلسل أم كلثوم و علي فكرة ما خدش بالي اني كاتبه الا لما عمرو عواد كتب لي بس فعلاً هو مسلسل جميل جداً أنما الباقي بقي معلش أنا عند رأيي و ما تقوليش اختك الصغيرة ، لان اخنك أخر حاجة ممكن تعرفها هي أن أم كلثوم دي مطربة مشهورة و تشوف الحبكة الدرامية بتاعتها ماشي أنما أنا بتكلم علي المط الفاضي اللي في بقية المسلسلات يعني مش كل واحد عمل حاجة كويسة سواء كان ممثل و لا مطرب و لا كاتب مثلاً زي قاسم أمين نعمل مسلسل ثلاثيني (30 حلقة يعني) طيب لو هما فعلاً عايزين يبينوا مميزات الناس دي و تاريخهم يبقي في ناس يكفي لها 5 حلقات عنهم أو بالكثير 10 حلقات و نعمل مسلسل علي عدة أجزاء كل جزء مثلاً يبقي فيه عدة شخصيات لو فعلاً عايزين يبيبولنا أهمية الناس دي بس أنت عارف يا صديق ان السينما تجارة بشكل كبير جداً و كذلك الدراما برضه
و انت عارف ان السنة دي سوق السينما مضروب ايه اللي حصل ببساطة سوق الدراما عمل 60 مسلسل و برامج بالعبيط مع الاعتذار الشديد لكل عبيط

يلا بقي أنا طولت عليك
علشان خاطري ابقي اكتب عربي
سلام
 

Lionel Messi يقول...

بجد جااااااااامده مش هقول غير كلمه واحده حـــــــــــــمرا

سكندري يقول...

##Lionel Messi##
منور يا ميسي

غير معرف يقول...

ايه ده أنا ازاي ماخدتش بالي من الموضوع ده غير دلوقت !!

مش هاقدر اقولك غير إنك جبت م الآخر وقلت كل اللي يمكن يتقال

:)

غير معرف يقول...

صحيح نسيت اقولك حاجة مهمة

عنوان التدوينة الاعلام الهادف والاعلام الهايف

انت اتكلمت بأسلوب ولا أروع عن الاعلام الهايف

عايزين بقا تدوينة تانية عن الاعلام الهادف :) وازاي نقدر نستغل الاعلام في صالحنا وايه الامثلة الموجودة اللى تدل على ان الامل لسا موجود

بجد نفسي في تدوينة عن الموضوع ده :)

سكندري يقول...

##سمو الأمير ##
شكراً علي كلامك الجميل
بس ما اوعدكش أني هكتب عن الأعلام الهادف ... بضدها تتضح الأشياء

عرفت الشر لا للشر و لكن لتوقيه و من لا يعرف الشر من الخير وقع فيه
أنت هتعرف الكويس من الوحش لو عرفت الوحش و اتجبته ببساطة كده

طيب ما تكتب أنت بقي عن الاعلام الهادف D: