نصباية


ليست من أصحاب الخبرة - التي يطلب صاحب السؤال منهم الرد - و لكن هذا الموضوع استفزني للرد عليه في أحد المنتديات التي كنت أرتداها في فترة ما ، و حبيت أنقله هنا في المدونة ، حتي لا نُخدع من نصابين الأنترنت اللي بيلعبوا علي الوتر الحساس  ...
 السؤال :-
يا جماعه أنا من عادتى أني بدخل علي النت كتير أبعث CVs من زمان لمواقع بترول من فتره قديمة وأنا طبيب عملت لمده سنتين بقطاع البترول وتركته من فتره كبيرة ووجدت هذا الأيميل جايلى ومش فاهم منه حاجة...... ممكن حد من أصحاب الخبرة يقوللى الأيميل ده صحيح ومن شركه حقيقية ولا نصب عن طريق النت ..
رفعت الأيميل في ملف ورد علي موقع ميديا فاير علي الرابط التالي 
ردي 
أنا لسه مبعوت لي إيميل من دول الأسبوع اللي فات ، بص أنا من غير ما أقرأ الاميل ده - و فعلاً أنا ما كنتش قريت الأيميل أقدر اقول لك أن الأيميل ده نصباية كبيرة و اللي بيحصل إن النصابين دول بيدخلوا في مواقع التوظيف اللي حضرتك مشترك فيها و يسحبوا إيميلات كتير و يبعتوا و يستنوا لما السنارة تغمز و يعرفوا ينصبوا علي واحد...
تعالي اقولك ليه نصباية
اولاً ما فيش شركة محترمة مالهاش موقع علي النت و في جزء خاص بالـ Career تدخل فيها و تملي Application وهما بقي ساعتها لو عايزين تخصص حضرتك و مؤهلاتك تؤهلك للعمل عندهم يبقي هيتصلوا بيك يعملوا أنترفيو عن طريق التليفون الأول و بعدين يقولك تعالي الشركة يوم كذا الساعة كذا و يطلبوا الأوراق و الكلام ده كله...
ثانياً أتأكد من الأيميل اللي مبعوت منه أكيد هتلاقيه مثلاً aaa@gmail.com أو اي اسم تاني @ أي مزود خدمة الايميل طيب ده مهم في ايه ؟ اقولك ... ايه شركة محترمة عندها موقع بيكون لها عدة ايميلات علي الموقع ده يعني مثلاً شركة chevron هتلاقي ايميل لها عنوانهconaffrs@chevron.com يعني لازم يكون @اسم الشركة دي لأن مش معقول شركة  كبيرة هتعمل ايميل مجاني علي Yahoo او Gmail أو AOL و ما شابه من المواقع اللي بتقدم خدمة الأيميل المجاني ... هما يعني هيستخسروا في ايميل ؟؟؟؟؟؟؟ 
ثالثاً : لو حد منهم اتصل بيك هتلاقي رقم التلفون علي موبايلك اتأكد من رقم التليفون كويس و أعرف الكود بتاعه فين ؟ و قارن بينه و بين الشركة اللي باعته لك مقرها فين ؟   و تقدر تعرف بالبحث علي النت علي الأكواد بتاعت التليفون لدول العالم كله ... سهلة جداً،وغاباً هتلاقي الدولة اللي اتصلوا بيك منها مش هي الدولة اللي المفروض أن مقر الشركة فيها ، صاحبي اتصلوا بي علشان يشتغل في انجلترا و كلموه من نيجيريا !!!
رابعاً : شوف الايميل مبعوت لمين ؟ يعني في خانة TO هتلاقي مكتوب undisclosed receipt يعني مرسل اليه غير معرف بمعني أنه بعت الأيميل ده لالاف المستلمين مرة واحدة عن طريق خانة BCC أوBlind Carbon Copy  يعني المستلمين مش هيقدروا يشوفوا بعض ... يعني هو شغال بمبدأ الاحتمالات يبعت 1000 رسالة يغمز معاه 100 و يكمل 10 و ينصب علي 3 مثلاً و هكذا ... الكلام ده بقي حصل مع واحد صاحبي كان طالع Receptionist في أنجلترا بعد ما جاله أيميل من دول ، كل حاجة تمام ، مرتب ، مسكن ، فندق معروف ...إلخ ،و اقعد يوريني الورق كل ورقة بتبقي مختومة و كله علي سنجة عشرة لغاية ما جه في الاخر و قالوا له لازم علشان تشتغل في انجلترا تكون دافع تأمين علي حياتك و الحكومة هي اللي بتقول كده فأبعت لنا ما يوازي 10,000 جنية مصري ( مش فاكر كام يورو ) و الطريقة سهلة جداً أنت هتروح تفتح حساب في البنك و تحط الفلوس و تبعت لنا رقم الحساب و احنا هنقوم بالواجب و لما نخلص هنبعتلك تيجي علي طول ... طبعاً صاحبي اتنصب عليه في الـ 10,000 جنية و ما عرفش يطول منهم حاجة انا قلت اللي انا اعرفه في الموضوع ده ممكن لو حد عنده اضافة يبقي يقول برضه


هناك ٨ تعليقات:

سَارةٌ يقول...

يعني هيا جت عالنصب بس !!

المشكله ان الواحد بيتعلق بأوهام فاضيه وبيكون فعلاً في حاجه انه يتمسك بأي أمل .. ولما العرض بيجي بيكون مغري طبعاً ..

انا عن نفسي معتقدش ان فرص الشغل عالنت بتكون مضمونه لإن 80% بيكون زي مانت قولت اشتغالات مش اكتر .. :(

وربنا قال " لكل مجتهد نصيب " .. فـ المفروض الإنسان يكون عنده يقين اكتر من كده إن ربنا هيوفقه لو تعب ونزل يدور على شغل ..

اه صح البوست ده فكرني بمثل " حرص ولا تخون " .. يعن في المواضيع دي بالذات تكون حريص في كل حاجه هتعملها من وراق او رقم حساب وووغيره .. لكـن في نفس الوقت متخونش اللي قدامك بدون دليل مسبق ..

بوست مميز كعادتك .. :)

Tarkieb يقول...

هههههههه ده كله نصب ..انا كل يوم يجيلي ميل واحدة افريقية جوزها مات وفلوسها في البنك وعايزة فلوس قضية والورث بالنص هههههه....ع للتراش على طول يا باشا......بس التليفزيون المصري لحد وقت قريب كان هوت ميل وياهو ......مش شرط الدومين ده لشركات اوربية اوتوكيل

آخر أيام الخريف يقول...

مقال أكثر من موفق ... ميرسى جداً يا باشمهندس :))

سكندري يقول...

##حباية بندول##
أهلاً بيكي و عيد سعيد

في البداية بس افكرك أن

"لكل مجتهد نصيب "

ده "قول مأثور" مش قراءن أو حديث قدسي

بالنسبة للعرض بيكون فعلاً مغري جداً

ما هو لازم يشد اللي عايز يشتغل ده

علشان يجيب رجله بسرعة

علي العموم النت ده مش مضمون في حاجة

بس برضه لازم الواحد يستفاد منه

أقصي استفادة ممكنة

سكندري يقول...

##تركيب#

أهلاً يا تيكو و عيد سعيد
أنا كنت بتكلم هنا علي موضوع الشغل بس أنما النصب بالنسبة لموضوع الثري الافريقي اللي معاه ملايين و عنده بت واحدة و لازم افتح حساب و يحولوا الفلوس عليها و بالنص فالرسالة دي جت لي كتييييييييييييير أوي
فاكرنا داقيين عصافير كناري و لا ايه ؟

بس علي فكرة في ناس بيضحك عيلها كتير برضه ... زي صاحبي اللي قلت عليه ده

و بالنسية لمعلومة التلفزيون المصري فأنا الصراحة مش عارف الموضوع ده ، أنا بقالي حوالي 6 سنين ما شفتش التلفزيون المصري ده ،في فترة كانت الوصلة مسيطرة و بعدين الريسيفر ، أنا مش بشوف القنوات دي خالص
بس حالياً كل موقع بيتعمل بيبقي في ايميلات عليه زي ما أنا قلت يعني الموضوع مش مكلف كده مده اللي بيشتري دومين بيبقي عليه ايميلات

سكندري يقول...

## أخر أيام الخريف #
العفو يا دكتورة ... و عيد سعييييييد

غير معرف يقول...

بص يا باشا

النصب عن الطريق النت منتشر جداااااا
للاسف معظم الشعب المصري معندوش وعي ولا ثقافة بالانترنت ده غير انه محروم من حاجات كتير فمبيصدق انه يلاقي حد يعرضها عليه وبالسهولة دي ويبقي فاكر نفسه برم انه جابها من النت ويلبس الخازوق كاملا ليندب حظه بعد ذلك
يا تري بقي جاتلك رسالة الست بتاعة كوتديفوار؟؟؟؟؟؟
وبعدين دي صياغتها عبيطة اساسا وانا مصدقش ان فيه ناس ممكن تنخدع فيها
بقي فيه 10 مليون دولار في كوتديفوار؟؟؟ انا كل اللي اعرفه عنهم دروجبا
ههههههههههههههههه

سكندري يقول...

##GURU##
اهلاً بيك في أول زيارة لمدونتي المتواضعة ، و إن شاء الله ما تكنش الأخبرة
طبعاً الرسالة دي جت لي من أول ما ابتديت استخدم الانترنت و لغاية دلوقتي بتيجي رسايل مشابهة بدول و اسماء مختلفة
عادي يعني
أنا اتعودت
بس صاحبي اللي قلت لك عليه كانت كل حاجة ماشية رسمي جداً و كأنها حقيقي ، دا كان بيسلم عليناعلشان مسافر ... تصدق !!
الحهل و الفقر ألد أعداء الإنسان