Batch or Continuous Process

في الصناعات الكميائية ، في تفاعلات بتتم عن طريق دوري Batch بمعني أن المفاعل  Reactor بيتملي بالمادة الخام و يتم التفاعل و بعدين نفتح المفاعل و يبدأ تفريغ المادة المتفاعلة وتدخل بعد كده طريقها في المعالجة و التصنيع و التعبئة و حاجة زي دي بتحصل في شركات الأدوية مثلاً ، مش معقول شركة الأدوية  هتفضل تنتج أسبريين طول عمرها ... لا .. دي بتنتج ألاف الأدوية ، يبقي كل شوية هما يدخلوا المادة الخام بتاعت الدواء اللي عايزين يعملوه و بعدين يفضوا المفاعل و يبدأوا يعملوا حاجة تانية ، و لو بصيت علي أي علبة دواء هتلاقي مكتوب في اخرها"Batch no"  أو "رقم التشغيلة" و هو ده الرقم اللي الي اتعمل به الـ batch  ده .... هو ده ال Batch Process  باختصار شديد ..
في حاجة تانية بقي اسمها continuous process ومعناها أن المادة الخام تفضل داخلة في المفاعل وتتفاعل و يخرج المادة المتفاعلة ، كل ده في نفس الوقت، يعني في كل ثانية في مادة خام داخلة المفاعل ومواد بتتفاعل ومادة خارجة منه ، علي طول في مادة بتتفاعل جوه المفاعل ده ...تمام كده ..

اللي بيتم في التعليم دلوقتي هو أنها بقت عبارة عن شوية batches يدخل الطالب من دول في اول السنة أولي حضانة و لأنه مش عارف يعني أيه تعليم يقوم يدخل يعرف المعلومات طول السنة يقعد يحفظ فيها يا ولداه لغاية ما يجيلوه تخمة و يدخل الامتحان يعمل فتحة في دماغة يفضي منها المعلومات الكتير اللي ملهاش لازمة دي ، بلا وجع دماغ ، و يتكررالأمر لغاية ما يخرج من الكلية ..
دكتور(أحمد خالد توفيق) كان حكي مرة عن كتاب الحاسب للصف السادس الإبتدائي اللي وصفه بأنه نحتاية  و استرزاق و كل سنة  الطلبة بتتعلم باوربونت و اللي يعيدوه يزيدوه و خلصنا ...
جاء رجل مرة إلي شاعر كبير - مش فاكر الأسماء  - فقال الرجل لشاعرنا أنه عايز يقول شعر ، فقال: له روح  احفظ 5000 بيت شعر و تعال لي بعد كده ... 
فذهب الرجل و حفظ الـ 5000 بيت شعر و جاء لشاعرنا فقال له الشاعر: أذهب فانسي الـ 5000 بيت شعر، فذهب و نساهم ، و بعد كده جه للشاعر  فالشاعر قال له له أنت دلوقتي تقدر تقول الشعر ...
اللي اقصد أقوله هنا أن اللي هيفضل في دماغه داخل مادة خام و دماغه كانت مهيأة  للتفاعل أكيد هيفضل يخرج منتجات علي أعلي مستوي هتكون محتاجة شوية معالجة .. ده أكيد ... بس هيفضل شغال دائماً 
التراكم المعلوماتي و الخبرة شئ مهم و مش بيجي من يوم و ليلة ...
و زي ما المفاعل ما اتبناش في يوم و ليلة و المصنع ما قمش علي رجل واحدة ده  نتيجة عمل الاف الناس من كميائيين و مهندسين وعمال وادرايين، هي دماغك  برضه ماهياش وليدة اللحظة و لو فكرت شوية هتلاقي اللي انت بتتعمله دلوقتي جالك من الاف الاشخاص و دماغك دي فيها مليون حاجة ، أنت قريت لده مقال و سمعت من ده كلمة وأبلة سعاد مدرسة ثانية ابتدائي اللي كانت بتقول لك البرتقالة و التفاحة و الجمع و الطرح وأستاذ صلاح اللي علمك Hate  وRate وقابلت عم  سماعين في الأتوبيس فقالك كلمة لغاية دوقتي فاكرها كويس و بتعمل بيها ... و ... و .. 
بس الخبرة دي بتقعد أد ايه علشان المفاعل يطلع مادة مصنعة ... كتير  ، مش من يوم وليلة ، ده الموضوع بيقعد سنين بحث و سنين بناء وسنين تشغيل لغاية ما الموضوع بيبقي سهل جداً بالنسبة لك..

قرايت مرة مقال يقول تعلم البرمجة في 10 ... سنوات 
اه 10 سنوات هو كان عايز يقولك لك أن التعليم مش من يوم و ليلة هتعرف كام حاجة في البرمجة و تعرف قاعدة IF  و حفظك لـ 5000 كلمة مش هيخليك الواد الفت في الانجليزي اللي ممكن يكتب أحسن من شكسبير و ديكنز  .. و معرفتك  لـ qui parle a qui مش هيفيدك بحاجة في الفرنساوي  ... انسي  ... أنما لو فضلت كل يوم تقرأ في البرمجة و تشوف برامج معمولة قبل كده و كل يوم تسمع و تتكلم و تقرأ انجليزي و فضلت تتعلم فرنساوي أكيد هتبقي محترف في البرمجة وما فيش صعوبة خالص في تعاملك مع الانجليزي أو الفرنساوي 
أما لو اتعلمت البرمجة علشان الـ 150 درجة بتوع الكلية اللي ممكن تجيبهم بحلك لامتحانين بتوع السنين اللي فاتت و حفظك لشوية كلمات ومواقف في الانجليزي هيخليك تجيب 25 / 25 في الانجليزي في الثانوي العام و أنت في الاخر ما تعرفش حاجة في أي حاجة 
مرة سألوا الاديب الفرنسي "فيكتور هوجو" عن كيفية كتابة كل هذه الروايات العظيمة و هو المعروف بأكثر كتاب الحب في فرنسا فرد و قال :أنا باكتب كل يوم سطرين و علشان كده  كتبت كل الكتب دي ...
يعني الواحد لازم يتعلم كل يوم حاجة جديدة يضيفها لمعلوماته وعلمه وعمله 
في حاجة مهمة جداً اسمها CANI  و ده اختصار للكلمات ديConstant And Never eding Improvment   يعني التطوير المستمر و ده نفس المبدأ الياباني kaizen  اللي هو برضه التطوير المستمر و ده اللي الناس اللي بتفهم في كل العالم بتعمله ، ما بحبش اقعد اقول الغرب و الشرق و الكلام الفاضي اللي مودينا ورا ده ... في ناس بتفهم في كل حته في الدنيا دي و أكيد في ناس بتطور من نفسها و لو ما كنش كده ما كنش خرج من القري المصري علماء كبار و كانوا قعدوا في قراهم  و لا حد سمع عنهم أي حاجة 
حياتنا كلها عبارة عن عملية مستمرة Continuous كل يوم بنكتسب في حاجة جديدة ، تتراكم علي المعلومات اللي قبلها و تطلع إنتاج كويس لأنك لو دخلتش مادة خام لدماغك أكيد دماغك هتقف و تصدي و لو دخلت مادة خام و ما عملتش بيها حاجة وما طلعتش إنتاج أكيد دماغك هتنفجر، و كل ما تطلع إنتاج و تقول المكنة طلعت قناش ، هتسمح لدماغك انها تتدخل حاجة تانية و هكذا ...
مرة سالوا الإمام (أحمد بن حنبل) : إلي متي يا إمام ؟ و كانوا قصدهم يعني هتفضل لغاية أمتي تقرأ و تتعلم و تعلم الناس كده قالهم رد بليغ أوي قال لهم: "مع المحبرة إلي المقبرة "
انتهي 

هناك 10 تعليقات:

آخر أيام الخريف يقول...

أتفق جداً جداً مع اللى كتبته ... ولو إنك قلبت عليا المواجع و فكرتنى بأيام الدراسات العليا و الكونينيوس و الباتش و الرو ماتيريل :))

صحيح انت بتشتغل ايه يا سكندرى ؟؟؟

سكندري يقول...

أهلاً بيكي يا دكتورة ... يسعدني أن الموضوع عجبك
فكرتيني صحيح ... انا نسيت أكتب تعريف عني في المدونة و بتعامل مع الزوار كأني الرأس الكبيرة في الأفلام بتاعت المخدرات اللي في الاخر بيطلع الجنايني هو الرأسي الكبيرة ههههههههههه

أنا اسمي أحمد عبد القادر، لسه متخرج السنة اللي فاتت 2009 من كلية هـ . البترول و التعدين بالسويس ...
D :D :D: D :D :D: D :D :D:

و بشتغل حالياً مهندس عمليات في إحدي الشركات،
وأنا كتبت الموضوع ده علشان أحمس نفسي شوية لأني داخل الشركة مش فاهم حاجة زي ما يكون جي من كوكب تاني ههههههه أنتي أكيد عارفة الفارق الرهيب بين الاكاديمي و العملي ...
ربنا يسهل الايام اللي جاية بقي (:
 

سمو الامير يقول...

هو انا ليه مش لاقي كلام اوصف بيه مقالك !!!!

:)

سكندري يقول...

سمو الأمير
ليه؟ ... هو وحش للدرجة دي ولا ايه ؟ ((:

حَـبآيـۃْ.بـטּـدۉڷ يقول...

liiiiiiiike awee ..

عجبتني كذا حاجه في البوست .. أولهم فكرته طبعاً .. عارف هيا دي المشكله

اننا في مراحلنا الدراسيه مبيعلموناش نتعلم عشان كده ..

انا عن نفسي بعمل زي مانت قولت ..
بحفظ الكلمتين بتوع الإنجليزي عشان اجيب مجموع الثانويه وأتباهى اني بعرف اتكلم انجليزي يعني :D .. يعني تخليص حق مش اكتر ..

بس البوست جميل جداً .. بيدي للواحد طاقه إيجابيه وبيحمسه إنه يغير طريقته العتيقه في التفكير والتصرف :)

//

اه على فكره انا من ساعة ما دخلت المدونه وانا مؤمنه إنك صحفي ياإما صحفي برده وكنت ناويه اسألك بتكتب فين ؟ :D:D

ماشاء الله جامع بين مجاليين اجمل من بعض .. ربنا يوفقك .. :)

سكندري يقول...

##حباية بندول##
صحفي
هههههههه بجد يا سارة ... انتي بتتكلمي بجد ، أنا أول مرة حد يقول لي أنت تنفع صحفي دي ، مرة واحد قال لي أنت تنفع محلل شخصيات ، وواحد قال لي دكتور وواحد قال لي مهندس أنما صحفي دي ماحدش قاللها لي قبل كده ،

بس أنتي لسه في بداية المشوار التعلمي "التعس" و يا رب يكون التدوينة دي غيرت شوية من طريقة تفكيرك، و اعملي زي الاعلان بيقول
"مية مية يا سارة احسبيها صح تعيشيها صح"
((:
منورة المدونة دائماً

آخر أيام الخريف يقول...

2009دفعة ..ياه ده انا حتشبسوت على كده ..دفعة 2005 ...!!!!

اكيد للأسف فيه فجوة كبيرة بين الأكاديمى و العملى ..بس بالممارسة كله بيبقى كويس . انا من ساعة ما سبت الصيدلية و اشتغلت فى الدعاية الطبية نسيت حاجات كتير للأسف .

سعيدة بالتعرف على حضرتك يا باشمهندس و بالتوغيق ان شاء الله :)))

سكندري يقول...

حتشبسوت ...ههههههه ليه بس ؟؟!
أنا الاسعد يا دكتورة

ربنا يسهل و الواحد يقدر يعرف الشغل بسرعة
و بالنيسبة للنسيان فأحياناً بحس أني بقرأ علشان انسي و اتعلم علشان انسي ههههههههههه
ساعات بيجي لي احساس أني نسيت كل حاجة درستها و قرأتها و عرفتها
بس هي الممارسة اللي بتخلي الواحد يجيب كل حاجة تانية

candy يقول...

معاك فى كل كلمة

انا هندسة كيميا

وبكره التعليم وباخد السنة فى سنتين

وبحب القراية جدا فى مجالى وعامتا وادب

ولا تعليق

سكندري يقول...

##كاندي##
أهلاً بيكي في المدونة، و مين مش بيكره التعليم ... ههههههههه
بس المهم نحب العلم و فرق شاسع بين الاثنين
التعليم حاجة غلسة بايخة ، العلم شئ جميل بيخليك تتعرف علي الدنيا و تفهم أكثر ...
بس حاولي تعصري علي نفسك ليمونة و تأخذي السنة في سنتها علشان تعملي اللي بتحبيه (: