ما دفعني لكتابة هذا التدوينة هو الصورة التي رأيتها علي موقع تويتر و التي كانت خاصة بتجربة لأحد الأعضاء من الموقع الشهير ... التجربة عبارة تغيير في لون الصورة الشخصية الخاصة به ... و التغييير يكون ببطء شديد ليتم تغير اللون من الاخضر إلي الاحمر في زمن قدرة 72 يوم .
لو تم التغيير في يوم أو يومين او شهر حتي سيلاحظ كل الذين يتبعونه تغيير اللون و لكن مع البطء الشديد في تغيير اللون لن يلاحظ أحد شيئاً .
و ده فعلاً الي بيحصل في أي حاجة في حياتنا ... الحياة مش ثابته علي حال و كل يوم لازم بيحصل تغييرات كتيرة أوي في حاجات صغيرة في حياتنا ...
الحاجات الصغيرة هي المسئولة عن هذا التغيير سواء كان للأحسن أو الاسوأ
في مثال بسيط جداً كلنا كنا بنعمله و أحنا صغيرين ... الحصالة ... زمان كل كل واحد منا عنده حصالة و حتي لو مش عنده كان بيجيب صفيحة بتاعت عصير و يغطيها بشكل حلو بورق كرتوني علشان يكون شكلها حلو ...
و كل يوم يدخل فيها قيمة معينة من المصروف ... ممكن شلن ... 10 قروش ... أو حتي نصف جنية ... المهم هو مش بيأثر خالص علي المصروف و بعد فترة كنا بنفتح الحصالة نلاقي فيها مبلغ وقدرة ... هو طبعاً مش مبلغ كبير أوي بس أكيد مبلغ كويس ممكن ينفع نشتري بي حاجة تفيد سنننا ... لعبةمثلاً ...
المقصود من الكلام ده كله أن الواحد كان بيعمل حاجات صغيرة جداً و كانت بتفرق كتير في الأخر
مثال تاني
لما تروح تدفع فاتورة التليفون و يبقي لك 35 قرش مثلاً و الراجل يقول لك معيش فكة ... تصور بقي الفكة الكتيرة دي تعمل معاه ايه في أخر اليوم ... والله أكتر مما تتصور
أخر مثال
لما كنت شغال في كافيه في الصيف من 5 سنين كنت باخد 250 مرتب يعني حوالي 8 جنية في اليوم أنما كان البقشيش اليومي أكتر من 10 جنية و كان الطبيعي بتاعي هو 15 جنية ... يعني ضعف القيمة اليومية للمرتب ...!!!
.
.
.
شفت بقي الحاجات الصغيرة تكبر أزاي و ممكن تعمل نتائج لا نتصورها في حياتنا
يعني مثلاً لو عايز تحفظ القران و كنت بتحفظ كل يوم سطر- مش هقول أيه علشان في ايات كبيرة شوية- ممكن تحفظ القران بعد أد ايه؟ اكيد المدة كبيرة ... !!!
بس الأثر برضه كبير جداً ... !!!
إذا أردت أن تري التغيير الفعلي في حياتك يجب أن تكون المده كبيرة و لا تستعجل النتائج ...
.
.
.
خير الأعمال أدومها وأن قل
.
.
.
صدق رسول الله صلي الله عليه و سلم
ليست هناك تعليقات:
إرسال تعليق