اللي بيحصل في مصر حالياً هو أننا بنأكل البلوظة و فرحانيين و كل واحد يطلع علي التلفزيون و يقول لك : "أنا بقدم فن راقي" و "أنا بدافع عن فني" و "فني هو حياتي" و يقول لك أن حريص أني اقدم للجمهور وجبة دسمة من الكوميديا أو مسلسل هادف أو أي كلام فاضي من ده و الحقيقة أن معظم ما لدينا من إعلام هو إعلام هايف و ليس هادف ، إعلام يغيب الناس عن الحقائق اللي المفروض يعرفوها و يكونوا علي اتصال مع العالم بها ...
اللي بيحصل في الجهاز الاعلامي بتاعنا ده ما يفرحش حبيب (بس بيفرح عدو طبعاً ) ...
تعالي مثلاً نفتح مع بعض التلفزيون ونشوف اللي موجود فيه
رياضة
مثلاً قنوات الكرة اللي بقت أكتر من الهم علي القلب، مودرن سبورت و الأهلي و قنوات الجزيرة والنايل لايف وغيرها من القنوات و دول قضيتهم الأساسية و شغلهم الشاغل هوالكلام عن الكرة و الرياضة، المفروض أنه يكون بالأيجاب و يكون فيه حث للناس علي ممارسة الرياضة و لعب كرة القدم و بيان الأخلاقيات الموجودة في كرة القدم و في الرياضة عموماً ،أنما ده مش بيحصل طبعاً ...
يعني مثلاً موضوع الجزئر ده قعد فترة كل واحد بيدلوا بدلوه فيه ( أو بجردله ) و بيشتم في الجزائرو الجزائريين لغاية ما كرهنا الجزائر و بقت عدوتنا اللدودة ، ده بعض الناس شبهتها باسرائيل !!!
وحتي اللي ما لوش فيها بقي بيتكلم شوفوا مثلاً الفيديو ده بتاع "الفنانة" الي اسمها "زينة" بتشتم في الجزائريين و رجالتهم و ستاتهم كأنها من الأنبياء و الجزائريين من الأبالسة ، حاجة زي دي فيها قضية سب و قذف لشعب بحاله !!!
و طبعاً مافيش مذيع أحترم نفسه و هدي الموضوع و قال يا جماعة مهما كان و مهما حصل دي رياضة و دول شعبين ما ينفعش نعمل كده مع بعض، لكن تقول أيه بقي الشعب لازم يهيج و يثور و كل المصريين يشتموا في الجزائريين و كل الجزائريين يلعنوا سنسفيل المصريين لأننا أسوأ من الأسرائيليين في نظرهم و لاننا مَن صَنع الجزائرايين في نظرنا !!!!
و نخرج من المشكلة دي بفجوة كبيرة بين مصر و الجزائر كشعوب لدرجة أن في ناس قالت أنا لو شفت واحد جزائري في الشارع هقتله !!! لأنهم شعب همجي ما يستحقش يعيش !!!!
فين دور الإعلام بقي هنا ؟
المواطن الساذج الغلبان اللي عايز يعرف الحقيقة راح فين ؟؟؟ طبعاً ترسخ في دماغه أن الجزائر هي العدو اللدود للمصريين و أن الجزائريين برضه قالوا أن المصريين دول فيهم مساؤي الدنيا و الكل عارف اللي كان بيتكتب في الجرائد و بيتقال علي شاشات التلفزيون
قضية شوبير و مرتضي منصور اللي مش بتخلص أبداً...
شوبير ساب الحياة و كان رايح O TV و بعد كده اتوقف و بعد كده عايز يروح مودرن مصر و مرتضي بيقول لازم يعتذر مروراً بقي بتدخل الشيخ خالد الجندي في الموضوع و بقي شكله وحش أوي ومروراً بأن شوبير قال أن في قيادات عليا كانت وراء مشكلة مصر مع الجزائر و غيرها كتير أوي، الموضوع ده بقاله بتاع 5 أشهر أنما أنه يخلص لا
أن واحد زي مرتضي منصور راجل كان مستشار ورئيس محكمة و يطلع يقول كلام سوقي و تعبيرات سوقية و شوبير اللي المفروض رياضي و إعلامي كبير و يخرج بسيديهات و كلام ما يصحش أن ناس زي دي تتكلم فيه...
هو مش المفروض برضه الرياضة بتهذب النفوس و أن الاعلام ده رسالة ؟؟؟؟!!!
و خد عندك بقي كل يوم يخرج يقولك مشكلة انتقال جدو للزمالك و أنه مضي عقد مع الاهلي و بعدين مشكلة الحضري و أنه هو كان يروح الاهلي و بكاؤه علي مودرن سبورت و بعدين يقولك أن مضي عقد مع الزمالك ؟؟؟
نخلص من ده يطلع لنا اللاعب الفلاني عايز يروح نادي كذا و اللعب الفلاني مصاب و العاب الفلاني صباعه متعور؟!!!
طيب أحنا استفدنا أيه من الكلام ده؟!!!؟
أنا أكاد اجزم أن أكثر من 90 % من متابعي الكورة في مصر لا يمارسون أي نوع من الرياضة !!! كل واحد يحمل كرشه قدامه و عمال يشتم في الفريق الفلاني و الفريق العلاني و الإعلام دورة في كده أنه بيولعها عي رأي المغنيين الشعبيين في الافراح "ولعها ولعها شعللها شعللها" !!!
أفلام
تعالي بقي للأفلام و قنوات الأفلام اللي بقت أكتر من الهم علي القلب برضه خد عندك قناة الحياة أفلام و كايرو سينما و روتانا سينما و دراما فيلم و روتانا زمان و قناة 1 و 2 من قنوات أوربت و يمكن في أكثر بس أنا ما اعرفش ده غير طبعاً الافلام اللي بتجي علي قنوات المنوعات ...
أيه هي أفكار الافلام بقي ؟ كلها أفلام أما سخيفة أو خليعة و لما يجي حد يتكلم يقول لك أنا ببين المشاكل اللي موجودة في مصر علشان نعرف نحلها !!!
طيب هي مشكلة الشذوذ الجنسي ده موجودة بدرجة كبيرة جداً للدرجة دي بحيث أنها تعرض في أكثر من فيلم و لا مشكلة العشوائيات لازم أعرضها و أجيب الناس تقول كلام سوقي شعبي دنئ علشان اعرف أن المشكلة موجودة و ماذا بعد العرض ؟؟!!!
لا شئ
أيه فائدة أن الشاب الكوميدي بيكون دائماً أبله و بقه معوج و شارب حشيش و أمه توصيه أن يشرب بيرة بعد ما يخلص الأمتحان ... يعني هو ده الشاب الكوميدي اللي بيضحك الناس و يخليهم يقهقهوا في السينما ...
أيه فائدة عرض المتدين دائماً رجل أهبل مدهول و مربي ذقنة ثلاثة متر و بيكون مرتشي و بتاع نسوان و لازم يكون إرهابي و معاه سلاح و بيكون ضد الحكومة ...
ليه أفلام المقاولات كثرت أوي اليومين دول و أفلام الأسفاف الخلقي اللي كلها مشاهد عارية أو كلمات بذيئة بقت كتيرة أوي ...أيه فائدة الرقابة و فين أصلاً مقصات الرقيب!!!
يمكن في ناس بتقول لك أن الموضوع عادي يعني ما تحطش في دماغك ما لوش تأثير ادينا بنضحك شوية و خلاص
بس للاسف الشديد بقي الافلام لها كبير الاثر علي الناس
بالله عليكم أنا عايز طفل صغير يكون شاف كام فيلم من بتوع الرجل المتدين الارهابي و بعدين يدخل مسجد و يلاقي الأمام ملتحي، ايه هيكون وجهة نظرة حول الرجل ده؟ أكيد ده إرهابي اللي بيشيل سلاح و بيقتل الناس !!!صح ؟و لا أنا غلطان ؟ هل هيقعد يتعلم منه حرف أو يصلي وراه ؟ لا طبعاً ما هو إرهابي أصلا ً !!!
شوف مثلاً الاطفال اللي في مدارس بعد مشاهدة مسرحيات تستهزأ بالمدرسين أيه هيكون رد فعلهم ؟! ..طبعاً المدرس ده عندهم وسيلة للسخرية و الاستهزاء و الضحك و لازم نعمل فيه كام موقف علشان نضحك عليه ...
اللي بيحصل للأطفال بعض فيلم اللمبي طبعاً بيعوجوا بئهم و يكلموا كلام مش مفهوم وده بيبوظ دماغهم (غيرأنها بايظة أصلاً في التعليم) يعين شباب الجيل الجاي ده متربي علي أفلام تافهة !!!
هل ممكن نترجم الافلام بتاعتنا دي و نعرضها بره (علي أساس أن مصر دي دولة جوة ) و تقول للناس ده فننا و ده بيعبر عننا وعن شعبنا ... وهي دي مصر ...
طيب ممكن مثلاً ، مثلاً واحد من برة مصر يجي يتفرج علي فيلم (اللمبي 8 جيجا) و هو مترجم طيب ده هيترجم ازاي أصلاً؟؟! ... ولا يشوف فيلم (الريس عمر حرب) و يعرف أن المصريين قاعدين في البارات و هاتك يا لعب و قمار لحد الصباح الماكر !!!!
هل أفلامنا بتعبر عننا كمصريين فعلاً ولا أحنا في طريق وهما في طريق تاني خالص !
تعالي لقنوات المسلسلات اللي برضه بقت كتير جداً ميلودي دراما و كايروا دراما وبانوراما دراما اللي بتسيب علامة في بيتك و سين و Art حكايات و مودرن روايات و غيرها كتير...
المسلسلات - معظمها - منحوتة علي قد البطل و بتكون ممطوطة علي قد الثلاثين يوم بتوع رمضان علشان الموسم الكبير بتاع المسلسلات ، قناة الحياة_1 كانت بتعلن عن االمسلسلات الحصرية بتاعتها من أول شهر خمسة يعني قبل رمضان ما يجي بـ 3 شهور ... ، المسلسلات أصلاً ما كنتش اتصورت ؟!!!!
و بعدين بدأوا في حاجة من كان سنة أنا شايف أنها ملهاش أي لازمة و هي مسلسلات السيرة الذاتية :- أم كلثوم ،اسمهان، إسماعيل ياسين ، السندريلا،عبد الحيلم حافظ و قاسم أمين و غيرهم - انا مش متابع أوي بس دول اللي اعرفهم - ... يوووووووووووه ايه ده كله !!
ما حدش يقول لي أن المسلسل بيعرض تاريخ الزمن اللي كان عايش فيه البطل و ده كلام فارغ طبعاً لأن الحبكة الدرامية بتخلي الأحداث تتغير و كل واحد شايفها بصورة غير الصورة !! يعني أنك تقرأ كتاب مهما كان حجمه أحسن لك من أنك تشوف مسلسل لا يقل عن 30 حلقة عن قصة حياة فنان أو فنانة و ده مش تحامل علي حد بقدر ما هو توضيح للأهم في حياتنا و اللي المفروض نعمله ...
توك شو
أما برامج التوك شو فدي بجد بقي حاجة تقرف .... أنا نفسي في حياتي أشوف برنامج توك شو و أكون فيه وجهة نظري الشخصية لأن كل برنامج توك شو بيستضيف عدد من الشخصيات و كلُُُُ له وجهة نظره الشخصية والمفروض أن المضيف - اللي هو المذيع - يدير حوار ما بينهم بحيث أقدر أطلع أنا بحاجة مفيدة واسمع كل واحد رأيه أيه في الموضوع اللي بيتكلموا فيه !!
بس أبقي قابلني ... المذيع ما بيدرش الحوار تلاقيه عمال يسكت في الضيف الاول مرة و الضيف الثاني مرة تانية و مرة واحدة يقولك هنطلع فاصل إعلاني و بعدين يقولك معانا مداخلة تليفونية و بعدين يقولك نعتذر للمشاهدين، احنا وقتنا محدود و أنا مضطر أقفل الحلقة و يجي التتر و شوية إعلانات و خلاص !!!!
المشاهد العادي اللي زيي و زي ملايين الناس اللي بتتفرج أيه هيكون اللي اتعلموه؟
و لا حاجة
أو خلينا نقول للأسف أنهم اتعملوا حاجة سلبية جداً ألا و هي أنك ما تسمعش الي قدامك غلوش عليه بالكلام وعلي صوتك و اقعد اتنطط علشان الناس تصدقك و خدوهم بالصوت ليغلبوكم ، أنا بعاني من المشكلة دي وهو أن ناس كتير جداً مش حابة تسمع تيجي تتكلم تلاقيه اتعود يقول رأيه في أي وقت و بأعلي صوت ...
و بعدين فين اداب الحوار بقي ؟؟؟؟
حمرا ...إبراهيم عيسي
من الحاجات برضه اللي ضايقتني جداً و أنا بشوف التليفزيون السنة دي أنه ما عدش في خطوط حمرا و ما عدش حاجة اسمها قدوة و قمم إعلامية ...
حاجة زي برنامج حمرا انا شفت إعلانه علي قناة موجة كوميدي - القناة اللي قدرت تلعب علي الوتر الحساس للمصريين وعرفت أنهم محتاجين هلس و كوميدي و حاجة تروح عن نفسهم و قدرت تتدخل كل بيت وتسيب علامة فيه لانه قناة خفيفة - المهم اعلان حمرا انا لما شفته استغربيت جداً
أزاي يقدموا برنامج بالاسم ده و طبعاً المعني في"بطن" الشاعر أنما مصيبتي كانت أكبر لم عرفت مين اللي بيقدموا ... قامة إعلامية كبيرة وله باع طويل في الصحافة و رئيس تحرير جريدة شهيرة جداً (جريدة الدستور المصرية) أزاي يقدم برنامج بالاسم ده؟؟؟
و لما تشوف البرومو و تعرف أنه مستضيف مين ؟ ممكن تصوت بأعلي صوتك و تقول
هي الناس حصل لها أيه ؟
أزاي ناس من أمثال أيمن نور اللي كان - و لازال - ممكن يكون رئيس الجمهورية يكون طلع في برنامج اسمه حمرا !!!!
أزاي مفيد فوزي وبثينة كامل و معتز الدمرداش و زاهي حواس و عمرو أديب و محمود سعد و بلال فضل يطلعوا في برنامج اسمه حمرا ؟؟؟؟
الإعلانات
الأعلانت كثرت أوي في التليفزيون وفي الصحف لأن القنوات التليفزيونية زادت أوي و بقت ملهاش حصر، من نوعية الاعلانات اللي أنا حفظتها الاعلان عن المنتج الطبي العجيب No Pain Cream اللي بيشفيك من أخطر الأمراض زي الام العمود الفقري اللي بيروح أول ما تستخدمه ، الأعلان مستفز جداً و كأنه بيقولك لك بلا طب بلا نيلة بقي ، خليك معانا و أنت تكسب و أسأل مجرب و لا تسأل طبيب
و إعلانات 0900 اللي كثرت أوي أوي أوي ...
خد عندك
اتصل لو عندك مشكلة عاطفية أو لو عايز تفسرحلمك أو للدردشة مع أحمد عبدون أو لو عايزة تعرفي هتطبخي أيه النهاردة ولو عايزة تعرفي برجك أيه و أوراق التاروت بتقول لك ايه ؟ ( مش عارف ايه أوراق التاروت دي كمان ) و اتصلي علشان تعرفي أفضل حماية لبشرتك أزاي و اتصل علشان أزاي تحل مشاكلك الجنسية مع زوجتك في سرية تامة و أتصل علشان تنزل أغاني نجمك المفضل و اتصل علشان تنزل اللعبة الخطيرة و تلعب أنت و صحابك و اتصل علشان تنزل الأدعية الدينية و المصحف و الامساكية و اتصل علشان تكسب حج و عمرة و اتصل علشان تعرف مين المجرم الخطير اللي اكتشفه المفتش كرمبو مهيب الركن و اتصل علشان تعرف جحا اتسجن ليه؟ و اتصل علشان نخرب بيتك و نضيع فلوسك علي الفاضي ....إلخ، إلخ
و طبعاً لأن الاعلام مش بس تليفزيون ، لا الأعلام تلفزيون و راديو و صحافة و كتب و مجلات و أي وسيلة أخري فأنا احب أنقل كلمة كنت سمعها من أستاذ فاروق جويدة كان بيقول فيها "ليس العبرة بكم ما ينشر أنما العبرة بكم ما يؤثر في الناس"
و ألا فإن مصر بها الكثير من دور النشر و بها اّلاف المطبوعات من صحف و مجلات و درويات و إذهب إلي أي موزع صحف و ستعرف أن الكم كبير و لكن هل هو مهم ؟؟؟!
لا اعتقد ...
يعني مثلاً في قصة قصيرة كنت قراتها ووجدتها صدفة في الفيس بوك و دي مفروض منشورة في جريدة ... أحب اسيبكم تقرأوها أنتم بقي لأن أنا مش لاقي تعليق اقوله عليها !
اضغط علي الصورة للتكبير أو اقرأها علي صفحة الكاتب في الفيس بوك
لو حد تحجج بان أحنا عندنا مشروع قومي كبير اسمه "مهرجان القراءة للجميع" فسأقول له اسكت!! ... فمهرجان القراءة للجميع لا ينشر ألا المنخنقة والموقوذة و المتردية و ما رفض السبع أن يأكله من الكتب - علي رأي عمنا بلال فضل - أنا اشتريت كتب قبل كده من مكتبة الأسرة و كانت غاية في السوء منها ما به شتائم صريحة "ش" و "خ"و"و" و غير ذلك أما الكتب التي بها هدم للعقيدة فهذه كثيرة جداً و قد وقع في يدي منها الكثير و الكتب التي بها قصص جنسية أيضاً وجدتها في مكتبة الأسرة !!
كتب أخري من نوعية الكتب التي لا يقرأها ألا الاكاديميون وهي متخصصة جداً عن السينما أو المسرح أو الكتب العلمية البحته أجدها ملقاة في مكتبة الأسرة !!
أين أذن حق الثقافة للشعب المصري و للشباب المصري خاصة ً .. لا شئ يا ولدي
أين الرويات العالمية المترجمة و الكتب الخاصة بالشعر العفيف والجميل و كتب دينية وسطية لا علامانية و لا كما رأت بأم عيني في المكتبة علي مر سنوات أتابع فيها المكتبة !!!
مكتبة الأسرة أو مهرجان القراءة للجميع مشترك فيه عدة وزارات ، وزراة الثقافة و الشباب و التنمية المحلية و غيرها و ميزانيتها كبيرة جداً و لكن ما الفائدة ... لا شئ !!!
لا أنكر أننها تطبع بعض الكتب المفيدة و لكن غيض من فيض و قليل من كثير لا يكفي و في الأول و في الأخر هما يشكروا علي مجهودهم ده بس يا ريت يطبعوا كتب ممكن قرأتها و الاستفادة منها و أما الزبد فيذهب جفاءاً و أما ما ينفع الناس فيمكث في الأرض
الخلاصة ... أنت و ما تقرأ و ما تشاهد فإذا كنت تقرأ و تشاهد و تتابع العقلاء و هم موجودين - الحمد لله - فأنت ستكون كذلك أما إذا اتبعت التلفزيون و هطرقته فلن تحصد ألا خيبة الأمل ...
كويس أنك وصلات لأخر التدوينة و أديني بقولك تاني برضه
معذرة للاطالة (:
