أقسم بالله أننى أحبهم جميعاً وأحترمهم لكنها القافية،
فقد لاحظت أن عدد الأطباء الذين يكتبون «المقالات» فى الصحف العربية المختلفة أكثر
من عدد الأطباء الذين يكتبون «الروشتات»
سين سؤال :- هي كلية الطب بيدرسوا فيها أدب ، لا مش قصدي أن الأطباء تحس كده أنهم
ناس محترمين و ولاد ناس أبداًَ و الله ، ما كلنا ولاد ناس، أنا قصدي هما بيدرسوا فيها
فن كتابة القصص و الرواية و الفنون المختلفة خصوصاً الأدب يعني و لا أيه ؟
أيه السؤال الغريب ده ؟
اه
ما لازم يكونوا بيدرسوا أدب أو بيعملوا امتحانات أن اللي عايز يدخل كلية الطب لازم
يكون كتب رواية قبل كده أو مشترك في مسابقة للقصة القصيرة أو بيعرف يمثل أو يرسم
لوحات فنية أو يغني أو يعمل أي حاجة لها علاقة بالفن علشان يقبل الدخول في كلية
الطب ... ما هو مش معقول كل الناس اللي متخرجة من الطب/الصيدلية دي و محترفة الفن بالطريقة
دي
عايز
امثلة .. خد عندك
- يوسف ادريس \ أديب : طبيب بشري
- يحي الفخراني \ ممثل : طبيب بشري
- عزت أبو عوف \ موسيقي وممثل : طبيب بشري
- فؤاد خليل \ ممثل كوميدي : طبيب أسنان
- د.علاء الأسواني \ أديب : طبيب أسنان
- نبيل فاروق \ كاتب : طبيب بشري
- نزيه \ رسام كاريكاتير : طبيب بشري
- د.نبيل فاروق \ أديي و صاحب عدة سلاسل كتب للجيب مثل السلسة الاشهر رجل المستحيل و كمان صحفي .
- د.أحمد خاللد توفيق \ طبيب بشري و كاتب الشباب الأشهر و يكتب في الصحافة و كاتب روايات و يعتبر أول من كتب في أدب الرعب في مصر و العالم العربي
- د مصطفي محمود \ غني عن التعريف طبعاً له الكثير من الكتب الأدبية و المسرحية ده غير الكتب الفلسفية و الدينية ، و برنامجه الأشهر العلم و الإيمان ذو الطابع الثقافي العلمي ، الديني الطبي تحس أن البرنامج ده بتاع كله ...
- د.أشرف حمدي فنان الكاريكتور المعروف صاحب مدونة كاريكاطظ ، طبيب أسنان ..
- د.ميشيل حنا\
ده
غير الناس اللي أنا متابعها من فترة و
مهتمة جداً بالأدب عموماً و الفن خصوصاً
عايز أمثلة خد عندك
- الرائع : أحمد الديب ... له صفحة علي الفيس بوك و له مدونة جميلة جداً اسمها في النص ، خريج كلية صيدلة ، صيدلية من طب مش مشكلة ، مش فارقة كثير يعني اهو كله منفذ علي بعضه ، احمد كان ماسك صفحة الدكتور أحمد خالد توفيق علي الفيس قبل ما يقرر غلقها و كمان له علاقات مع كتاب كبار أوي و صوره معاهم تدل علي كده ، أدخل علي صفحته و تعرف أنا قصدي ايه ...
- المدونة اخر أيام الخريف ، صاحبة مدونة بره الشبابيك لها مدونة رائعة برضه ، معظم موضوعاتها تدور في الفنون مرة تقرأ مقال عن زهرة الخشاش لما اتسرقت و مرة عن الشاعر عبد الرحيم منصور - رحمه الله - و مرة رأيها في الفيلم الفلاني و الأغينة الفلانية ، الصراحة أن بدخل هناك بتوه ... خريجة صيدلية برضه ...
- المدونة د.دودي صاحبة مدون رفايع و دي مدونة تكتب ملخص للكتب التي قرأتها ، بحس أني مش بقرأ حاجة جديدة مع أني بقول أني بحب القراءة ، معظم قراءتها عن الكتب القصصية و الرويات و الصراحة الملخص بيبقي وافي جداً لتقرر قراءة الكتاب أو لأ و برضه بدخل هناك بتوه ومش بعرف أكتب حاجة و أمشي و أنا ساكت !! وهي بتدرس في كلية الطب جامعة عين شمس
أنما
ليه الطب خصوصاً بيعمل فيهم كده؟
أنا
نفسي أشوف كتاب أدبي مكتوب عليه اسم المؤلف و قبليه حرف الـ (م) الجميل ده ، و لو
حتي كان مهندس في هندسة الفضاء مش مشكلة ...
في رأيي أن الطب بيعتمد علي الكلام و القص ، يعني وصف دقيق للأعضاء و الأمراض و العلاجات و بالرسومات ، فبيطلع الطبيب من
دول و هو بيعرف يقرأ كتير لأني اتعود أصلا يقرأ كتب الدراسة اللي كلها كتابة و
بيعرف يرسم كمان لأنه مطلوب منه يرسم تفاصيل دقيقة في حتة صغيرة جداً في جسم
الإنسان ، و امتحانتهم كمان معظمها كتابة و رسم فهو أصلاً متعود علي كده
...
أنا
بتكلم طبعاً علي الناس اللي في طب و لسه بيقراءوا و يكتبوا زي الناس الطبيعية ،بيقرأوا كتب الكلية
و بيذاكروا منها مش علي رأي الدكتور أحمد خالد توفيق ، العصر اللي جي ما فيش طالب
علم هيقرأ في كتاب و كل الاعتماد هيبقي علي المذكرات و الملازم ،
أنما
مثلاً طلبة الهندسة هتلاقي عندهم كتاب كبير في التفاضل و التكامل كله مسائل يا عيني ، و
مطلوب منه أنه يفاضل و يكامل و الكلام كله علي أرقام و علاقات حسابية ، مطلوب منك
أنك تقعد ترسم شوية خطوط بالمسطررة الحرف ته " T سابقاً" ، و تعمل منظورو مساقط ، في مواد في
هندسة ما فيش و لا كلمة ممكن تتقرأ زي الرسم الهندسي مثلاً أو التفاضل و التكامل كله
رموز و مسائل و حاجة تحسسك أنك اله حاسبة ...
شوف
طريقة مذاكرة واحد من هندسة كده و أنت تعرف أنا قصدي ايه ، هتلاقي كتب كاملة
مليانة أرقام و جداول بيخرج منها ارقام بيستخرج منها حاجات علشان حل مسائل و هكذا
، بمرور الوقت بتبقي كمبيوتر متبرمج تدخل علي الجدول ده تطلع القيمة دي تستخدمها
في المعادلة التانية علشان تتطلع رقم تدخل بيه علي رسم بياني تطلع قيمة منه علشان
تعمل حاجة ثالثة و بعدين ترجع تراجع الكلام ده كله و تتأكد ان شغلك صح و اللي غالباً بيطلع غلط ... ههههههههه
و
ممكن كمان يكون أن الاطباء مهتمين بالأدب لأن في جناس بين كلمة أطباء و أدباء ، أه
يعني الفرق بس في حرف و الطه و الده ( حلوة الده دي) ولاد عم و لو مثلاً واحد
بلدياتنا حب ينطق كلمة أطباء و كلمة أدباء مش هتحس بقفرق خالص ... جرب كده
... أطباء ، ادباء ... زي بعض صح ؟
انتهي
هناك ١٨ تعليقًا:
ده سببه بسيط لان اي حد بيخش كلية الطب من سنة اولى عايز الناس تقوله يا دكتور مع ان لقب دكتور للحملة درجة الدكتوراه بس ..يعني يوسف ادريس ومصطفي محمود لا يستحقو اللقب .في من الممثلين كتير زراعة وتجارة وهندسة كمان ...وفي من الكتاب كمان من مهن اخري بس اللي يعرف توفيق الحكيم كان حقوق نجيب محفوظ تاريخ
والله زمان - وحشتنا تدويناتك
تحفة تعليق عمنا " جلال عامر " وجميل الموضوع
كنت قاريت قبل كده مقدمة لـ طه حسين فى رواية لـ يوسف ادريس بعنوان " جمهورية فرحات " وهو بردة استعجب من كثر الاطباء الذين يكتبون الرويات وارجع ذلك لان عملهم يعتمد اكثر على الاحساس بالمريض والتواصل الانسانى معه قبل التواصل المهنى
وده مشابة لما قلته انت فى التدوينة
وان كان لى راى خاص ومغاير فى حالة الاطباء الجراحين بحس انهم جزارين لا ليهم دعوه لا بتواصل انسانى ولا بغيرة :D
متحرمناش من تدويناتك ........
أولاً حمد الله على السلامة بعد طول غيبة و ميرسى جداً جداً للفتتك اللطيفة و تحيتك للمدونة النونو بتاعتى :)
ثانياً :
"الطب بيعتمد علي الكلام و القص ، يعني وصف دقيق للأعضاء و الأمراض و العلاجات و بالرسومات ، فبيطلع الطبيب من دول و هو بيعرف يقرأ كتير لأني اتعود أصلا يقرأ كتب الدراسة اللي كلها كتابة و بيعرف يرسم كمان لأنه مطلوب منه يرسم تفاصيل دقيقة في حتة صغيرة جداً في جسم الإنسان ، و امتحانتهم كمان معظمها كتابة و رسم فهو أصلاً متعود علي كده ... "
القصة مش كده لأن ده لو حال الطب فده مش حال الصيدلة اللى كلها معادلات :) الفكرة فى حاجتين :
1- الدراسة الطبية بتعود على التأمل و العناية بالتفاصيل لإرتباطها بالتشريح سواء تشريح الجثث فى طب أو التشريح النباتى عندنا , غير دراسة العمليات الحيوية فى الجسم و التفاعلات العضوية بتعودك على (سستمة) كل حاجة ..إن يبقالها أول و آخر و وسط .
2- أغلب اللى بيدخل كليات الطب و الصيدلة كانوا ناس زى حالاتى ميولهم أدبية أصلاً -لكن المهندس ده واحد من الأول غاوى رياضة و هندسة رغم انى كنت بحب الرياضة و انا صغيرة برضه :)
ده اقتراحى فى القضية يعنى :) و بجد ميرسى لذوقك انت ادتنى اكتر من حقى بكتير .
دمت بكل الود :)
و الدكتور أحمد مراد كمان
أعتقد ان الدراسة العملية البحتة اللى بيدرسوها بتخليهم يفرغوا شحنات المشاعر اللى عندهم ف حتة تانية زى الادب او اى فن
فعلاً
العلاقة بين الطب والأدب علاقة غريبة وعجيبة وصعب تفسيرها في بعض الأحيان
على فكرة
أنا خريج كلية طب مصرية فيها نادي أدب رسمي يعقد أسبوعياً من سنة 1996، يعني دي السنة الـ 15 له على التوالي، وخرّج بالفعل أدباء باتوقع لهم مستقبل مشرق لو ما أخدهمش الطب في سكته زي ما حصل لي
********
آه صحيح
أنا اسمي مش مكتوب لييييييييييييه؟؟
:D :D :D
اتأخرت في الرد نظراً لانشغالي الفترة الماضية و هيكون برضه الفترة القادمة
ما علينا
بقي نرد علي تعليق تعليق
نبدأ بالترتيب
##تركيب##
أزيك يا جميل ، فينك من زمان
مش معاك في نقطة أن الدكتور بس هو اللي أخد الدكتوراة من كلية الطب ! هي صح اكاديمياً بس أكيد هو قادر علي مممارسة عمله حتي لو ما كملش الدكتوراة يعني ما ما كنش بيلعب اسكواش في الكلية السبع سنين دول
ههههههههه
و أكيد في كُتاب و أدباء و فنانين عامةً خريجي كليات هندسة و حقوق و زراعة بس فعلاً كليات الطب هي اللي واخدة نصيب الأسد في الموضوع ده
و في كتاب أصلاً ماكملوش تعليهم زي العقاد مثلاً مع انه كاتب عظبم طبعاً!
##عمرو عواد ##
مقصر معاك و مع مدونتك يا عمور بس اعذرني أنا فعلاً بقيت مشغول أوي لدرجة أني مش بقرأ أو اكتب اي حاجة جديدة اليومين دول
أحنا متفقين علي الكلام
و بالنسبة للجزارين - قصدي الجراجين - أنا معاك برضه في الموضوع ده
هههههههه
بش مش عايزين حد يزعل مننا
و لي زيارة خاصة لمدونتك إن شاء الله بس أنت جهز القعدة و كوباية الشاي
## أخر أيام الخريف##
سلمك الله يا دكتورة
أنا مش بعرف أجامل
مدونتك فعلاً حلوة جداً و مفيدةو ممتعة جداً بالنسبة ليا أو غيري
و مش أنا بس اللي بقول كده
معاكي في النقطتين اللي قلتيهم
و علي فكرة بقي أنا ميولي أدبية جداً يعني أنا في الثانوي العام كنت بحب اللغة العربية جداً و بحب الشعر و النثر و النحو لدرجة أني كنت بحب أحفظ الابيات الشعرية و النثر كمان و الابيات اللي بتبقي موجودة في شروحات الدروس و اي حاجة تقابلني موجودة فيها قصة أو حكاية كنت بقرأها
و كنت مواظب علي قراءة القصص القصيرة و الموضوعات ذات الطابع الحكائي في الجرائد و كنت مواظب علي شراء بعض المجلات في الوقت ده
بس فعلاً كان مستحيل أني ادخل طب
مع أن الهندسة مش سهلة
علي العموم الميول الأدبية في الطب بتعلي شوية و يمكن استغلالها
أنما في هندسة بتموت ... بتموت
دا أنا مش عارف أدخل المدونة بتاعتي اليومين دول و بدخل كل فين و فين
نياااااااااااااااااااااااااااااه
ومعلش يا دكتورة أنا مقصر معاكي بس إن شاء الله لكي زيارة قريبة
##الظل##
أزيك يا باشا ايه أخبارك
مش عارف مين د.أحمد مراد صراحة و أول مرة اسمع انه ...
##إنسان افتراضي##
أهلاً بيك في أول تعليق عندي ، بس أنت جي في وقت أنا تقريباً بطلت أكتب
ههههههههه
علي العموم المدونة فيها موضوعات ممكن تعجبك ابقي قلب كده و قول لي رأييك ،
و ما عرفتش احط اسمك علشان زي ما أنت قلت الطب أخذك
ما الواحد لازم يركز في حاجة واحدة بس برضه و كمان انت إنسان افتراضي
أحط اسمك أزاي ؟؟؟؟
ههههههههههههه
بالمناسبة مدونتك جميلة جداً انتظر زيارة مني
سلام
أوباااااا.... مين بقى اللي بيجيب سيرة الجراحين؟ مالهم بقااااا؟ :))
حبيت اجى و اشكرك على مجاملتك الرقيقة
انشاء الله ابقى من المتابعين لمدونتك الجميلة و فى انتظار بوستات جديدة
خالص تحياتى ابراهيم رزق
أنت أكيد عارف رأيي في الموضوع ده
بس بجد حلوة أوي الافتراضات بتاعة ان الأطباء بيتعاملوا مع حالات انسانية وبيحتاجوا لوصف دقيق وكده
تسلم ايديك :)
##إنسان افتراضي##
أيه ده هو أنت طبيب جراح ؟؟؟
شوفت بقي يا عمرو ، مش قلت لك مش عايزين نزعل حد (:
بس يا دكتور
الموضوع وما فيه أن طبيب الجراح في بينه و بين الفن علاقة وثيقة
خدعندك مثلاً
جورج وسوف بيقول لك ايه
طبيب جراح قلوب الناس أداويها
يعني عمرك سمعت أغنية بتقول
طبيب أسنان أسنان الناس أداويها
أو طبيب أطفال الناس أداويها !!!
لا
شوفت بقي
لا وكمان ايه شريين بتقولك ايه
جرح تاني
هو أنا الجرح الاولاني لم علشان يبقي في جرح تاني
هههههههه
يعني شغل جي لك و خير ... حد يرفض
وكمان بيقولوا ايه تاني
جرحني برمش عينه
يعني لو كل واحدة جرحت واحد برمش عينها يبقي أنت مش هتلاحق هههههههههه
أوعي تكون زعلان مني
:D :D :D:
##أ.إبراهيم مرزوق ##
بجد أنا سعيد جداً بزيارتك للمدونة و التعليق فيها كمان
وإن شاء الله أكتب حاجات تعجبك ،
تحياتي لك يا أستاذ إبراهيم
##سمو الأمير ##
واحشني جداً يا بوحميد ... يا رب تكون بخير ، أحنا كنا أتكلمنا قبل كده في الموضوع ده علي الفيس بوك
و أنا شايف أنك هتكسر القاعدة و تبقي أديب كبير كمان
بس أنت خلص من كلية الهندسة المقيتة دي
ههههههههه
حلوة المقيتة دي ؟!!!!!!
اولا : هيييييييييييييييييييييه حد افتكرنى و كتب عنى ....لا وايه و كمان محطوطه مع مين مع يوسف ادريس و الفخرانى واحمد خالد توفيق.....
ثانيا : صحيح انت لفت نظرى للنقطه دى هما مال بتوع طب و مال الكتابه...
فى رأيى ان بتوع طب بذات -او على الاقل انا- عليهم ضغوط كتير فى الحياه والدراسه فبيقوا عايزين يفكوا شويه الهم ده ...و كمان زى رأى اخر ايام الخريف ان معظمنا كانت ميوله ادبيه اساسا لكن شفنا ان الميول دى مش بتاكل عيش .....
و بعدين ما انت هندسه اهو و زى الفل...غير انت الاتجاه يا عم
ملحوظه كده على جنب: يمكن بتوع هندسه مركزين مع الشغل و الفلوس "بين قوسين شويه نق و حسد" بينما الاطباء اخرهم 165 جنيه فى مستشفى بائسه...
##د.دودي##
أهلاص بيكي يا دكتورة ...
متفقين في الرأي
"و بعدين ما انت هندسه اهو و زى الفل...غير انت الاتجاه يا عم"
داأنا غلبااااااااان (: (: (: (:
إرسال تعليق